Úıli bolý – el ishindegi eń ózekti taqyryp. Muny Memleket basshysy da eskerip, halyqty qoljetimdi baspanamen qamtýǵa qareket etýge shaqyrǵan. Bul rette bıyl Jetisýda páter jaýǵan jyl boldy. Jýyrda ondaǵan jyl kezekte turǵan 36 otbasy qonystoıyn toılady.
Taldyqorǵan qalasyndaǵy 8-shaǵyn aýdanda berilgen 36 páterdiń qýanyshyna ortaqtasqan oblys ákimi Beıbit Isabaev turǵyndardy quttyqtap, jańa páterdiń kiltin óz qolymen tabys etti.
«Sapyrylysqan sıfrlarmen, paıyzdarmen mynandaı nárseni tyndyrdyq, anandaı jetistikke jettik degen emes, eń negizgisi – halyqtyń kózimen kórip, qolymen ustaıtyn jetistikke ıe bolýymyzda. Jyl basynda biz 2000 otbasyna úı beremiz dep aıshyqtap aıttyq. Sol ýádemizde turamyz. Búgin sol aıtylǵan sózdiń jarqyn kórinisine kýá bolyp otyrsyzdar. 36 otbasyna arnalǵan úıdi berip jatyrmyz. Kezekte bes jyl bolǵandardyń baspanaǵa endi qol jetkizip otyrǵany uıat ekenin de tilge tıek ettik. Memleket basshysynyń Jarlyǵymen óz aldyna jeke oblys bolǵan Jetisý aımaǵynyń 1 jyldyǵyna oraı 8-shaǵyn aýdanyna qarasty 72 páterli kópqabatty úıden 1, 2-toptaǵy múgedektigi bar jandarǵa, ata-ana qamqorlyǵynsyz qalǵan, áleýmettik osal topqa jatatyn, páter kezegi jetken 36 turǵyndy baspanamen qamtý – eń mańyzdy másele. Úı berý boıynsha biz 8 ese joǵary kórsetkishke qol jetkizip otyrmyz», dedi B.Isabaev.
Onyń aıtýynsha, osy qarqynmen jetisýlyqtardy baspanamen qamtamasyz etsek, shamamen 3-4 jylda kezekte turǵandardyń sany 2 ese azaıady.
Oblys basshysy barmaq basty, kóz qysty dúnıe bolmaıtynyn, árbir adam kezegimen páterge ıe bolatynyn jetkizdi. Kezekte turǵan 18-19 otbasyna páter berilgen edi. Búgingi saltanatty sharada turǵyndardy qonystoı qýanyshymen quttyqtaǵan oblys ákimi qalǵan 36 páterdiń kiltin tabys etti. Olardyń deni 1, 2-toptaǵy múgedekter, ata-ana qamqorlyǵynsyz qalǵandar men páter kezeginde turǵandar. Aıta keterligi, páter ıelerin qýanyshymen quttyqtaǵan aımaq basshysy 1700 adam kezekten shyǵyp qalǵanyn, sol boıynsha jumys júrgizilip jatqanyn da tilge tıek etti.
Sonymen qatar jalpy jyl sońyna deıin oblysta 322 myń sharshy metr turǵyn úı paıdalanýǵa beriledi. Sonyń 50 paıyzy bıýdjet esebinen salynbaq. Bul – ótken jyldaǵy kórsetkishten 8 ese artyq. Bir Taldyqorǵannyń ózinde bıyl 51 kóppáterli turǵyn úı qoldanysqa berilmek. Al shilde aıynda 3 kóppáterli úı, tamyzda 4 úı jetisýlyqtarǵa esigin aıqara ashpaq. Osyndaı jaıdarman jańalyqqa kýá bolyp, baspana baqytyna kenelgender qatarynda birqatar azamat sóz alyp, lebizin bildirdi. Solardyń ishinde ata-ana qamqorlyǵynsyz qalǵan Radmır Chernov:
«Búgin meniń ómirimdegi eń mereıli kún. Baspanaly boldym. Endi jarqyn maqsatqa, asqaq armanǵa erkin qadam basamyn. Elimniń, Jetisýymnyń kórkeıýi jolynda mańdaı terimdi tógetin bolamyn. Osyndaı qýanysh syılaǵan oblys basshylyǵyna aıtar alǵysym sheksiz», dep mereıi asqan jigit memlekettik tilde tebirengen edi.
Jetisý oblysy