О́rkendegen óndiristi óńir

Memleket basshysy Shyǵys Qazaqstan oblysynyń áleýmettik-ekonomıkalyq damýyn oń baǵalady

Sport klasteri súısindirdi

Memleket basshysy Nursultan Nazarbaev Shyǵys Qazaqstan oblysyna jumys sapary aıasynda birqatar áleýmettik nysandarda bolyp, óńir jurtshylyǵymen júzdesti. Elbasy О́skemende sońǵy jyly salynǵan aýqymdy sport klasterimen tanysyp, ondaǵy jekpe-jek saraıy, jeńil atletıka maneji jáne ortalyq júzý basseınin aralap kórdi. Shyǵysqazaqstandyqtardyń ıgiligine berilgenine áli bir jyl bola qoımaǵan jekpe-jek saraıynda kúres, boks, dzıýdo, taekvondo jáne karate zaldary bar. Keshende 1114 adam jattyǵa alady. Kórermen zalynyń syıymdylyǵy – 650 oryn. Bıznestiń áleýmettik jaýapkershiligi negizinde salynǵan nysannyń jattyqtyrýshylar quramynda búginde 45 adam eńbek etedi. Al 350 adamǵa arnalǵan jeńil atletıka maneji júgirý, syryqpen jáne bıiktikke sekirý, kópsaıyspen shuǵyldanýǵa múmkindik beretindigimen erekshe­lenedi. Halyqaralyq talaptarǵa saı salynǵan jabyq júzý bas­seı­niniń esigi qazirgi kezde qala turǵyndaryna ashyq. Ortalyq júzý basseıniniń syıymdylyǵy 747 orynǵa eseptelgen. Onda 10 júzý jolaǵy, 2 jáne 5 metrlik tram­plınder, jattyǵý jáne saýyq­tyrý zaly, taǵy basqa sport­­shy­larǵa qajetti jaǵdaılar jasalǵan. – Ekonomıkalyq damýdyń arqasynda biz áleýmettik, onyń ishinde sport salasyndaǵy máselelerdi sheshýge múmkindik aldyq. Búkil elimiz boıynsha sport nysandary qalpyna keltirilip, jańadan sport keshenderi salynýda. Atletterimizdiń nátıjeleri de barlyq baǵyttar boıynsha jaqsaryp keledi. Osynyń bári ult saýlyǵyn nyǵaıtýda mańyzdy mánge ıe bolyp otyr, – dedi Nur­sultan Nazarbaev. Prezıdent óńirdegi sport salasy ardagerlerimen áńgimelesip, oń ózgeristerdi atap ótti. Elbasy sondaı-aq, sport bazasyn keshendi damytý jumystary barysymen jáne óńirdegi bilim, jastar saıa­saty salasynda júzege asyrylyp jatqan jobalarmen  tanys­ty. Prezıdentke ózekti áleý­mettik máselelerdi sheshýge, atap aıtqanda, jetim jáne ata-ana qamqorlyǵynsyz qalǵan balalardy qoldaýǵa arnalǵan «Meıirim» aksııasy, múmkindigi shekteýli balalarǵa kómek kórsetýdi kóz­deıtin «Álemge ashylǵan tereze», orta jáne joǵary oqý oryn­darynyń túlekterin jumysqa orna­lastyrýǵa járdemdesýge ba­ǵyttalǵan jáne mesenattyqqa baı­lanysty túrli jobalar týraly baıandaldy. Qus etin óńdeıdi Sapar barysynda Elbasy О́s­ke­mendegi «Aıtas MP» kásipornynda bolyp, zaýyttyń qus eti ónimderin óńdeý jáne óndirý jumystarymen tanysty. «Aıtas-MP» JShS byltyr tamyz aıynda iske qosylǵan bolatyn. Jobanyń jalpy quny – 1,8 mlrd. teńge. Shujyq ónimderin, delıkatester men jartylaı daıyn ónimder shyǵaratyn kásiporynnyń óndiris kólemi jylyna 6 myń tonnany quraıdy. Shveısarııa, Germanııa