Memleket basshysy VII Astana ekonomıkalyq forýmy men Daǵdarysqa qarsy dúnıejúzilik II konferensııa aıasynda BUU ókilderimen kezdesti, dep habarlady Prezıdenttiń baspasóz qyzmeti.
Prezıdentpen kezdesýge BUU Bas hatshysynyń orynbasary Gıan Acharıa, BUU Ekonomıkalyq jáne áleýmettik keńesiniń prezıdenti Martın Saıdık, BUU Bas hatshysynyń orynbasary – BUU Bas hatshysynyń Shyǵys Tımor jónindegi arnaýly keńesshisi Noelın Heızer jáne BUU Saýda jáne damý jónindegi konferensııasynyń Bas hatshysy Mýkısa Kıtýı qatysty.
Memleket basshysy BUU ókilderine Forým jumysyna qatysqany úshin alǵys aıtty, sondaı-aq táýelsizdiginiń alǵashqy kúnderinen bastap Qazaqstan Uıymnyń barlyq baǵyttaǵy qyzmetin belsene qoldap kele jatqanyna toqtaldy.
Qazaqstan Prezıdenti Semeı ıadrolyq polıgony jabylǵan kúndi BUU ıadrolyq synaqqa qarsy halyqaralyq is-áreket kúni dep jarııalaǵanyn atap ótti.
Nursultan Nazarbaev bizdiń elimiz Almatyda BUU-nyń óńirlik habyn qurýdy usynǵandyǵyna da toqtalyp ótti.
– Búginde Almatyda BUU uıymdarynyń, baǵdarlamalarynyń, qorlary men mamandandyrylǵan mekemeleriniń 18 ókildigi qyzmet isteıdi. Osy hab arqyly biz óńirlermen, ásirese Aýǵanstanmen jumys júrgize alar edik, – dedi Memleket basshysy.
BUU Bas hatshysynyń orynbasary G. Acharıa óz kezeginde Uıymnyń Bas hatshysy Pan Gı Mýnnyń VII Astana ekonomıkalyq forýmyna tabys tilegen sálemin jetkizdi. Sondaı-aq, BUU júıesindegi túrli bastamalar men ıdeıalardy Qazaqstannyń belsene qoldaǵany úshin rızashylyǵyn bildirdi.
– Sizderdiń jahandyq kún tártibindegi belsendi kóshbasshylyq ustanymdaryńyzdy árdaıym qoldap kelemiz. Biz Qazaqstannyń ıadrolyq qarýsyzdaný, órkenıetter arasynda suhbattastyq ornatý jáne Azııada ózara senim júıesin qalyptastyrý turǵysynan jasaǵan qadamdaryn joǵary baǵalaımyz, – dedi G. Acharıa.
Kezdesý sońynda Memleket basshysy Qazaqstan Respýblıkasy Úkimeti men Eýropa qaıta qurý jáne damý banki, sondaı-aq Islam damý banki toby arasyndaǵy seriktestik týraly negizdemelik kelisimge qol qoıý rásimine qatysty.
Osy rásimnen keıin Qazaqstan Prezıdentine Jahandyq dıalog jáne yntymaqtastyq ortalyǵynyń 2013 jylǵy «Áleýmettik bıznes-dıalogty nyǵaıtýǵa úles» nomınasııasyndaǵy syılyǵy tapsyryldy. Syılyqty Eýropa Parlamentiniń múshesi Marıo Davıd jáne Bolgarııanyń eks-prezıdenti Petr Stoıanov tabys etti.