Germanııa men Fransııa shırek fınalda kezdesedi

Keshegi tún men búgingi tań aldynda aıaqtalǵan Argentına – Shveısarııa, Belgııa – AQSh quramalary arasyndaǵy 1/8 fınaldyq oıyndar Brazılııada ótip jatqan álem chempıonatynyń kelesi kezeńine ótken ujymdardy tolyq anyqtap berdi. Al munyń aldyndaǵy túni Fransııa fýtbolshylary Nıgerııa «qyrandaryn» 2:0 etip utsa, tań saz bere Germanııa jasaǵy Aljır jamaǵatyn qosymsha ýaqytta 2:1 esebimen tize búktirip,  myqty segizdiktiń qataryn túgeldeı túsken edi. Birden aıtyp qoıaıyq, biz búgin sóz etkeli otyrǵan juptarda jeńimpaz atanǵan Fransııa jáne Germanııa quramalary úshin atalmysh matchtardaǵy jeńister onshalyqty ońaıǵa soqpady. Jeńilgen jaqtardyń ózderi kezdesýlerdiń basym bóliginde keıin sáttilikti serik etken qarsylastarynan tym tómen bola qoıǵan joq. Aıtalyq, Nıgerııa komandasy, tipti, kóbine-kóp dopqa ıelik etip, terrıtorııalyq basymdyq aldy. Biraq olardyń qaqpa aldynda qaýip týdyrýlary kemshindeý boldy. Olarǵa qaraǵanda, fransýzdar jaǵy ótkirleý joryqtar jasap turdy. Degenmen, mundaǵy áreketteri jattandy kóringen soń, qarsylastary udaıy shabýyldarynyń aldyn orap otyrdy. Osydan keıin Dıde Desham taktıkalyq shemany ózgertti. Bul úshin Karım Benzemany shabýyldyń ótkir shebine shyǵaryp, Antýan Grızmandy sol qanatqa qoıdy. Oıynnyń qyzyp sala berýine osy ózgeris qatty áser etti. Fransııa quramasynyń joryqtary endi óktem de ótkir bola tústi. Buǵan qosa is-qımyldyń jumbaqtyǵy qarsy alań betinde naǵyz dúrbeleń týǵyzdy. Sonyń saldarynan Pol Pogba 79-mınýtta esep ashty. Al kelesi gol oıyn aıaqtalyp qalǵan shamada, 92-mınýtta soǵyldy. Ony nıgerııalyq Djozef Iobo óz qaqpasyna túsirip aldy. Budan keıin alańǵa Germanııa jáne Aljır quramalary shyqty. Kezdesýdiń negizgi ýaqyty 0:0 degen teń nátıje ákeldi. Munda da «nemis mashınasynyń» pálendeı artyqshylyǵy baıqalmady. Buǵan Aljır fýtbolshylarynyń qorǵanysta óte muqııat oınap qoıa salmaı, oqta-tekte qarsylastar qaqpasyna qarsy shabýyl jasap turýy da dálel. Osy rette afrıkalyqtar birneshe ret gol soǵatyn múmkindikterdi jiberip aldy. Nemister qosymsha oıynnyń basynda-aq gol salyp, birden alǵa shyqty. Aldymen sol qaptaldan Tomas Mıýller sýyrylyp ótti. Budan ári ol dopty Raıs Mbolı qaqpasy alańyna kólbeýlete jóneltti. Oǵan ózgelerden buryn jetken Andre Shıýrrle 93-mınýtta kóz ilespes jyldamdyqpen qımyldap, dopty qaqpanyń oń jaq qaptalyna ókshesimen sart etkizdi. Esep – 1:0. Overtaımnyń sońynda talas tipti qyza tústi. Sol dúrbeleńde Germanııa quramasy birneshe ret gol soǵyp kete jazdady. «Býndestım» sonyń birin ǵana 120-mınýtta golǵa aınaldyrdy. Ony Mesýt О́zıl saldy. Biraq sonyń artynsha, 121-mınýtta aljırlikter bir doptyń qarym­tasyn qaıtaryp úlgerdi. Is­lam Slımanıdiń pasynan keıin Ábdel­mýmen Djabý sońǵy núkteni qoı­dy. Match osylaısha 2:1 bolyp bitti. Endi 4 shilde kúni Fransııa men Germanııa shırek fınalda kúsh synasady. Rýslan IGILIK. P.S. Nómirge qol qoıylyp jatqanda Argentına jáne Shveısarııa quramalary ara­syndaǵy oıynnyń nátı­­­jesi belgili boldy. Qarsy­las­ta­ry­men negizgi ýaqytta 0:0 esebimen teń oınaǵan argen­­­tı­nalyqtar overtaımnyń sońyn­da Anhel dı Marııa soqqan gol arqyly jeńiske jetti.