jáne Polshanyń jańa tehnologııalarymen jabdyqtalǵan zaýyt óniminiń sapasy joǵary, tutynýshylar arasynda qazirdiń ózinde suranysqa ıe. 100-ge jýyq adam jumyspen qamtylyp otyrǵan zaýyt qyzmetkerleriniń ortasha eńbekaqy kólemi 114 194 teńgeni quraıdy. Kásiporyn jetekshileri 2020 jylǵa qaraı joba qýatyn 12 myń tonnaǵa deıin arttyrýdy kózdep otyr. Nursultan Nazarbaev qus etin óńdeý zaýytynyń óńirdegi iri jáne mańyzdy jobalardyń qatarynda ekenin atap ótti. Zaýyt óniminiń 40 paıyzy eksporttalatynyna kóńili tolatyndyǵyn jetkizdi. Sondaı-aq, zaýytta Memleket basshysyna Shyǵys Qazaqstan oblysynyń agroónerkásip keshe­ninde júzege asyrylyp jatqan jobalar týraly baıandaldy. Júzdesý jyly áser qaldyrdy Memleket basshysy budan keıin óńir aktıvimen, shaǵyn jáne orta bıznes, jurtshylyq ókilderimen kezdesti. Ertistiń sol jaǵalaýynda ornalasqan Shyǵys Qazaqstan oblystyq sáýlet-etnografııalyq jáne tabıǵı-landshaftyq mura­jaı-qoryǵyndaǵy aqshańqan kıiz úıde ótken júzdesýde Nursultan Nazarbaev óz sózin shyǵys óńi­ri­niń áleýmettik-ekonomıkalyq mańyzdylyǵynan bastady. – Shyǵys Qazaqstan oblysy – respýblıkanyń iri óndiristik ortalyǵy. О́ńirde «Qazsınk», Úl­bi metallýrgııa zaýyty, tıtan-magnıı kombınaty jáne taǵy basqa iri kásiporyndar jumys isteıdi. Elimizdegi tıtannyń, mag­nııdiń, atom stansasy otynynyń barlyq kólemi, myryshtyń 90 paıyzy óndiriledi. Atalǵan ónim túrleri boıynsha oblys keńes­tik ýaqytta da jetekshi rólge ıe bolatyn. Údemeli ındýs­trııa­lyq-ınnovasııalyq damý baǵ­darlamasyna oblysta kóńil bólingen. Úlken qarjy ıgerilip jatyr. Sońǵy ýaqytta 200 mıllıard teńgege 37 joba iske qo­syldy. 8,5 myń jumys orny ashyldy. Shyǵys Qazaqstan elimizdegi maıly daqyldardyń tórtten bir bóligin óndiredi, sút pen et óndirýden elimizde birinshi jáne ekinshi oryndy ıelenedi. Sondyqtan oblysqa kóńil bólý – Qazaqstannyń óndirisin órkendetý bolyp sanalady. О́ńirde ǵylym, jańa tehnologııa, áleýmettik sharalar jóninen kóptegen sharýalar jasalyp jatyr. Men búgin oblys ortalyǵynda iske qosylǵan sport keshenderin kórdim. Munyń bári halyqqa jasalyp jatqan jaqsylyq bolyp sanalady, – dedi Memleket basshysy. Prezıdent elimizde shaǵyn jáne orta kásipkerlikke erekshe kóńil bólinip otyrǵanyn, ekonomıkanyń bul bóliginde shyǵarylatyn ónim kólemi eki jarym esege artqanyn atap ótti. – Halyqtyń úshten bir bóliginiń shaǵyn jáne orta kásipkerlikpen aınalysýy óte mańyzdy. Biz qurǵan iri kásiporyndar úlken qarjy men kiris kózi ekeni belgili. Biraq iri ónerkásip kóptegen jumys ornyn qura almaıdy. Alyp ónerkásip oryndary jumysshy sanyn azaıtyp, eńbek ónimdiligin arttyrýǵa kúsh salady. Al shaǵyn jáne orta kásipkerlik 5-10, 50 maman istese de  adamdarǵa jumys beredi. Sondyqtan biz