Qaı kóliktiń bolsa da adamǵa ákeler apaty az emes. Osy kólikterdi paıdalaný úshin onyń aınalasynda júrgen jolaýshylarǵa tıgizer keleńsizdigi de jetip artylady. Ásirese, temirjol, áýe kólikterinde oryn alatyn qaýipterdiń aldyn alý óte mańyzdy ekeni túsinikti. Al bul oraıda adamdardyń qaýipsizdigin qamtamasyz etetin, túrli keleńsizdikterden qorǵaıtyn kóliktegi ishki ister departamentiniń qyzmeti aıryqsha baǵalanatyny anyq. Sondyqtan, bul atalǵan kólikterde júrý qaýipsiz bolsyn desek, onda oryn alyp otyrǵan kemshilikterdi de joıýǵa der kezinde nazar aýdarǵan jón, deıdi olar.
Bul ózekti máselege Kóliktegi IID janyndaǵy qoǵamdyq keńes únemi kóńil bólip keledi. Qoǵamdyq keńestiń tóraǵasy, Parlament Májilisiniń depýtaty Serik Ospanov adamdardyń qaýipsizdigin saqtaý máselesine qashanda muqııat qaraǵan jón deıdi. Al Kóliktegi IID bastyǵy, polısııa polkovnıgi Berik Bısenqulov: «Qoǵamdyq keńes qurylǵannan bergi ýaqytta óziniń tıimdiligin dáleldedi. Eń bastysy, polıseıler men azamattar arasyndaǵy baılanysty nyǵaıtýǵa úles qosty», – dep aǵynan jarylady. Sondaı-aq, Berik Baıboluly Prezıdent N.Nazarbaevtyń Qazaqstan halqyna arnaǵan Joldaýyndaǵy basty mindettermen Elbasynyń ishki ister organdary salasy qyzmetkerleriniń aldyna qoıǵan tapsyrmalarynyń oryndalýy, eń aldymen, adamdardyń qaýipsizdiginen bastaý alatynyn aıtady.
Bul oraıda, departament bastyǵynyń orynbasary, polısııa polkovnıgi Janatbek Eshimov atap ótkendeı, temirjol jáne áýe kóligi nysandaryna qatysty birqatar problemalyq máseleler bar ekenin jasyrýǵa áste bolmaıdy. О́ıtkeni, elimizdiń temirjol vokzaldary men áýejaılarynda arnaıy jáne quqyq qorǵaý organdary júrgizgen tájirıbeler azamattardy lańkestik áreketterden qorǵaý sharalaryn áli de bolsa kúsheıtý qajettigin dáleldep otyr.
Máselen, Astana, Almaty, Aqtaý, Atyraý, Aqtóbe, Qaraǵandy qalalaryndaǵy áýejaılarda ornatylǵan beıne-baqylaý kameralary tıisti talaptarǵa saı ornalastyrylǵanymen, Balqash, Petropavl, Semeı, Kókshetaý qalalaryndaǵy áýejaılar beıne-baqylaý júıelerimen tolyqtaı jabdyqtalmaǵan. Olardyń qaýip tóndiretin aýmaqtardy sholý múmkindigi shekteýli. Sol sııaqty jańadan salynyp jatqan temirjol aýmaqtarynda kólik polıseılerin ornalastyrý máselelerin sheshý isi ózekti bolyp otyr. Mundaı aýmaqtarda jelilik polısııa bólinisteriniń qyzmetkerleri úshin arnaıy qyzmettik bólmeler qarastyrylmaǵan.
Aıtalyq, júkterdi saqtaýdy qamtamasyz etý, jeke múlikterdi urlaýdyń aldyn alý jáne qoǵamdyq qaýipsizdikti qorǵaý maqsatynda Altynkól stansasynda quramynda 25 qyzmetker bar jelilik polısııa bólimi quryldy. О́kinishke oraı, Altynkól stansasyndaǵy temirjol vokzalyndaǵy jelilik polısııa bólimine kólemi 12 sharshy metr ǵana bolatyn bólme berilgen. Bul oryn qyzmetkerlerdi ornalastyrýǵa jetkiliksiz. Osyndaı olqylyqtardyń aldyn alý maqsatynda qurylysy júrgizilip jatqan «О́zen –Bolashaq, Jezqazǵan – Sekseýil – Shalqar – Beıneý» temirjoly boıyndaǵy stansalarǵa kóliktegi ishki ister organdarynyń jumysyn uıymdastyrý úshin qyzmettik oryn men polıseılerge baspana berý máselesin de qarastyrý qajet kórinedi.
Bul oraıda qoǵamdyq keńes qyzmetiniń maqsaty – qoǵamdyq tártipti saqtaý tıimdiligin arttyrý jáne qoǵamdyq qaýipsizdikti qamtamasyz etý, quqyq buzýshylyqtyń aldyn alý, Kóliktegi IID-niń úkimettik emes uıymdarmen jáne halyqpen ózara qarym-qatynasyn odan ári jetildirý, quqyq qorǵaý qyzmeti salasynda qoǵamdyq qatynastardy demokratııalandyrý arqyly aýqymdy isterdi júzege asyrýǵa dem beretindigin esten shyǵarmaǵan jón. О́ıtkeni, atalǵan kólik nysandaryndaǵy kemshilikterdi joıý – qaýipsizdik kepili.
Aleksandr TASBOLATOV,
«Egemen Qazaqstan».