Qazaqstannyń qaı qıyryn da qatal synshy sanalatyn qys qos búıirden qysyp tur. Eki táýlikteı toqtaýsyz jaýǵan aq ulpa qar oblys ortalyǵy Taraz qalasyndaǵy joldardy basyp qaldy. Áıtkenmen, qala bıligi tabıǵattyń tosyn minezine saqadaı saı ekendikterin kórsetti.
Ońtústik óńirdiń turǵyndary úshin qalyń qar degenińiz ekzotıka sekildi. Afrıkany aq ulpa basqandaı jergilikti halyq ta bul kúni balalarymen serýenge shyqty. Qalyń qar – tarazdyq baldyrǵandar úshin tamasha tartý. Aqqala soqqan balalardyń júzindegi shattyq taby alystan baıqalady.
Basqalar qýanyp jatqanda qalyń qarmen «myltyqsyz maıdanǵa» shyqqan qyzmetkerler mańdaıdan shúmektep ter tógip, kólik qozǵalysynda másele týyndamaýy úshin aıanbaı eńbek etti. Qysqasy, jedel iske kirisken qala ákimdigi jaýapty qyzmetkerlerdiń ala tańnan qas qaraıǵanǵa deıin tonnalap qar shyǵarýyn qatań baqylaýda ustady.
Qala tazalyǵyna jaýapty «Jasyl El-Taraz» mekemesi oblys ortalyǵyndaǵy avtokólik jáne jaıaý júrginshiler jolyn sát saıyn tazartyp jatyr. Jalqy maqsat – kólik qozǵalysynda qar kedergi bolmaýy kerek.
Qala bıligi keltirgen derekterge súıensek, kóne shahardy qar qursaýynan arshyp alýǵa qabiletti 47 tehnıka bar. Onyń 20-sy qar kúreýge arnalǵan avtokólik bolsa, 13-i tuz aralas qum shashatyn jáne 7 qar kúreýge arnalǵan avtotehnıka. Sondaı-aq 2 avtogreıder, 7 jaıaý júrginshiler jolyn tazalaıtyn MK-320, 2 MTZ-82 tehnıkasy, 3 qum, qar tıegish tehnıka jáne kelisimshart boıynsha jalǵa alynǵan 1 tehnıka, 1 Zıl-130, 2 GAZ-53 júk kólikteri, 4 MTZ-82 tirkemesi, 5 birlik «KamAZ» táýlik boıy tynymsyz jumys istedi.
Salaǵa jaýapty mamandardyń aıtýynsha, kásiporyn qorynda 295 tonna tuz bar. Odan bólek 7 myń tekshe metr qum jáne 1 myń tonna tuz jetkizilgen. Qar tazalaý jumystaryna qyzý kirisken brıgadalar táýlik boıy aýysymmen jumys isteýge ázir. Mekemedegi dıspetcherlik qyzmet barlyq jumysty nazardan tys qaldyrmaıdy. Jalpy, qala boıynsha 450 tekshe metr qar shyǵarylǵan.
О́ńirdegi oblystyq mańyzy bar avtomobıl joldaryn qar qursaýynan tazartý, kútip ustaý úshin jalpy 104,8 mln teńge qarastyrylǵan. Jumystardy júıeli túrde júrgizý úshin 13 merdiger jumyldyrylǵan. Merdigerler naýqandyq jumysqa 141 birlik jol tehnıkasy men jabdyqtaryn, 2 800 tonna qum, 280 tonna tuz ázirlegen.
Mamandardyń aıtýyna qaraǵanda, 9-10 qańtar kúnderi oblystyń barlyq aýmaǵynda qardyń qalyń túsýine baılanysty oblystyq mańyzy bar 1 700 shaqyrym joldy tazartý jumystary júrgizilip, oǵan 130-dan astam arnaıy tehnıka jumyldyrylǵan jáne 900 tonna taıǵaqqa qarsy materıaldar sebilgen.
Jambyl oblysy