shaǵyn jáne orta kásipkerliktiń damýyna barlyq jaǵdaıdy jasaımyz, – dedi Prezıdent. Elbasy óńirde densaýlyq saqtaý men bilim berý máselesine kóńil aýdarylyp otyrǵandyǵyn, oǵan dálel retinde oblys tur­ǵyn­darynyń ómir súrý uzaqtyǵy 70 jasqa deıin jetip, bala týý kórsetkishiniń 41 paıyzǵa artqanyn atap ótti. Memleket basshysynyń aıtýynsha, bul – adamdardyń ómir súrý deńgeıi jaqsarǵanyn bildiredi. Nursultan Nazarbaev sońǵy ýaqytta bıznes qarjysy esebinen boı kótergen medısınalyq orta­lyq, jekpe-jek saraıy, hokkeı ortalyǵy, jeńil atletıka ma­neji, ortalyq basseın syndy nysandardyń barlyǵy tur­ǵyn­dardyń densaýlyǵyna qyzmet etetinin erekshe atady. Árıne, О́skemende ekologııa máselesi bar. Men bul máseleni únemi nazarda ustap otyramyn. «Qazsınk» jáne «Qazaqmys» kompanııalary ekologııanyń ońalýy jolynda birqatar sharýa atqarýda, – dedi Elbasy. Memleket basshysy О́ske­mende ýran keni óńdeletinin, Re­seımen áriptestik sheńberinde eksportqa shyǵarý josparlanyp otyrǵanyn aıta kelip, Eýrazııalyq ekonomıkalyq odaq sheńberinde Shyǵys Qazaqstan kásiporyndaryna kórshi eldiń naryqtyq keńistigine shyǵýǵa jaqsy múmkindik týyp, kedendik alymdar men kedergilersiz saýda-sattyq jasaýǵa, básekelestikke túsýge bolatyndyǵyn jetkizdi. – Bul rette ónimderimiz báse­kege qabiletti bola ma degen saýalǵa jaýap tabylady. Men oblysta jaǵymdy alǵa jyljý bar dep esepteımin. Halyqtyń ómir súrý deńgeıi ósip, ekonomıkasy damýda. Áleýmettik jumystarǵa jetkilikti nazar aýdarylady. Degenmen, alda áli de jumys kóp. Men jaqynda aıttym, biz taǵy da bızneske, ınvestorlarǵa erkin jaǵdaı jasadyq.  Jahandyq ekonomıkanyń ahýalynda qul­dyraý úderisi baıqalady. Álemdik jáne eýropalyq ınvestısııalyq  resýrstar jabylyp jatyr. Mundaı jaǵdaıda biz ishki qarjy esebinen ishki suranysty arttyryp, ekonomıkany kóterýimiz, jumys ornyn usynýymyz qajet. Memlekettiń oǵan múmkindigi bar. Osyǵan baılanysty ekonomıkaǵa 1 trıllıon teńge bólindi. Atalǵan qarjy shaǵyn jáne orta kásipkerlikti damytý, turǵyn úı qurylysy, ındýstrııalyq-ınnovasııalyq nysandar qurýdy odan ári jalǵastyrý jáne ekonomıkanyń basqa da sektoryna arnalatyn bolady, – dedi Elbasy. Osydan keıin Elbasyǵa óńir basshysy Berdibek Saparbaev oblystyń áleýmettik-ekono­mıkalyq damýy jóninde baıandady. – Asa qadirli Elbasy Nur­sultan Ábishuly! Sizdiń: «Qandaı qıyn­shylyqtar bolsa da ekonomıkanyń damý qarqyny ótken jyldan tómen­demeýi tıis, halyqtyń turmysy, ál-aýqaty jaqsarýy kerek», degen tapsyrmańyz búginde tolyǵymen oryndalýda. Byltyr ishki jalpy ónim 2 trıllıon teńgeden asty. Negizgi áleýmettik-ekonomıkalyq kórsetkishter ótken jylǵy kórsetkishter men respýblıkalyq kórsetkishterden tómen emes. О́ndiris ónimderine suranystyń tómendeýi, baǵanyń qulaýyna qaramastan ónerkásip salasynda turaqty ahýal baıqalady, – dedi oblys ákimi. О́ńir basshysynyń aıtýynsha, ónerkásip óniminiń ósimi 8 paıyzdy qurap, 53 mıllıard teńgege aýyl sharýashylyǵy ónimderi óndirildi. 