Batys Qazaqstan oblysynda respýblıkalyq Analar keńesiniń forýmy ótti. Oral qalasyndaǵy Dostyq úıinde «Mádenıetti ana – mádenıetti ult» taqyrybymen bas qosqan jıynda rýhanı-adamgershilik tárbıe barysy talqylanyp, óńirlik Analar keńesteri óz tájirıbesimen bólisti.
Qazaqstan halqy Assambleıasy respýblıkalyq Analar keńesiniń keńeıtilgen otyrysynda Assambleıa tóraǵasynyń orynbasary Aýrıka Dıak, Parlament Senatynyń depýtaty Nurııa Nııazova, Batys Qazaqstan oblysy ákiminiń orynbasary Baqytjan Narymbetov, Qazaqstan halqy Assambleıasy respýblıkalyq Analar keńesiniń tóraıymy Názıpa Shanaı jáne Analar keńesiniń músheleri, psıhologter, qoǵamdyq uıymdardyń músheleri qatysty.
Is-sharany Batys Qazaqstan oblysy ákiminiń orynbasary Baqytjan Narymbetov ashyp, respýblıkalyq forýmǵa qatysýshylardy quttyqtap, jıyn jumysyna sáttilik tiledi.
Sondaı-aq is-sharada Batys Qazaqstan oblysy Analar keńesiniń tóraıymy Shalqyma Haırollaqyzy «Mádenıetti ana – mádenıetti ult» tujyrymdamasyn iske asyrý jolynda oryndalyp jatqan 4 baǵyt boıynsha esep berip, otbasyndaǵy tárbıe, ananyń róli taqyryptaryn keńinen talqylady.
Odan keıin Qazaqstan halqy Assambleıasy respýblıkalyq Analar keńesiniń tóraıymy, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasynyń múshesi Názıpa Ydyrysqyzy sóz alyp, birqatar keńes múshesin alǵyshatpen marapattap, «El anasy», «Aıaly alaqan» atty syılyqtardy tapsyrdy.
Eki kúnge sozylǵan is-shara aıasynda qatysýshylar birneshe sessııaǵa bólinip, túrli praktıkalyq oıynǵa, trenıngterge qatysty. Saltanat saraıynda kópbalaly analarmen kezdesip, «Besikke salý», «Tusaý kesý» sekildi qazaqtyń salt-dástúrin oryndady. Oqýshylar saraıynda «Dostyq», «Jas sarbaz», «Aıbyn» úıirmeleriniń oqýshylarymen kezdesip, elektrondy veıpke qarsy aksııa ótkizdi. Sessııada qazirgi qoǵamnyń jaman ádetteri, olarmen kúresý ádisteri, nashaqorlyq pen býllıngtiń aldyn alý máseleleri talqylandy. Mysaly, Soltústik Qazaqstan oblysynan kelgen «Demeý» balalyq shaq máseleleri boıynsha koordınasııalyq ortalyǵynyń psıholog mamany Emır Dýlatov oıynqumarlyqqa táýeldiliktiń psıhologııalyq aspektileri týraly qyzyqty baıandama jasady. «Temekisiz» qoǵamdyq qorynyń atqarýshy dırektory, «Temeki tútininen taza Qazaqstan úshin» Ulttyq koalısııasynyń kóshbasshysy, DSM Qoǵamdyq keńesiniń múshesi, Dúnıejúzilik densaýlyq saqtaý uıymynyń 2023 jylǵy «Temekimen kúreste qosqan zor úlesi úshin» syılyǵynyń laýreaty Jámıla Sadyqova «Zamanaýı jaman ádetter jáne olarmen qalaı kúresemiz?» atty baıandamasyn onlaın ótkizse, «Esirtkisiz bolashaq» korporatıvtik qorynyń jetekshisi Jandos Aqtaev nashaqorlyqtyń aldyn alýdy óńirlik deńgeıde jetildirý máselesin kóterdi. «Senimen bolashaq» respýblıkalyq ata-analar birlestiginiń Batys Qazaqstan oblystyq fılıalynyń psıhologi, pedagogıka ǵylymdarynyń magıstri Quralaı Shamuratqyzy qazir óte ózekti bolyp turǵan býllıng máselesin qozǵap, býllıng qurbany bolmaý úshin ne isteý keregin ortaǵa saldy. Batys Qazaqstan oblystyq Polısııa departamentiniń Jergilikti polısııa qyzmeti basqarmasynda áıelderdi zorlyqzombylyqtan qorǵaý jónindegi aǵa ınspektor, polısııa maıory Dılıara Satarova turmystyq zorlyq-zombylyq, onyń sebep-saldary týraly mysaldarmen aıtyp berdi. Qazaqstan Respýblıkasy Ulttyq ulany Bas qolbasshysynyń tárbıe jáne áleýmettik-quqyqtyq jumystar jónindegi orynbasary, Halyq Qaharmany, general-maıor Qaırat Úmbetovtiń de áńgimesi áserli boldy.
Aıtpaqshy, Halyq Qaharmany Qaırat Úmbetov oraldyqtarǵa jaqsy tanys. Ol 2014-2016 jyldary osyndaǵy áskerı bólimniń shtab bastyǵy bolyp qyzmet etken bolatyn. Búginde quqyqtyq tártip áskeriniń Bas tárbıeshisi bolyp júrgen batyrdy Batys Qazaqstan oblysy ákiminiń orynbasary Baqytjan Narymbetov qabyldap, Respýblıkalyq Analar keńesine qatysqany úshin alǵys aıtty. Batysqazaqstandyqtar Qaırat Jarylqasynulynyń oblystaǵy qyzmetin jáne jastar arasyndaǵy patrıotızmdi nyǵaıtýǵa qosqan jumystaryn áli umytqan joq. Halyq Qaharmany bolashaqta Batys Qazaqstan oblysynda zamanaýı úlgidegi áskerı mektep-ınternat salý josparymen bólisti.
Aıta keteıik, Qazaqstan halqy Assambleıasynyń Analar keńesi 2013 jyly qurylǵan. Qazirde eldiń barlyq óńirinde 1 712 keńes jumys isteıdi. Onyń 1 78-i aýdandyq, 1 302-si aýyldyq deńgeıde. Analar keńesi Túrkistan (204), Aqtóbe (176), Batys Qazaqstan (161) jáne Almaty oblystarynda (146) eń kóp shoǵyrlanǵan.
Elimizdegi otbasy ınstıtýtyn saqtaý men nyǵaıtýda, óskeleń urpaqty tárbıeleýde, ajyrasýlardyń sanyn azaıtýda, jasóspirimder arasyndaǵy qylmys pen quqyq buzýshylyqtyń aldyn alýda mańyzdy ról atqaryp kele jatqan Analar keńesiniń Oraldaǵy basqosýy qatysýshylar úshin erekshe paıdaly bolǵany anyq.
Batys Qazaqstan oblysy