Maldybaevtar otbasynyń ónerde oıyp alar orny bar. Ásirese otaǵasy kúıshi-kompozıtor Aman Maldybaevtyń «Kóne Taraz» kúıi mýzyka maıtalmandary tarapynan joǵary baǵalanǵany belgili. Rasynda da Aman Maldybaevtyń sol bir shertpe kúıi tyńdarmandy tolǵandyrmaı qoımaıdy. Kúıdegi epıkalyq sarynnyń aryny jurtty eleń etkizeri daýsyz.
Shynynda da «Kóne Taraz» kúıin tyńdaǵan kisiniń kóz aldyna kóne shahardyń baıyrǵy tarıhy elesteıtini daýsyz. Onyń «Jalyn keshken» áni de ýaqytynda hıt bolǵanyn eshkim umytqan joq. Jarty ǵasyr boıy qolynan dombyrasyn tastamaǵan Aman Maldybaevtyń otbasy músheleriniń de ónerge ańsary aýǵan.
Onyń úsh uly – úsh báıteregi. Qolynan qasıetti dombyrasyn tastamaıtyn áke tálimin alǵan Álibegi ýaqytynda Amanmen birge Germanııanyń on shaharyn sharlap, qazaq ónerin qart qurlyqta nasıhattady. Saksofonnan syzyltyp saz tógetin onyń ónerin jurtshylyq joǵary baǵalaıtyny aqıqat. О́ıtkeni ol – kásibı mýzykant retinde ózin moıyndatyp úlgergen talant ıesi. Qaıbir jyly Álibek oqýshylar arasynda ótken halyqaralyq «Azııa daýysy» baıqaýynda laýreat atandy.
Ortanshy uly Rústem de ónerimen daralanyp, talaı dodalarda úzdikter qatarynan kórindi. Ol Belarýs elinde ótken halyqaralyq án konkýrsynda 1 oryn ıelense, Máskeý men Novosibirde uıymdastyrylǵan ánshiler baıqaýynda dıplomant atanǵan.
О́nerli otbasynyń sút kenjesi Qazybekti jurt qobyzshy retinde jaqsy tanıdy. Jas qobyzshylar arasynda uıymdastyrylǵan halyqaralyq «Jez kıik» baıqaýynda úzdikter qatarynan kórinip, laýreat atanǵan ol jas oryndaýshylar arasynda uıymdastyrylǵan respýblıkalyq alamanda ekinshi oryn ıelengen.
Maldybaevtar otbasyna óner genetıkalyq jolmen daryǵan sekildi. Muny Aman Maldybaevtyń sózi de aıǵaqtaı túsetindeı. Onyń sózine sensek, ata-anasy aıtys aqyny bolǵan kórinedi.
«Ákem men anam da aqyndyqqa jaqyndyǵy bar kisiler edi. Ekeýi jıi aıtysady eken. Kóbinese sheberligi basym ákem jeńisti bermeıtin kórinedi. Muny anamnyń «Ákeńe aıtysta jeńilgennen keıin turmysqa shyqtym» degen sózinen de ańǵarýǵa bolady. Qysqasy, bizdiń áýletke óner arǵy jaqtan taraǵan-aý», deıdi ol ótken shaqqa kóz júgirtip.
Úsh uly da áke jolyn jalǵastyryp, túrli mýzykalyq aspapty ıgerip, ónerge bet burǵanyna esh ókinbeıdi. Olar qazaq óneriniń baıraǵyn qaı kezde de bıikten kórgisi keledi.
«Shyny kerek, meni ónerge ákem baýlydy. Sol úshin de ákeme dán rızamyn. Ol kisi qaı kezde de qoldan kelgen kómegin aıaǵan emes. Ájemniń tuńǵysh nemeresi bolǵandyqtan sol kisiniń de ańyzǵa toly áńgimesin kóp estip óstim. Osynyń barlyǵy da meni óner álemine jeteleı túskeni anyq. О́z basym osy joldy tańdaǵanyma shyn qýanamyn», deıdi úıdiń tuńǵyshy Álibek.