100 mlrd. teńgege jýyq ınvestısııa tartyldy. Qurylys jumystarynyń kólemi ótken jylmen salystyrǵanda 22 paıyzǵa kóbeıip, 117 myń sharshy metr turǵyn úı paıdalanýǵa berildi. Memleket basshysynyń negizgi azyq-túlik túrlerine baǵanyń negizsiz ósimin boldyrmaý tapsyrmasy oryndaldy. «Qazsınk», «Qazaqmys» syndy kásiporyndar Qazaqstanǵa syrttan tasymaldanatyn taýarlardy óndirýmen aınalysatyn usaq kásipkerlerge aıtarlyqtaı qoldaý kórsetip otyr. Búginde olar óńir men elimizdiń basqa da aımaqtaryndaǵy kásipkerlermen 800-ge jýyq kelisimshart jasasty. «Jumyspen qamtýdyń jol kartasy-2020» baǵdarlamasy arqyly úsh jyldyń ishinde 37 mlrd. teńge bólindi. Onyń ishinde aǵymdaǵy jyly 9,70 mlrd. teńge bólindi. Úsh jylda 40 myńǵa jýyq jańa ju­mys orny ashylsa, bıyl 7 myń jumys orny ashylmaq. Ásirese, shaǵyn nesıe uıymdary aýyldaǵy kásip­ker­likti damytýǵa sebin tıgizip otyr. Shyǵys Qazaqstan shekaralyq óńir bolyp sanalady. Elbasy tapsyrmasyna sáıkes, oblys Reseı Federasııasynyń sýbektilerimen, Belorýssııanyń Mogılev oblysymen ıntegrasııalyq áriptestikti jolǵa qoıdy. Keden odaǵynyń  qu­rylýy arqyly taýar aınalymy ótken jyly 4,10 paıyzǵa ar­typ, Reseı men Belorýssııa ara­syndaǵy taýar aınalymy 1 mlrd. dollarǵa jýyq qarjyny qura­dy. Bul kórsetkish aǵymdaǵy jyl­dyń tórt aıynda 400 mln. dollarǵa jýyqtady. «Qoljetimdi turǵyn úı-2020» baǵdarlamasy boıynsha jyl saıyn 290-300 myń sharshy metr turǵyn úı paıdalanýǵa berilse, bıyl bes aıdyń ishinde 113 myń sharshy metr turǵyn úı berildi. Bul rette memlekettik qarjy kózderinen bólek kásiporyndardyń múmkindigi de paıdalanylýda. Monoqalalardy damytý baǵdarlamasy boıynsha 4 joba engizilip, 3,5 mlrd. teń­gege jýyq qarjy bólindi. Bul mono­qalalar ekonomıkasyn jekelegen kásiporyndarǵa táýeldilikten qutqaratyn bolady. Jahandyq naryqtaǵy ózge­ris­terdiń óńir ekonomıkasyna tıgiz­gen keri áserin joıý úshin qosymsha ekonomıkalyq ósimdi arttyrý kózderi qarastyrylýda. Bul rette jumysy toqtap qalǵan nemese tolyq qýatynda jumysyn júrgizbeı otyrǵan kásiporyndar men ıntegrasııalyq tetikterdi iske qosý, «Aqtoǵaı» taý-ken baıy­tý kombınaty men «Azııa Avto» AQ jańa zaýytyn salý joba­lary kózdelgen. Sondaı-aq, aýyl sharýa­shylyǵyndaǵy bos jer­ler­di ıgerý qolǵa alyndy. Tórt jylda júr­gi­zilgen túgendeý jumys­tary­nyń nátı­jesinde egistik alqaptary jylyna 60-70 myń gektarǵa artyp keledi. Baıandamany den qoıa tyńdaǵan Elbasy oblysta oń ister atqarylyp jatqanyn atap ótip, dese de taý-ken salasyndaǵy tústi metaldar qoryn