Bul kún mektep bitirýshi ár túlek úshin, ár mektep ujymy úshin saltanatty ári qýanyshty bolyp sanalady. Ata-ana úshin baýyr eti – balapanynyń qanat qaqqan, ustaz úshin mańdaı teri – shákirtiniń úmitine úki taqqan tamasha sáti qandaı ǵanıbet. Al, búkil el úshin – azamatqa úmit artqan tarıhı mezet bul, jas túlektiń ómir baspaldaǵyna joldama beriletin kún. Oblys ákimdigi ǵımaraty aldyndaǵy alańda oblys mektepterin bitirýshi túlekterdiń «Jas túlek-2014» merekelik saltanaty ótkizildi. Júrekteri lúpildep alyp-ushqan túlekterdiń júzderinen qýanysh samaly esedi.
Mektep bitirýshilerdi saltanatty sátpen oblys ákiminiń orynbasary Sara Nurqatova quttyqtap, sóz sóıledi.
– Jas urpaqqa sapaly bilim jáne sanaly tárbıe berýdi Nursultan Nazarbaev eshqashan nazardan tys qaldyrǵan emes. Memleket basshysy «Qazaqstan – 2050: bir maqsat, bir múdde, bir bolashaq» atty bıylǵy Joldaýynda «Jıyrma birinshi ǵasyrdaǵy damyǵan el degenimiz belsendi, bilimdi jáne densaýlyǵy myqty azamattar» ekenin atap kórsetti. Sizderdiń aldaryńyzda tolǵan maqsat, tolǵan tańdaý tur. Sizder táýelsiz elimizdiń erteńi, «Máńgilik Eldiń» azamattarysyzdar. Egemendi elimizdiń týy berik bolýy sizderge baılanysty, – deı kelip Sara Nurqatova oblystaǵy bilim berý salasyndaǵy qol jetken jetistikterdi jiliktep jetkizdi.
Maqsot Qusaıynov atyndaǵy daryndy balalarǵa arnalǵan oblystyq mektep-ınternat (112, 4 ball), qazaq-túrik lıseıi (111,2 ball), oblystyq fızıka-matematıka mektep-ınternaty (109,4 ball) syndy mamandandyrylǵan mektep-ınternattardyń túlekteri bul joly da joǵary nátıjege qol jetkizdi. Aqtóbe qalasy boıynsha ortasha kórsetkish – 88,5 ball boldy. Oblys ortalyǵyndaǵy mektepter arasynda «Symbat» jeke mektebi jáne №51, №32, №21 mektep-gımnazııalary eń joǵary nátıjelerdi baǵyndyrdy. Sondaı-aq, Temir (91,2 ball), Hromtaý (89 ball), Muǵaljar (82,2 ball), Oıyl (80,9 ball) jáne Qarǵaly (80,9 ball) aýdandary respýblıkalyq deńgeıden joǵary kórsetkishterge jetip otyr.
О́tken jyly oblysymyz boıynsha «Altyn belgiden» úmitker túlekterdiń 42,6 paıyzy shyn máninde úzdik ekendikterin dáleldep shyqqan bolsa, bıyl bul kórsetkish 49,7 paıyzdy qurady. «Altyn belgiden» úmitker 320 túlektiń 162-si UBT-da óz bilim deńgeılerin dáleldeı aldy.
Merekelik shara barysynda 162 túlekke «Altyn belgi» attestaty men planshet sertıfıkaty tabys etildi.Ulttyq biryńǵaı testileýde eń joǵary 124 ball jınaǵan Maqsot Qusaıynov atyndaǵy oblystyq daryndy balalarǵa arnalǵan mamandandyrylǵan mektep-ınternatynyń túlegi, úzdik attestat ıegeri Janar Bolatova men «Symbat» jeke mektebiniń túlegi. «Altyn belgi» ıegeri Aıdana Murat oblys ákiminiń orynbasary Sara Nurqatovanyń qolynan avtokólik kiltterin aldy.
Mektep bitirýshiler atynan sóz alǵan Maqsot Qusaıynov atyndaǵy oblystyq daryndy balalarǵa arnalǵan mamandandyrylǵan mektep-ınternatynyń túlegi, «Altyn belgi» ıegeri Dosjan Aıtýǵanov Elbasyna, oblys ákimdigine jastardyń bilim alýyna jan-jaqty jaǵdaı týǵyzyp otyrǵandary úshin alǵys sezimin jetkizdi, búgingi mektep bitirýshilerdiń táýelsiz memleketimizdiń damýyna úles qosatyn azamattar bolyp shyǵatynyna sendirdi.
Satybaldy SÁÝIRBAI,
«Egemen Qazaqstan».
Aqtóbe oblysy.