12 mamyr kúni «Egemen Qazaqstan» gazetinde Qazaqstannyń qurmetti jýrnalısi Aqash Kóksegenniń «Shubartaý Shyńǵystaýdyń kúngeıinde» degen taqyryppen Shubartaý aýdanynyń ótkeni, búgini jáne keleshegi jan-jaqty taldanǵan maqala jaryq kórgeni belgili. Osy maqalaǵa oraı aýyl sharýashylyǵy salasynyń mamany retinde men de ózimniń pikirimdi bildirýdi jón kórdim.
Maqalada kórsetilgendeı, Shubartaý ózi qosylǵan Aıagóz aýdanynyń ortalyǵynan da, sondaı-aq oblys ortalyǵynan da shalǵaı jatyr. Taraǵan basqa aýdandar: Maqanshy, Aqjar, Samar, Shar aýdandary ortalyqtarynyń geografııalyq ornalasýy Shubartaý aýdanynan ózgerek. Sol sebepti bul jerlerden adamdardyń qonys aýdarýy kóp baıqalǵan joq jáne osy arqyly burynǵy aýdan ortalyqtarynyń kelbeti de buzylmaı, ejelgi qalyptaryn saqtap qaldy deýge bolady. Al Shubartaýdy aýdan ortalyǵymen, basqa da eldi mekendermen baılanystyratyn jalǵyz kóterme joldyń jaǵdaıy syn kótermeıtin kúıge tústi. Onyń ústine, temir jol qatynasy da joq bolǵandyqtan, adamdardyń aýdan ortalyǵyna jetýi, stýdentterdiń kelip qaıtýy qıyndap ketti. Osynyń ózi jergilikti halyqtyń atajurtyn tastap, údere kóshýine ákelip soqtyrdy. Bos qalǵan qurylystar búlinip, eldi meken súreńsiz qalypqa endi. Josparsyz kóshken adamdar da kúnkóristiń aýyrtpalyǵymen betpe-bet qaldy. Kezindegi jaǵdaı aýdandar men oblystardy bir-birine qosýdy talap etken de bolar. Degenmen 100% derlik baıyrǵy ult ornalasqan Shubartaý, Abyraly sııaqty aýdandardyń taratylýyn oń sheshim boldy dep aıta almasaq kerek.
Memleket basshysy Qasym-Jomart Toqaevtyń Jańa Qazaqstan qurý týraly bastamasyn kezinde jiberilgen qatelikterdi túzetýge betburys dep túsinemin. Búginde elimizdiń áleýmettik-ekonomıkalyq ahýaly da oǵan múmkindik beredi ǵoı dep oılaımyn. Al ulan-ǵaıyr jeri bar burynǵy Shubartaý aýdanynyń jeri mal sharýashylyǵyn órkendetýge óte qolaıly. Munyń syrtynda, jer qoınaýyndaǵy qazba baılyqtary da jeterlik. Halyq sany az degen jeleýdiń aýdandy qaıta ashýǵa kedergi keltire almaıtyn ýáj ekeni kúmánsiz.
Amangeldi TILEÝJANOV,
Aıagóz aýdanynyń qurmetti azamaty
SEMEI