ıgerýdiń baıaý júrgizilip jatqanyna nazar aýdardy. «Qazsınk» JShS prezıdenti Nıkola Popovıch, «Qazaqmys» korporasııasy» JShS basqarma tóraǵasy Edýard Ogaı, «Úlbi metal­lýrgııalyq zaýyty» AQ basqarma tóraǵasy Iýrıı Shahvorostov El­basyǵa tústi metall óndirý sala­syndaǵy jaǵdaıdy baıandady. «Qazaqmys» basshysynyń aıtýynsha, kásiporyn búginde iri ken baıytý kombınatynyń qurylysyn júrgizýde. О́nimdiligi 30 mln. tonnaǵa jetetin kombınattyń ón­diris kólemi jylyna 100 myń tonnany quraıtyn bolady. Inves­tı­sııa kólemi 1 mlrd. 700 mln. teń­ge. Ken ornynda 2,5 myńǵa jýyq jumys orny qurylady. Jobanyń birinshi kezegi 2015 jyly iske qosylmaq. Úlbi metallýrgııa zaýytynyń jetekshisi Iýrıı Shahvorostovtyń aıtýynsha, ýrannyń shıkizat qoryna qatysty eshqandaı prob­lema joq, alaıda otyn tabletkalaryn ótkizýde qıyndyqtar týyndap otyr. – Búginde biz ónimderimizdi Qy­taıǵa shyǵaramyz. Ol jaqta fransýzdyq kompanııamen kelisim jasalǵan. Biraq bul jobalar asa belsendi iske asyp jatqan joq. Qazir ýrandy konversııalaý boıynsha kanadalyq kompanııamen jumys isteýdemiz. Japonııada bolǵan apattan keıin álemdegi birqatar atom stansalary jumysyn toqtatyp, ýranǵa degen suranys kúrt azaıdy. Sonyń saldarynan ýran baǵasy eki esege arzandap ketti. Munyń bári josparlaǵan jobalardy júzege asyrýǵa salqynyn tıgizbeı qoımaıdy, – degen Iýrıı Shahvorostov búginde óskemendik zaýyt tantal shıkizatynyń tapshy­lyǵyn bastan keshirip otyrǵanyn da jasyrǵan joq. – Iаdrolyq energetıka damı beredi. Biz de ıadrolyq áleýetti paıdalanamyz. Japonııa, Eýropa elderi de oǵan oralady. Sondyqtan bul tarapta jumys isteýge árqashan daıyn bolýymyz kerek, – dedi Elbasy. Taý-ken salasyn damytýdyń taǵy bir kózi – bıyldan bastap geo­logııalyq barlaýǵa bólingen qarjy eki ese kóbeıdi. Onyń 2 mlrd. teńgesin memleket, 3 mlrd. teńgeni «Qazsınk» bólip otyr. Memleket basshysy barlaý jumystaryn jiti júrgizýdi tapsyrdy. Elbasyna óńirdegi Indýs­trııa­landyrý kartasy aıasynda atqa­rylǵan jumystar jóninde obly­s ákiminiń birinshi orynbasary Ermek Kósherbaev málimdedi. Búgingi tańda Indýstrııalandyrý kartasy aıasyndaǵy 37 jobanyń 21-i elýden júz paıyzǵa deıin qýatynda jumys istese, 10-y elý paıyzǵa deıin, 4-eýi ótken jyldyń sońynda engi­zilgendikten ónim óndirýdi josparlamaǵan eken. – Kez kelgen jobany bastamas buryn onyń tıimdiligin, suranysqa saı keletinin anyqtap alǵan durys. Qoldanysqa engiziletin nysandar tolyq jumys isteýi, óndiretin taýarlaryna suranys bolýy tıis. Áıtpese, qyrýar qarajat jum­salǵan jobalardyń tolyq qýatpen jumys istemeı tursa eshqandaı paıdasy joq. Osy jaǵyn este ustaý kerek, – degen Memleket bas­­shysy Nursultan Nazarbaev aýdan­darda «QazAgro» ulttyq basqa­­rýshy holdıngi arqyly nesıe