ASTANA. 24 sáýir. Astanada 1-synyp oqýshysynyń qaltasyndaǵy uıaly telefony jarylyp, sonyń saldarynan ol 3-dárejeli kúıikpen aýrýhanaǵa jetkizildi. Bul týraly NUR.kz habarlady.
Astanalyq jeti jasar Arıana Aıtjan óziniń Samsung Galaxy S2 markaly uıaly telefonynyń jarylýynan denesin kúıik shalyp ári eseńgirep qalǵan.
Oqýshynyń ákesi Erlan Aıtjannyń aıtýynsha, qyz aýlada oınap júripti. Ol áldene tars etkende, qoryqqannan aıqaılap jiberedi. Sol sátte djınsı shalbary jana bastaıdy. Kıimi órtenge Arıana aınalasyndaǵylardy kómekke shaqyrady. Sodan, kórshiler onyń djınsıin sheship alǵanda, terisi birge sypyrylyp túsken. Kúıik súıekke deıin barǵan.
Al Arıananyń anasy Álııa Qamzına: «Biz qazir aýrýhanada jatyrmyz, sirá, biraz bolatyn túrimiz bar. Terisin jamaý kerek. Qyzym qazir telefonnan qorqatyn boldy. Men Samsung kompanııasyna telefon shaldym, olar bárin ótep, emdeý shyǵyndaryn tóleýge ýáde berdi», – dedi. Qazir qyzdyń ata-analary perzentteriniń densaýlyǵymen bas qatyrýda. Olar budan keıin kinálilerdi anyqtaýǵa kirispek.
Olar Samsung Galaxy S2 telefonyn Astanadaǵy Respýblıka dańǵyly boıyndaǵy dúkennen satyp alypty. Erlan Aıtjan telefondy táýelsiz saraptamaǵa bermek. Jábirlenýshiler Máskeýdegi Samsung-ortalyǵyna hat jazypty. Olar telefondy salyp jiberýdi suraǵan. Erlan Aıtjan: « Biz ázirge ony jibermeımiz, aldymen táýelsiz saraptama ótkizemiz. Qazir biz qyzymyzdyń densaýlyq jaǵdaıymen aınalysýdamyz, biraq ta keıin mindetti túrde máseleniń mán-jaıyn teksertetin bolamyz», – dedi.
Osy jaǵdaıǵa baılanysty Samsung kompanııasy jaǵynan túsinikteme berilgenin de aıta ketelik. Olar «Biz jarylǵan telefondy alyp, muqııat tekserýimiz kerek. Sodan keıin onyń ne sebepti jarylǵanyn anyqtaıtyn bolamyz. Bul iske jeńil qaramaımyz. Biz úshin tutynýshylarymyzdyń qaýipsizdigi mańyzdy. Samsung Kazakhstan mindetti túrde Arıana Aıtjannyń ata-anasymen baılanysyp otyrady. Olarǵa qajetti kómegimizdi beremiz» depti.
Joldybaı Bazar.
Derekkóz: NUR.kz.
Foto: Supreme.ru.