О́ner qonǵan otbasynyń otaǵasy Aman balalaryn qursaqta jatqan kezinde-aq kúı kúmbirimen sýsyndatqan. Aıtýynsha, úsh uldyń ónerge bet burýyna osy bir qadamy da áser etse kerek.
«Uldarym anasynyń qursaǵynda jatqanda aı-kúni jaqyndap qalǵan kelinshegimniń qasynda otyryp, tókpe kúı tartyp, shertpe kúı shertetinmin. Qazaqtyń ǵajap kúılerin balalarymnyń sanasyna qursaqta jatqan kezinen bastap sińirgim keldi. Olar dúnıege kelgen soń da besigin terbetip otyryp, talaı ret án aıtyp, kúı tarttym. Úsheýin de osylaısha ómirge kelmeı turyp ulttyq mýzykamen tárbıeledim. Sonyń da áseri bar shyǵar», deıdi A.Maldybaev.
Júregi óner dep soqqan A.Maldybaev – qaı kezde de jańa bir ıdeıany iske asyrýǵa umtylyp turatyn adam. Tynymsyz izdenistiń nátıjesinde ol 1989 jyly «Áýlıeata órenderi», 1991 jyly «Shejire» folklorlyq ansamblin quryp, oǵan ózi jetekshilik etti. О́ner ujymdarynyń repertýaryn tolyqtyrý úshin tynymsyz eńbektendi.
Búginde qazaq estradasynda mańdaıy jarqyrap júrgen belgili ánshi Dosymjan Tańatarov alǵashqy óner jolyn A.Maldybaev qurǵan ansamblde bastaǵanyn bireý bilse, bireý bilmes. Osydan-aq Maldybaev mektebiniń myqty ekenin ańǵarý qıyn emes shyǵar. О́ıtkeni tek Dosymjan ǵana emes, memlekettik «Daryn» jastar syılyǵynyń laýreaty, inisi Madııar Maldybaev, respýblıkalyq konkýrstardyń laýreaty Nurlybek Qadyrbergenov, ánshiler Quralaı Ǵaıymova, Gúlshat Sopbekova, Janar Ústemirova syndy talanttar da Maldybaevtyń tálimin tyńdap, dárisin alǵan.
Qazaq mýzykasynyń «Altyn qoryna» engen «Kóne Tarazdan» bólek, «Muńdy saz», «Shoqaı datqa», «Muńly tamshylar» sekildi ózge kúıleri de tyńdarmanyn tapqan. Sondaı-aq A.Maldybaevtyń «Jalyn keshken», «Jastar marshy», «Naz sezim», «Aqqý áni» sekildi ánderi de júrekterge jetken.
Teginde ónersúıer qaýym A.Maldybaevty belgili kúıshi-kompozıtor retinde ǵana tanyp júrgen kezde ol óziniń akterlik qabileti men sheberligin de kórsetti. Belgili rejısser Ermek Tursynovtyń «Shal» atty kórkem fılminde negizgi keıipkerlerdiń biri Qaltaıdyń obrazyn qal-qaderinshe ashýǵa tyrysty.
«Bul ózi bir qyzyq dúnıe ǵoı. Áýelde kınoǵa túsemin dep kim oılapty? Kórkem fılmge túsý ıdeıasy maǵan rasynda da qatty unady. О́zimdi basqa qyrymnan baıqap kórýge múmkindik berildi. Ondaı múmkindikten qalaı bas tartasyń? Bul ómirimniń jarqyn sátteriniń biri desem de bolady. Qysqasy, ómirde Qaltaıdyń obrazyn alyp shyǵý maǵan amanattalǵan edi. Amanatqa qııanat jasaǵan joqpyn.
Qalaı desek te, óner – bizge berilgen Qudaıdyń amanaty. Balalarymnyń bári de ózim sekildi óner áleminen alystamaǵanyna shyn qýanamyn. Olar óz boıyndaǵy talantty eńbekpen ushtastyra alsa, áli talaı bıikti baǵyndyratynyna senemin», deıdi ónerli otbasynyń otaǵasy.
Jambyl oblysy