alyp, aýylsharýashylyq ónim­deri­niń kólemin ulǵaıtý, memleket tarapynan jasalyp otyrǵan jeńil­dikterdi tıimdi paıdalaný qajet­tigin eskertti. Áleýmettik sala ahýaly Elbasy áleýmettik salanyń da ahýalyn surady. «Apatty» atalyp ketken, ıaǵnı, búgingi kúnniń talabyna saı emes óńir mektepteriniń jaǵdaıy týraly Prezıdentke oblys ákiminiń orynbasary Jaq­sy­lyq Omar aqparat berdi. Ol tıisti oryndarmen júrgizilgen tekse­rýler nátıjesinde aımaqtaǵy mektepterdiń arasynda qazirgi ýaqyt talabyna saı kelmeıtinderi anyq­talǵanyn, olardyń ornyna jańadan ǵımarattar salynyp jat­qanyn, bıylǵy UBT-da shyǵys­qazaqstandyq túlekterdiń jınaǵan ortasha baly 78-di quraǵanyn, bul – respýblıkada segizinshi kórsetkish ekenin jetkizdi. Memleket basshysy bilim berý nysandarynyń bilim berý baǵy­tynda qoldanylýy qajettigin atap aıtty. Kezdesýge qatysýshylar arasynda D.Serikbaev atyndaǵy ShQMTÝ-dyń professory Lılııa Stolıarova Elbasyna shyǵysqa kel­gen ár saparynyń óńir turǵyn­dary úshin qýanysh syılaıtynyn aıta kele, «Qazaqstan-2050» Stra­te­gııa­synyń mańyzdylyǵyna toqtaldy. – Qurmetti Elbasy, Siz­diń «Qazaqstan-2050» strate­gııa­lyq baǵdarlamańyzdy shyǵys­qa­zaq­standyqtardyń 96 paıyzy qoldaıdy jáne qol­dap qana qoımaı ony júzege asy­rýǵa qoldarynan kelgenshe úlesterin qosýda. 1992 jyly Qazaqstan halqynyń 1 forýmynda sóılegen kezde men: «Bizdiń Prezıdentimiz metallýrg, erekshe qorytpanyń qupııasyn biledi. Ol qorytpanyń ataýy – «Qazaqstan halqy». Búgin bul endi qupııa emes, naqty belgilengen, bolashaǵy aıqyndalǵan «Damýdyń qazaqstandyq joly» atty baǵdar­lama. Búkil jaћan jurty qazir osy baǵdarlamaǵa qyzyǵa qaraıdy. Sizdiń Qazaqstanda ǵana emes búkil álemde beıbitshilik pen tu­raqtylyqty saqtaýǵa úndegen, tatýlyq pen kelisimdi nasıhattaǵan parasatty bastamalaryńyzdy álem elderi qyzý qoldap otyr. Bul rette Sizdiń ıadrolyq qarýdan bas tartqan mańyzdy sheshimińiz barshaǵa úlgi, – dedi professor. Lılııa Stolıarova, sondaı-aq Elbasynyń bastamasymen Eýra­zııalyq ekonomıkalyq odaq­tyń qurylýy da tarıhı oqıǵa ekenin jetkizdi. Etnoaýyldyń tórinde orna­las­qan aqshańqan kıiz úıdegi alqaly jıynnyń sońynda Memleket basshysy Nursultan Nazarbaev táýelsizdik alǵan jyldardan bergi elimizde júzege asyrylǵan strategııalyq baǵdarlamalardyń jemisi, osy ýaqyt ishinde qol jet­kizgen jetistikter, syrttan quıyl­ǵan sheteldik ınvestısııalar jáne basqa da tolaǵaı tabystar týraly aıta kele endigi alda turǵan úlken mindet – damyǵan 30 eldiń qataryna ený ekenin naqtylady. – Qazir Eýropa elderinde ınvestısııa kózderi azaıdy. Tústi metalǵa degen suranys ta artyp turǵan joq. Bizge tabıǵı baı­lyq­tarymyzǵa ıek artyp, arqany keńge salýǵa bolmaıdy. Bizge ındýstrııalandyrý baǵdarlamasyn júzege