Osydan 2 jyl buryn ǵana Syr boıynda Ekinshi dúnıejúzilik soǵys soqpaǵyn basqan 11 ardager bar edi. Keýdesindegi orden-medaldary jarqyrap, qatar basyp bara jatatyn sol qaharmandardyń qatary búginde sırep qaldy. Keshegi merekede oblys ortalyǵynda, Qazaly, Syrdarııa jáne Shıeli aýdandarynda turatyn 6 maıdangerge 1 mln 500 myń teńgeden birjolǵy áleýmettik kómek berildi. Osy alty maıdangerdiń arasynda eki qart bıyl júz jastyń júzin kórip otyr.
Osyǵan oraı oblys ákimi Nurlybek Nálibaev Shıeli aýdanynda turatyn ardager Sársenbek Baıjanovtyń shańyraǵyna baryp, aqsaqaldy ǵasyrlyq mereıtoıymen quttyqtap, Syr jurtshylyǵy atynan avtokólik kiltin tabystady. Ǵasyr jasaǵan maıdanger Sársenbek Baıjanuly ózine kórsetilgen syı-qurmetke alǵysyn aıtyp, batasyn berdi.
Shıeli aýdanynda 1923 jyly dúnıege kelgen Sársenbek Baıjanov – 1942 jyly Stalıngrad shaıqasyna qatysqan jaýynger. Elge oralǵannan keıin Túrkistan pedagogıkalyq ýchılıshesinde oqyp, 38 jasynda muǵalim mamandyǵyn alyp shyǵady. Zeınetkerlikke shyqqanǵa deıin Shıeli aýdanyndaǵy №156 qazaq orta mektebinde jarty ǵasyr ǵumyryn jas urpaqtyń bilimi men tárbıesine arnady.
Al Qazaly aýdanynan maıdanǵa attanǵan Qabaq Smaǵul 1942 jyly 19 jasynda Týla qalasyn azat etýge qatysqan. Shaıqasta kórsetken erligi úshin «Qyzyl Juldyz», II dárejeli «Otan soǵysy» ordenderimen marapattalǵan ol elge oralǵannan keıin esep salasynda 40 jyl eńbek etti. Qart sarbazdyń 100 jasqa tolýyna baılanysty uıymdastyrylǵan is-sharada maıdanger aýyldastaryn bastap, qandy qyrǵynnan oralmaǵan qarýlastarynyń rýhyna taǵzym etti. «Ǵasyr jasaǵan maıdanger» atty jıynda jaýyngerler eskertkishine gúl shoqtaryn qoıǵan maıdanger elden soǵysqa attanǵan 300-deı azamattyń jartysy urys dalasyn máńgi meken etip qalyp qoıǵanyn aıtty.
Aýdan ákimi Muhtar Orazbaev maıdangerge «Qazaly aýdanynyń qurmetti azamaty» ataǵyn tabystap, ıyǵyna shapan japty. Is-sharada «Tamyry tereń báıterek» atty kitaptyń tusaýy kesilip, jınalǵan qaýym aqyndar aıtysyn tamashalady. Maıdangerge kórsetilgen qurmet aıasynda báıge uıymdastyrylyp, bilekti jigitter aýdaryspaqqa shyqty. Ardager batasymen bastalǵan báıge júldesi 3 600 000 myń teńge bolyp, Jambyl, Túrkistan oblystary, Jańaqorǵan, Shıeli, Jalaǵash jáne Aral aýdandarynan 50-den asa júırik qosyldy.
Qyzylorda oblysy