Májilis depýtattary Darhan Myńbaı, Qudaıbergen Erjan, Qaınar Abasov jáne Syrym Ertaev óńirlerge sapar aıasynda Túrkistan oblysyna baryp, halyqpen kezdesti.
Basqosýlar barysynda depýtattar jergilikti turǵyndarǵa konstıtýsııalyq túzetýlerdi túsindirip, referendýmǵa qatysýǵa shaqyrdy. Shtab músheleri Túlkibas aýdanynyń Mıchýrın aýyldyq okrýginde sharýa qojalyǵy ıelerimen jáne kásipkerlermen kezdesip, jalpyhalyqtyq referendýmdy ótkizýdiń alǵysharttary, usynylǵan reformalardyń erekshelikteri týraly baıandady.
– Jalpy oblysta halyqpen júzdeskende birneshe másele kóterildi. Sonyń ishinde áıelderdiń zeınet jasyn qysqartýǵa erekshe mán berilýde. Budan bólek jaıylym jer tapshylyǵy, ónerkásip oryndaryn ashý, sýbsıdııa alý, agro bank qurý tóńireginde usynystar aıtyldy. Bul referendým shyn máninde Ádiletti Qazaqstan qurý jónindegi saıası reformalardy júzege asyrýdyń alǵysharty bolyp tabylady, – dedi Darhan Myńbaı.
Kezdesýde aýyl turǵyndary belsendilik tanytyp, ózderin tolǵandyrǵan saýaldaryn qoıyp, pikir alysty. Solardyń biri Túlkibas kenti ardagerler keńesiniń tóraǵasy S.Toǵysbaev birqatar usynys aıtyp, jańa ózgeristerge kóńili tolatynyn jetkizdi.
– Osyǵan deıingi qoldanystaǵy zańdaǵy 98 baptyń 33-ne ózgeris engizý jónindegi mátindermen túgel tanysyp shyqtym. Árıne, óte quptarlyq másele. Sebebi biz bolashaqta Jańa Qazaqstan úshin ádildik pen ashyqtyqty jáne demokratııalyq reformalardy qoldaýymyz kerek. Ol úshin alda ótetin búkilhalyqtyq referendýmǵa barlyq azamatty, ásirese jastardy ózderiniń bolashaqtary úshin kelip daýys berýge shaqyramyn, – dedi aýyl aqsaqaly.