asyrýda shıraqtyq tany­týymyz kerek. Bul – ońaı baǵ­dar­lama emes. Dese de elimizdiń bolashaǵy men turaqty, jedel damýy úshin osy baǵyttan taımaýy­myz kerek. Indýstrııalandyrý zaýyt salýmen shektelmeıdi, ol zaýyttyń ónimi zaman talabyna jaýap beretindeı, joǵary su­ranysqa saı bolýy tıis. Biz ındýs­trııalandyrýdyń alǵashqy bes­jyldyǵyn sátti aıaqtadyq, endi ke­zekte ınnovasııaǵa negizdelgen ekinshi besjyldyq tur. Osy oraıda Qazaqstannyń álem elderi aldyndaǵy bedeliniń arqasynda Dúnıejúzilik bank bizge qomaqty qarajat bólýge kelisti. Sol sııaq­ty Eýropalyq bank, Islam banki, Azııalyq bank syndy alpaýyt qarjy ınstıtýttarynyń bar­lyǵy qarajat bólýge daıyn. Bul qara­jat aldymen ındýstrııa­lan­dyrý baǵdarlamasyn júzege asy­rýǵa, sodan keıin shaǵyn já­ne orta kásipkerlikti qoldaýǵa ba­ǵyt­­talady, – dedi Memleket bas­shysy. Prezıdent jahandyq eko­no­mı­kanyń sharyqtaýy men quldyraý kezeńderinde turaqtylyqty saq­tap turý úshin ulttyq qor qurylǵanyn, qa­zir onda 100 mlrd. dollar kó­le­­min­de qarajat jınalǵanyn jet­kiz­di. Memleket basshysy Shyǵys Qa­zaq­standa jaqsy ǵylymı-aǵar­týshylyq baza bar ekenin, biraq onyń naqty sektormen ózara is-qımylyn kúsheıtý kerektigin atap ótti. Bul rette óndiris oryn­darynyń dýaldy oqytý baǵdar­la­ma­syn kúsheıtý qajettigin atap ótti. – Ǵylym eńbek ónimdiligin arttyrýǵa qyzmet etýge tıis, ın­no­vasııanyń máni de osynda jatyr. Jańa tehnologııalar álemde qarqyndy túrde engizilýde, biz de qalyspaýǵa tıispiz, – degen Pre­zıdent Nursultan Nazarbaev elimizde barlyq negizgi áleýmettik-ekonomıkalyq salalarda – bıznes júrgizýde, aýyl sharýashylyǵy óndirisin uıymdastyrýda, turǵyn úı qurylysynda, oqýda, medısınada, mádenıette teńdessiz sharttar usynylyp otyrǵandyǵyn atap ótti. Tek turǵyndar tarapynan basta­mashylyq qajet, ol úshin tıimdi túsindirý jumystaryn júr­giz­gen jón. Elbasy oblys ortalyqtarynda medısınanyń áleýeti kúsheıgenin, jylyna 15 myń júrek naýqasyna ashyq ota jasalatynyn, transplantasııa qyzmetiniń damyǵanyn atap ótti. Sondaı-aq, elimizde ótip jatqan iri sharalardyń bar­lyǵy qazaqstandyqtardyń táýel­sizdik jyldary qol jetkizgen tole­rant­tylyǵynyń, elimizde qalyptasqan turaqty saıası-ekonomıkalyq damýdyń nátıjesi ekenin jetkizgen Mem­leket basshysy oblystyń tabys­ty damyp kele jatqanyn, osy qarqyndy áli de údete túsý qajet­tigin atap kórsetti. – Búginde jumys isteýge, ál-aýqa­tymyzdy arttyrýǵa barlyq jaǵdaı bar. Tek talmaı, tynbaı eńbek etý kerek, – dedi Nursultan Nazar­baev. Elbasy jıyn sońynda barlyq memlekettik qyzmetshilerdi kásibı merekelerimen quttyqtap, el ıgiligine eńbek etýge shaqyrdy. Dýman ANASh, «Egemen Qazaqstan». Shyǵys Qazaqstan oblysy. Sýretterdi túsirgender S.BONDARENKO, B.OTARBAEV.