2016 jyly Brazılııanyń Rıo-de-Janeıro qalasynda ótken Paralımpıada oıyndarynda júzý sportynan Qazaqstan qorjynyna alǵash altyn medal túsirgen Zúlfııa Ǵabıdýllına Saǵadat Nurmaǵanbetov atyndaǵy №10 orta mekteptiń oqýshylarymen júzdesip, sporttaǵy tabysynyń syrymen bólisti.
Oblystyq Polısııa departamentiniń esirtki qylmysyna qarsy is-qımyl basqarmasy qyzmetkerleri uıymdastyrǵan is-sharada dańqty sportshy tabysqa jetý úshin talmaı eńbek etý kerektigin atap ótti. Sondaı-aq ol óz sózinde jastardyń sportpen shuǵyldanýyna memleket tarapynan barlyq jaǵdaı qarastyrylǵanyn sóz etti.
«Sportshy bolǵysy keletin adam salamatty ómir saltyn ustanýy kerek. Adam balasy jastaıynan densaýlyqqa keri áser etetin dúnıelerden alshaq bolǵany jón. Jeńistiń kilti – tynymsyz eńbekte. Oqýshylar bala kezden salamatty ómir saltyn ustanyp, sportpen shuǵyldansa, baǵyndyrmaıtyn bıik bolmaıdy. Qazirgi jastar osyny esten shyǵarmasa eken», deıdi Paralımpıada chempıony kezdesý barysynda.
Is-shara barysynda mektep oqýshylary kókeılerinde júrgen saýaldaryn joldap, sportshy tarapynan mardymdy jaýap aldy. Bilim alýshylar chempıonmen júzdesýde kásibı sportpen shuǵyldanýdyń, rejimdi ustanýdyń qyr-syryna qanyǵyp, aldaǵy ýaqytta ózderi qalaǵan sport seksııasyna jazylyp, elimizdiń kók týyn kókte jelbiretý jolynda aıanyp qalmaıtyndaryn aıtty.
TARAZ