Ońtústik Afrıka Respýblıkasynyń (OAR) Dýrban qalasynda ústel tennısinen álem chempıonaty bastaldy.
Dúbirli dodada Qazaqstannyń birneshe oıynshysy óner kórsetýde. Jarystyń alǵashqy kúni Kırıll Gerasımenko ırandyq Amın Ahmadıandy 4:1 esebimen utty. Odan keıin Kırıll juptyq básekede de ózin jaqsy qyrynan kórsetti. Alan Qurmanǵalıev ekeýi Saýd Arabııasynyń ókilderi Álı Álhadravı men Abdýlazız Bý Shýlaıbıdi shań qaptyryp ketti – 3:1. Al Záýresh Aqasheva men Anastasııa Lavrova juby nemis qyzdary Annett Kaýfmann men Sabına Vınterge ese jiberdi – 1:3.
28 mamyrǵa deıin sozylatyn Dýrbandaǵy dodada atalǵan oıynshylardan bólek, Aıdos Kenjeǵulov (aralas juptyq saıys), Denıs Jolýdev (juptyq saıys), Saǵyntaı Qurmambaev (juptyq saıys) jáne Sar-vınoz Mirqadyrova (jeke saıys) syndy jerlesterimiz óner kórsetýde.