Elordadaǵy «Astana trıatlon» saıabaǵynda Nur-Sultan qalasynyń joǵary oqý oryndary stýdentteriniń arasynda jyl saıynǵy «Ýnıversıada» jarysynyń saltanatty ashylý rásimi ótti, dep habarlaıdy Egemen.kz qala ákimdiginiń resmı saıtyna silteme jasap.
Sharanyń ashylýyna Nur-Sultan qalasynyń Dene shynyqtyrý jáne sport basqarmasynyń basshysy Samat Sabıtuly jáne Nur-Sultan qalasynyń Jastar saıasaty máseleleri basqarmasy basshysy Qaırat Qambarov qatysyp, sportshylarǵa sáttilik tiledi.
«Búgin Nur-Sultan qalasynyń joǵary oqý oryndary stýdentteriniń arasynda jyl saıynǵy «Ýnıversıada» bastaldy. Bıylǵy Ýnıversıada Qazaqstan Respýblıkasynyń Memlekettik Rámizderine 30 jyldyǵyna arnalyp otyr. Elordanyń 9 joǵary oqý ornynyń stýdentteri sporttyń 4 túri boıynsha ózara básekege túsetin bolady. Elordada Ýnıversıada elimizdiń Táýelsizdik alǵan kúninen bastap 31-ret ótkizilip keledi.
Ýnıversıadanyń maqsaty jastar men jasóspirimderdi sportqa yńtalandyrý, salaýatty ómir saltyn nasıhattaý, buqaralyq sportty damytý, sol sııaqty jastardyń belsendiliginiń damýyna yqpal etý.
Jarys sonyńda Ýnıversıadanyń qorytyndysy shyǵarylyp, jeńimpazdar men júldegerler marapattalatyn bolady», deıdi Nur-Sultan qalasynyń Dene shynyqtyrý jáne sport basqarmasynyń basshysy Samat Jylqybaev.
Elordanyń 9 ýnıversıteti, L.N. Gýmılev atyndaǵy Eýrazııa ulttyq ýnıversıteti, S.Seıfýllın atyndaǵy Qazaq agrotehnıkalyq ýnıversıteti, Astana medısına ýnıversıteti, Qazaq tehnologııa jáne bıznes ýnıversıteti, Qazaq ekonomıka, qarjy jáne halyqaralyq saýda ýnıversıteti, Turan - Astana ýnıversıteti men M.S. Nárikbaev atyndaǵy KAZGIýÝ ýnıversıtetiniń stýdentteri men magıstranttary úzdik sport komandasy ataǵy úshin talasady.
«Ýnıversıada» jarysyna bıyl 120-ǵa jýyq joǵary oqý ornynyń stýdentteri sporttyń 4 túrinen synǵa tústi. Olar:
Strıtbol (uldar-qyzdar)
• Asyq atý (uldar), Bes asyq (qyzdar)
• Qol kúres 10 salmaq boıynsha (55, 60, 65, 70, 75, 80, 85, 90, 100, +100 kg)
• Jazǵy Prezıdenttik kópsaıys (bir orynnan uzyndyqqa sekirý jáne 100 metr ýaqytqa júgirý: uzaq qashyqtyqqa júgirý (erler – 300 m) jáne (áıelder – 2000 m).
«Nur-Sultan qalasynyń namysyn qorǵaıtyn qurmet kez-kelgen komandaǵa tapsyrmasy anyq. Eń mańyzdysy, Almaty qalasynda ótetin Respýblıkalyq dárejedegi jarysty abyroımen qorǵap, jeńispen oralý. Búgin mine ózderińiz kýá bolǵandaı, alda ótetin Respýblıkalyq Ýnıversıadaǵa QazATÝ ýnıversıteti joldama aldy. Barsha jeńimpazdar men júldegerlerdi shyn júrekten quttyqtaımyn! Júldelerińiz qutty bolsyn!» dedi Nur-Sultan qalasynyń Jastar saıasaty máseleleri basqarmasy basshysy Qaırat Qambarov.
Aıta keteıik, jarystardyń alǵashqy legi sáýir aıynda qyzdar arasynda voleıbol oıynymen bastalǵan bolatyn.
Ýnıversıada qorytyndysy boıynsha, jalpy komandalyq esepte 1-oryndy Sáken Seıfýllın atyndaǵy Qazaq agrotehnıkalyq ýnıversıteti ıelense, Turan Astana ýnıversıteti 2-oryndy qanjyǵasyna baılady. Al L.N. Gýmılev atyndaǵy Eýrazııa Ulttyq ýnıversıteti 3-orynǵa jaıǵasty.