Ortalyq kommýnıkasııalar qyzmetinde ótken kezekti brıfıng Astana kúnine arnalǵan merekelik mádenı sharalardyń biri – halyqaralyq teatr festıvaliniń bastalǵanyna qatysty boldy. Bul jóninde Q.Qýanyshbaev atyndaǵy Qazaq mýzykalyq drama teatrynyń kórkemdik jetekshisi Bolat Uzaqov, teatrtanýshy Amangeldi Muqanov jáne armenııalyq teatr jáne kıno rejısseri Egıshe Gevorkıan aıtyp berdi.
Bolat Uzaqovtyń habardar etkenindeı, «Sahnadan sálem» atty halyqaralyq teatr festıvali 1 shilde kúni osymen ekinshi ret óziniń shymyldyǵyn ashqan. «Bıylǵy festıvaldiń bir ereksheligi festıvaldi halyqaralyq deńgeıge kóterý maqsatynda oǵan shetelderden de teatr ujymdarynyń qatysyp jatqandyǵy, – dedi ol osy jóninde. – Sondaı-aq, osy mádenı sharaǵa sheteldik teatr synshylary men sarapshylary da shaqyryldy. Ondaǵy eń basty maqsat festıvaldiń aıasyn jyldan-jylǵa keńeıtý bolyp tabylady».
Al festıvalǵa 13 teatr qatysady eken. Onyń ekeýi shetelden, ıaǵnı Túrkııa men Reseıdiń Daǵystan respýblıkasynan kelip otyr. Bolat Uzaqovtyń atap ótýinshe, festıvalǵa, sondaı-aq, Astana qalasynan tórt teatr qatysady. Sonyń biri – qýyrshaq teatry. Qalǵandary elimizdiń oblystarynan kelmek. Astanalyqtar men elorda meımandary 1-6 shilde aralyǵynda sheteldik jáne qazaqstandyq teatr ujymdarynyń qoıǵan spektaklderin tamashalaıtyn bolady. Qýyrshaq teatrlarynyń qoıylymdary saǵat 11.00-de, al drama teatrlarynyń spektaklderi saǵat 16.00-de jáne 19.00-de bastalady. Teatr festıvaliniń jabylýy 6 shildege josparlanypty.
«Elimizde 60-tan astam teatr bar. Sol teatrlardyń halyqaralyq, respýblıkalyq jáne aımaqtyq deńgeıdegi festıvalderi jıi ótip turady, – dedi kelesi kezekte sóz alǵan teatrtanýshy Amangeldi Muqanov. – Al bıyl ekinshi márte shymyldyǵyn ashqan «Sahnadan sálem» festıvaliniń orny erekshe bólek bolady ǵoı degen oıdamyz. Osyndaı sharalar bizdiń teatrlar úshin azdyq etpeıdi. Sebebi, festıval tyń óner týyndylaryn kórermender nazaryna usyný, kásibı mamandar arasynda pikir alysyp, tájirıbe almasý fýnksııasyn atqarady».
Amangeldi Muqanov festıvaldiń halyqaralyq deńgeıdegi mańyzdylyǵyna da toqtalyp ótti. Onyń aıtýynsha, spektaklderdi teledıdardan kórý bir basqa, teatrǵa baryp tamashalaý múlde bólek. О́ıtkeni, erekshe áser alasyz, demalyp qaıtasyz. Ekinshi jaǵynan, osyndaı festıvaldar arqyly elimizdiń akterlary men rejısserlary sheteldik teatr ujymdarymen ózara pikir almasa otyryp, tájirıbe jınaqtaıdy. Birinen biri úırenedi.
Al armenııalyq rejısser Egıshe Gevorkıan Qazaqstannyń jańa astanasynda ótip otyrǵan halyqaralyq teatr festıvaliniń bolashaǵy zor ekenine toqtaldy. «Men Astana qalasy qazirdiń ózinde úlken óner ordasyna aınalǵanyna kýá bolyp otyrmyn, – dedi ol. – Qalada asa aýqymdy bes-alty óner shańyraqtary jańadan salynypty. Qyzyqtyrdy, qaıran qaldyrdy. Al mundaı festıvaldar sheteldik teatr ujymdarynyń qazaqstandyq áriptesterimen qarym-qatynas jasaýyna tikeleı yqpal etedi. «Sahnadan sálemniń» halyqaralyq deńgeıge kóteriletinine senimdimin».
Álısultan QULANBAI,
«Egemen Qazaqstan».