Búginde retro ánge aınala bastaǵan «Hat jazyp tur» áni talastyq aqyn Narsha Qashaǵanuly men kompozıtor Áýezhan Salabekovtiń shyǵarmashylyq tandeminen týǵanyn kópshilik bile bermeýi múmkin. Júrektiń qylyn shertetin tamasha týyndy belgili ánshi Asqar Júnisbekovtiń juldyzyn jarqyratqany da málim.
Shamamen 2011 jyly jazylǵan án áli kúnge deıin eskirgen joq. О́ıtkeni esti ánniń eskirmeıtini ekibastan belgili ǵoı. Qysqasy, sózi men sazy úılesken shyǵarmany jurtshylyq áli kúnge deıin otyrystarda oryndaıdy.
Jurtshylyq Asqar Júnisbekovtiń oryndaýynda kópshilikke jetken týyndy tanymal ánshiniń ýysyna qalaı túskenin bile bermeıdi. «Dúngen qyzy» ánin alǵash shyrqaǵan jambyldyq Ǵanı Mátebaev oryndaýǵa tıis bolǵan shyǵarma túptiń túbinde Asqardyń oljasyna aınaldy.
«Bul ánniń maǵan buıyrýynyń óz tarıhy bar. Áýezhan Salabekov aǵamyz 2011 jyly ándi Ǵanı Mátebaevtyń stýdııasynda jazyp ketken eken. Jolym túskende osy týyndyny tyńdap qaldym. Sodan Ǵanıǵa: «Osy ándi maǵan bershi», dep qolqa salǵan bolatynmyn. Dosym shyǵarma ıesimen kelise otyryp, ándi maǵan usyndy. Mahabbat taqyrybyndaǵy tamasha týyndy alǵash oryndalǵan sátten-aq kópshiliktiń kóńilinen shyqty», deıdi ánshi ótken shaqty eske alyp.
«Hat jazyp tur basqa oıdy
jat sana,
Qaıtalap oqyp qalaıyn
bir shattana.
Hat jazyp tur, hat jazyp tur,
Saǵynyshyńdy syıǵyzyp.
Hat jazyp tur, hat jazyp tur,
Qashyqtyqty jeńedi tek
hat qana».
Basqany bylaı qoıǵanda, ánniń osy bir qaıyrmasyn jurt áli kúnge umytqan joq. Tarazǵa saparlap kelgen kezde ánshi Asqar Júnisbekov kompozıtor Áýezhan Salabekovpen án arqyly tanysyp, rýhanı inisine aınalǵanyn aıtqan edi. Sondaı-aq ol tamasha ánniń sózin jazǵan Nákeńmen kezdese almaǵanyna ókinetinin de jetkizgen edi.
Qalaı alyp qarasaq ta, «Hat jazyp tur» áni kópshilik tyńdarmanǵa Asqar Júnisbekov arqyly tanylǵany ras. Án ánshisin tapty degen sóz osyndaıda aıtylsa kerek.
Jambyl oblysy