Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın Aqtóbe qalasyndaǵy Mamandandyrylǵan HQKO-da azamattardy qabyldap, jergilikti tehnoparktiń jumysymen tanysty, dep jazady Egemen.kz mınıstrliktiń baspasóz qyzmetine silteme jasap.
Turǵyndar avtoHQKO-nyń jumysyn jeńildetip jatqan júıelerge oń baǵa berip, qujattardyń da jyldam resimdele bastaǵanyn aıtty. Alaıda bıýrokratııanyń saldarynan áli de sheshilmeı turǵan máseleler bar ekendigin de jetkizdi.
Halyqpen kezdesý kezinde Baǵdat Mýsın mınıstrlik qyzmetiniń basty baǵyttary men atqarylyp jatqan jumystar týraly baıandady. Onyń aıtýynsha, Aqtóbe oblysyndaǵy 322 eldi mekenniń 226-synda mobıldi baılanys bar, qalǵan 96 aýyl 2024 jyldyń sońyna deıin baılanyspen qamtamasyz etiledi.
Sonymen qatar memlekettik qyzmet kórsetý sapasyn kóterý baǵytyndaǵy jumystar jalǵasyp jatqandyǵy aıtyldy. Búgingi tańda eGov servısteri men eGov Mobile mobıldi qosymshasy, ekinshi deńgeıli bankterdiń qosymshalary men túrli kompanııalardyń servısteri arqyly memlekettik qyzmetterdi qashyqtan alýǵa bolady.
Qazir qosymshalarda 24 memlekettik qyzmet bar, asa qajetti 18 qujattyń sıfrlyq nusqasy jasaldy – jeke kýálik, júrgizýshi kýáligi, PTR-test, týý týraly kýálik, neke týraly kýálik jáne t.b.
«Aldaǵy ýaqytta biz kóptegen memlekettik qyzmetterdi proaktıvti túrde usynýdy kózdep otyrmyz, ıaǵnı memlekettik qyzmetterdi alý úshin HQKO-ǵa júginýdiń qajeti bolmaıdy. Qazirdiń ózinde 23 memlekettik qyzmet proaktıvti nusqada usynylady. Máselen, bala týýǵa baılanysty kórsetiletin memqyzmetterdi alsaq, jańa bosanǵan ana SMS-habarlama arqyly rastasa boldy, balanyń týý týraly kýáligi avtomatty túrde resimdeledi. Bolashaqta mundaı proaktıvti qyzmetter qatary arta túsedi», dedi Baǵdat Mýsın.
Turǵyndarmen kezdesý barysynda mınıstr ǵaryshtyq monıtorıng jaıyn qozǵap, tótenshe jaǵdaılardyń aldyn alý úshin Aqtóbe oblysynyń terrıtorııasyna táýlik boıy túsirilim jasalatynyn aıtty. Osyndaı úzdiksiz baqylaýdyń nátıjesinde órt pen tasqynnyń geografııalyq oshaqtaryn anyqtap, jedel túrde arnaıy qyzmetterdi habardar etý múmkindigi bar. Mysaly, bıyl sáýir aıynda Aqtóbe oblysynyń aýmaǵynda 17 órt oshaǵy anyqtalyp, der kezinde óshirildi. Sondaı-aq tasqyn sý qaýpi bar aýmaqtarǵa da únemi baqylaý jasalady.
Baıandamadan soń mekeme basshysy halyqty alańdatqan saýaldarǵa jaýap berdi.
Sıfrlyq damý mınıstri aqtóbelik tehnoparkte aqparattyq qaýipsizdik boıynsha jobalarmen, robototehnıkamen jáne jergilikti IT-mamandar usynǵan basqa da ınnovasııalarmen tanysty.
IT-qaýymdastyq jáne stýdenttermen kezdesý kezinde Baǵdat Mýsın IT-kadrlar tapshy ekendigin, mınıstrlik osy máselemen aınalysyp jatqandyǵyn tilge tıek etti.
«Bizdiń maqsatymyz - 2023 jylǵa deıin 100 myń IT-maman daıyndaý. Alǵashqy kezeńde jeke jáne memlekettik mektepterde oqý úshin qazaqstandyqtarǵa IT-vaýcherler beriledi. Bizdiń sala basqa ekonomıkalyq salalarǵa qoldaý kórsetip qana qoımaı, ekonomıkamyzǵa óz betinshe tabys quıa alatynyn dáleldeýi tıis», dedi sıfrlyq damý mınıstri.
Mekeme basshysy Aqtóbe oblysynyń ákimi Ońdasyn Orazalınmen kezdesip, issapar barysynda túıgen máseleler boıynsha oı bólisip, aımaqtaǵy sıfrlyq transformasııa baǵytynda atqarylyp jatqan jumys barysyn talqylady.