Jetisýda respýblıkalyq ekologııalyq aksııa jáne sanıtarlyq tazalyq, kórkeıtý-kógaldandyrý is-sharasy aıasynda oblystyń barlyq aýmaǵynda senbilik uıymdastyryldy. Senbilikke oblys boıynsha 32 myńǵa jýyq adam qatysyp, 883 shaqyrym avtomobıl joly, 383 shaqyrym aryq jelisi tazartyldy. 352 arnaıy tehnıka tartylyp, 1 802 tonna qoqys shyǵaryldy.
Senbilikke oblys ortalyǵyndaǵy mekeme, kásiporyn qyzmetkerleri men eriktiler, qala turǵyndary belsene qatysyp, týǵan qalasynyń kórkeıip kógaldanýy úshin bar úlesin qosýǵa tyrysty. Ár ujym ózderine júktelgen aýmaqty kúl-qoqystan tazartty. Sondaı-aq áleýmettik nysandardyń aýmaǵy, avtomobıl joldarynyń jaǵalaýy tazalanyp, kórikti orta qalyptastyrýǵa úles qosty. Senbilik bastalmas buryn uıymdastyrylǵan shaǵyn jıynda qala ákimi Ernat Bázil jáne ózge de ekobelsendiler men belsendi azamattar senbiliktiń mańyzy men mánin kópshilikke jetkizdi.
Qaladaǵy memlekettik mekemeler, qalalyq máslıhat, kásiporyndar men óner, mádenıet ujymdarynyń ókilderi ózderine belgilep berilgen aýmaqtaǵy kúl-qoqysty tazalap, shashylyp jatqan qatty qaldyqtardy terip, qýraǵan shópterdi jınap, tehnıkalarǵa tıep, belgilengen orynǵa tógýge jóneltip jatty. Qaratal ózeniniń boıyndaǵy orman alqabynda ótken senbilik «Jasyl yntymaqtastyq», «Jetisý oblysynyń Kaz Eco Patrol», «Altyn adam Jetisý sheberler ortalyǵy», «Jas ulan» qoǵamdyq birlestikteri ekobelsendileriniń qatysýymen ótti. Bul jerge Taldyqorǵan qalasynyń ákimdigi, qalalyq turǵyn úı-kommýnaldyq sharýashylyǵy bólimi, Jetisý oblysynyń ekologııa departamentiniń qoldaýymen 100-den asa ekoerikti jınalyp, Qaratal ózeniniń boıyn qoqystan tazalap shyqty.
– Bizdiń ortaq maqsatymyz – qorshaǵan ortanyń lastaný máselesine nazar aýdarý, turǵyndardyń, memlekettiń qoqyspen kúresý jónindegi kúsh-jigerin biriktirý. Turǵyndar jazda ózen sýyna shomylady, mal jaıylady, janýarlar sý ishedi, al ózenniń sýyn lastap jatqan qoqystar olarǵa úlken qaýip tóndiredi. Sondaı-aq jyl saıyn «Qyzyl tas» saıajaıyna keletin demalýshylardyń qatary kóbeıip otyr. Al jol boıynda shashylyp, taý-taý bolyp úıilip jatqan qoqystar olardyń kóńil kúıine teris áser etedi. Sondyqtan Qaratal ózeniniń jaǵasyn taza ustaý, polıetılen paketter men basqa da qoqystardy jınaý asa mańyzdy. Senbilikte qoqys tazalaýmen qatar osyndaı mańyzdy máseleni turǵyndardyń esine salýǵa tyrystyq, – deıdi «Altyn adam» Jetisý sheberleri ortalyǵy» QB-nyń dırektory Dınara Bákirova.
Biz urpaqtarymyzdyń jarqyn bolashaǵy úshin týǵan ólkemizdi taza ustaýǵa tıispiz. Bul másele oblysta ótkir qoıyla bastady. О́ıtkeni oblystyń búgingi tańdaǵy áleýetin týrızm salasy eseleı túsetindikten osy baǵytpen arnaıy aınalysýdy maqsat etken «Jasyl nıettestik» qoǵamdyq birlestiginiń ókilderi de sol jerden tabyldy.
– Oblysta barlyǵy 332 týrıstik nysan bar. Onyń basym bóligi tabıǵı demalys aımaǵy. Bizdiń joba týrıstik aımaqtarda ekobelsendiler jelisin qalyptastyrýǵa jáne ishki týrızm salasyna baǵyttalǵan. Sondyqtan ekologııalyq belsendilik daǵdysyn qalyptastyrýǵa qatysty is-sharalarǵa da atsalysamyz, – deıdi «Jasyl nıettestik» QB jetekshisi Álııa Ahmedıeva.
Atalǵan is-sharaǵa qaladaǵy I.Jansúgirov atyndaǵy Jetisý ýnıversıteti jáne kolledj stýdentteri, yntaly mektep oqýshylary qatysty.
– Biz tazalyqpen kúnde aınalysamyz. Úıimizdi jınaımyz, aýlamyzdy tazalaımyz. Ádemi bolyp júrgimiz keledi. Biraq jeke tazalyǵymyzǵa kóńil bólip, aýlamyzdy taza ustaǵanymyzben aınalamyzdaǵy qorshaǵan orta qoqysqa toly bolyp jatsa, onyń eshqandaı da mańyzy bolmaıdy. Sondyqtan osyndaı ekologııalyq is-sharalarǵa belsendi qatysamyn, – deıdi I.Jansúgirov atyndaǵy Jetisý ýnıversıtetiniń 1-kýrs stýdenti Aıajan Qabylmájinova.
Jetisý oblysy