Ekinshi kezeńdi jeńispen bastady

Osy kúnderi Eýropanyń kók maısa alańdarynda Chempıondar lıgasy men Eýropa lıgasynyń ekinshi irikteý kezeńiniń oıyndary ótýde. Bul synǵa elimizdiń byltyrǵy chempıony «Aqtóbe», Almatynyń «Qaırat», Qaraǵandynyń «Shahter» jáne «Astana» klýbtary qatysýda. Sársenbi kúni «Aqtóbe» Chem­pıondar lıgasyndaǵy jarysyn ekinshi kezeńnen bastap, syrt alańda Grýzııanyń «Dınamo» (Tbılısı) komandasyn 1:0 esebimen utty.  Jerebe keshegi Keńes Odaǵy kezinde ataǵy dúrkiregen Tbılısıdiń «Dınamosymen» túıistirgende «Aqtóbeniń» jeńetinine biraz kúmándanǵan bolatynbyz. О́ıtkeni, el chempıonatynda aqtó­belikter «Qaırattan» 1:7 esebimen utylyp, onyń ústine komandaǵa jańa jattyqtyrýshy kelgen bolatyn.  Biraq, beker kúmándanǵan ekenbiz. «Aqtóbe» syrt alańda shynymen de jaqsy oıyn órnegin kórsetti. Bul kezdesýde qazaqstandyq komanda qorǵanysqa basa mán berip, durys taktıkany ustandy. Sonyń nátıjesinde oıyn boıy bolǵan az ǵana múmkindiktiń bireýin utymdy paıdalanyp, jeńiske jetti. Matchtaǵy jalǵyz dopty ekinshi taımda brazılııalyq legıoner Danılo Neko soqty. «Aqtóbe» syrt alańda mańyzdy úsh upaıdy áketti. Endi kelesi kezdesý 23 shilde kúni Aqtóbede ótedi. Eger osy oıynda «Dınamodan» ótse, úshinshi kezeńde «Aqtóbe» Rýmynııanyń «Stıaýa» komandasymen kezdesedi. Beısenbi kúni «Astana», «Qaırat» jáne «Shahter» klýbtary Eýropa lıgasynyń ekinshi irikteý kezeńindegi alǵashqy matchtaryn ótkizdi. Esterińizde bolsa, birinshi elektik  kezeńde «Astana» Armenııanyń «Pıýnık», «Shahter» Armenııanyń «Shırak», «Qaırat» Albanııanyń «Kýkes» komandalaryn utyp, kelesi aınalymǵa shyqqan bolatyn. Bul joly bizdiń klýbtar ishinde «Astana» ǵana alǵashqy matchyn sátti ótkizdi. «Astana» óz alańyndaǵy oıynyn jeńispen bastap, Izraıldiń «Hapoel» klýbyn 3:0 esebimen utty. Bul kezdesýde «Astananyń» sapynda Kanıas penaltıden birinshi bolyp esep ashsa, sońyn ala Tańat Nóserbaev pen Abzal Beısebekov bir-bir goldyń avtory atandy. Osylardyń ishinde jankúıerlerge Tańattyń ekinshi taımda soqqan goly unaǵanyn aıtý kerek. Osydan keıin «Astananyń» sapynda Abzal Beısebekov te ádemi gol soqty. Endi kelesi match 24 shilde kúni Izraıldegi saıası jaǵdaıǵa baılanys­ty Kıprde ótedi delinýde. Al «Qaırat» Eýropa lıgasynyń ekinshi irikteý satysyndaǵy alǵashqy matchynda Danııalyq «Esberg» klýbymen 1:1 esebimen teń tústi. Danııalyq komanda   osal emes eken. «Qaırat» osy joly da  óz alańynda jeńýge tyrysyp edi, biraq oǵan tájirıbeli oıynshylary bar «Esberg» kóngen joq.  Tipti, kerisinshe, dattar Almatyǵa tek jeńis úshin ǵana kelgenderin kórsetip, birneshe qaýipti jaǵdaılar jasap otyrdy. Birinshi taımdy osylaı qarsylastar esep asha almaı aıaqtady. Al ekinshi taımnyń basynda Baýyrjan Islamhannyń tepken doby dat qorǵaýshysynyń qolyna tıip, tóreshi penaltı berdi. Osy múmkindikti paıdalanyp, Iosıp Knejevıch 11 metrlik penaltıden dop soqty.  Budan keıin «Esberg» shab­ýylyn kúsheıtip, oıyn sońynda óz degenderine jetti. Kezdesýdiń negizgi ýaqyty bitip, qosymsha berilgen  mınýttarda esepti teńestirip ketti. Endi «Qaıratqa» syrt alańda ońaı bolmaıdy. «Shahter» klýby da Eýropa lıgasynyń ekinshi elektik satysyndaǵy birinshi matchynda teń tústi. Biraq olar óz alańynda emes, Lıtvada «Atlantas» komandasymen kezdesip,  0:0 esebimen teń tarqasty. Bul oıynda «Shahter» basymdyq tanytty. Alań ıeleriniń de gol soǵýǵa múmkindikteri boldy. Sonyń biri Qaraǵandy klýbynyń qaqpasynyń baǵanasyna tıip, keri qaıtty.  Osydan keıin «Shahter» tizgindi alýǵa tyrysyp, kóp shabýyldap, qaqpaǵa qaraı kóp soqqy baǵyttady. Sonyń birinde qaraǵandylyqtardyń bir soqqysy da qaqpa baǵanynan qaıtty. Endi «Shahter» kelesi matchyn 24 shilde kúni óz alańynda ótkizedi. Osy kezdesýde otandastarymyz jeńedi dep úmittenemiz. Dastan KENJALIN, «Egemen Qazaqstan».