Gazetimizdiń 14 mamyr kúngi sanynda «Baıdalanyń baǵyn baılamaıyq» atty maqala jarııalanǵan bolatyn. Onda oblys ortalyǵyna qarasty Baıdala aýylynda 700 adam turatyny, 50 jyldyq tarıhy bar bastaýysh mekteptiń jabylýyna oraı renish bildirgen adamdardyń aryz-shaǵymdary aıtylǵan edi. Aýyl toly – bala-shaǵa. Osyǵan qaramaı sheneýnikter ashanasy, dárethanasy joq dep mektepti jappaq boldy. 2009 jyly Baıdalada oblys ortalyǵynyń bas jospary boıynsha mektep salynýy kerek edi. Aýyl qalaǵa qaraıtyn bolǵan. Biraq qozǵalys bolmady. Endi, mine, balalary úshin muńaıyp, ýaıymdy kúı keshken aýyldyqtarǵa qýanyshty habar da jetti.
Maqalaǵa oraı, bizge oblystyq bilim basqarmasynyń bastyǵy Baqyt Bekseıitova bylaı dep jaýap berdi: «№2 Kenjekól bastaýysh mektebiniń jańa talapqa saı kelmeıtini ras, ekinshiden, aldaǵy ýaqytta Baıdalaǵa jaqyn Kenjekól aýylynda 600 oryndyq jańa mektep salynady, tasymalmen baryp oqý úshin qalalyq ákimdik bıýdjet qarajatynan avtobýs alýǵa aqsha bóler edi. Biraq, eń bastysy, biz Baıdala aýyly turǵyndarynyń basym kópshiligi qoldaıtyn usynys-pikirlerin eskere otyryp, №2 bastaýysh mekteptiń jabylmaıtynyn habarlaımyz».
Al, biz óz tarapymyzdan jańadan kelip jatqan qala ákimi Bolat Baqaýovqa bul jerge oralman aǵaıyndar kóshi kele jatyr. Sondyqtan, Baıdalaǵa jol, mektep, balabaqsha salyp, sý jetkizip, klýbty jóndep berse degen turǵyndar ótinishin taǵy da jetkizgimiz keledi.
Farıda BYQAI,
«Egemen Qazaqstan».
Pavlodar oblysy,
Baıdala aýyly.