Jambyl oblysynda kún men jelden energııa óndirý keıingi jyldary basty basymdyqtardyń birine aınaldy. Qazir kúnnen jáne jelden energııa óndirý máselesine óńirdiń birqatar aýdany aıryqsha nazar aýdaryp keledi.
Bir ǵana Talas aýdanynda búgingi tańda úsh birdeı jel elektr stansasynyń qurylysy qarqyndy túrde júrgizilip jatyr. Atalǵan nysandardyń qurylys jumystaryn «Sheńgeldi», «Sheńgeldi-2», «Novateks» sekildi seriktestikter sátimen júzege asyryp keledi.
Stansalar qurylysy Qyzyláýit aýyldyq okrýginde júrgizilip jatyr. Okrýgte buǵan deıin eki birdeı jel elektr stansasy salynǵan. Jalpy qýaty 4,5 megavatqa jetip jyǵylatyn alǵashqy jel elektr stansasynyń qurylysyn «Sheńgeldi» JShS osydan eki jyl ýaqyt buryn qolǵa alǵan. Jobanyń jalpy quny – 1 mlrd 829,1 mln teńge. Nysannyń qurylys jumystaryn sapaly júrgizý maqsatynda 11 adam jumyspen qamtylǵan. Qazirge deıin munda úsh birdeı qondyrǵy ornatyldy. Aldaǵy ýaqytta ózge de jumystar atqarylmaq. Merdiger seriktestik stansanyń jumysyn jyl sońyna deıin aıaqtaýǵa nıet bildirip otyr. Mańyzdy nysannyń qurylys jumystary mejeli ýaqytta aıaqtalsa, jyl sońynda iske qosylmaq.
«Novateks» JShS qolǵa alǵan taǵy bir nysannyń da qýaty 4,5 megavatty quraıdy. Búginge deıin atalǵan stansadaǵy jumystardyń bir parasy aıaqtalýǵa jaqyn tur. Qondyrǵylar tolyqtaı ornatylyp, ishki jumystar júzege asyrylyp jatyr. Aýdan ákimdiginiń baspasóz qyzmeti taratqan derekke zer salsaq, jel elektr stansasyn osy jyly tolyq aıaqtaý kózdelgen.
«Sheńgeldi-2» JShS qurylysyn júrgizip jatqan stansada birqatar qajetti qondyrǵylar der kezinde ornatylǵan kórinedi. Sondaı-aq jel elektr stansasyna qajetti qural-jabdyqtar Danııa elinen ákelindi. Jobanyń quryltaıshy dırektory Joldybek Turalıev mańyzdy nysandar ýaqtyly iske qosylsa, jergilikti jurtqa paıdasy mol bolatynyna senimdi.
Talas aýdanynyń kásipkerlik, ónerkásip jáne týrızm bóliminiń basshysy Aýdanbek Taýasarovtyń aıtýynsha, 2022 jyly jalpy qýaty 13,5 megavatty quraıtyn úsh stansa paıdalanýǵa beriledi.
«Bizdiń aýdanda birneshe jyldyń bederinde boı kótergen elektr stansalarynyń aýdan ekonomıkasyn arttyrýda mańyzy zor. Búginge deıin jalpy qýaty 9 megavatty quraıtyn eki stansa iske qosylsa, osy jyly paıdalanýǵa beriletin jel elektr stansalarynyń qýaty 13,5 megavattqa jetedi. Barlyǵynyń qýatyn qosa eseptesek, 22,5 megavattqa jetip otyr. Bul aýdanymyz úshin jaqsy kórsetkish. Alaıda toqmeıilsip qalmaı, osy baǵyttaǵy jumystardy odan ármen qaraı jandandyra túsýge beıilmiz», deıdi ol.
Jambyl oblysy,
Talas aýdany