Tabys kózi – shaǵyn bıznes

Oblystaǵy 7 aýdannyń altaýy kúrish egedi. Al darııanyń etegindegi Aral aýdanyndaǵy tirshilik tini – balyq pen tuz óndirisi. Bastaýyn ótken ǵasyrlardan alatyn osy kásipterden el áli de yrzyǵyn aıyryp keledi. Ba­lyq óndirisi kishi Aral tolǵaly beri qaıta qarqyn alsa, tuz – aýdan orta­lyǵyna jaqyn Jaqsyqylyshtaǵy jurt­shylyqtyń negizgi tirshilik kózi. Byltyr osy Jaqsyqylysh kentinde turatyn Nurjan Jalǵasbaev taýyq ósirýdi qolǵa alǵanda, tosyrqaı qaraǵandar kóp bolyp edi. 25 mıllıon teńgeden bastalǵan joba qazir shaǵyn qus fermasyna aınalyp, aıyna 7 tonna taýyq etin óndirip otyr. Araldaǵy dúkender men meıramhanalar, dámhanalar osy fermanyń ónimin saýdalaıdy. 

Kásipker jumyrtqany arnaıy tapsyryspen Chehııa, Germanııa, Ispanııa elderinen aldyryp otyr. Osynda ınký­batorǵa salynyp, odan shyqqan balapan 37 kúnde soıýǵa jaraıdy eken.  Jalpy, bir mezette 2500-3000 bas balapan shyǵady.

Kásipker bul balapandardyń óte sezimtal keletinin aıtady. Jumyrtqany jaryp shyqqan sátten baladaı baptap, arnaıy dárýmenderin salý kerek. Qalypty temperatýra men iship-jemin de óz mólsherinde berilýin qadaǵalamasań, eńbek esh ketýi múmkin. Sondyqtan ju­mys­shylarmen birge balapandardy kútip-baptaýǵa otbasymen kirisip ketetin kezi kóp.

Jetilgen qus aıyna bir ret soıylady, sol mezette qosymsha 10 adam ýaqyt­sha jumysqa alynady. 

«Qazir alyp-satýdyń zamany ótti. О́ndiriske bet burmaǵannyń órisi tarylatyn ýaqyt keldi. Azyq-tú­lik­ten bastap tutynýshyǵa kerekti ónim­niń bári ózimizden shyqqany durys. «Ki­sideginiń kilti aspanda» ekeni ke­shegi pandemııa kezinde baıqalǵan joq pa?  Jumyrtqadan balapan, balapan­nan taýyq ósirý ońaı emes, biraq osy arqy­ly qazir aýdandy qus etimen qam­typ otyrmyz. Elge paıdamyz tıse deımin», deıdi Nurjan.

Ol alda Araldan shyqqan taýyq eti elimizdiń ózge óńirlerine de jetki­zile­tindeı jaǵdaı jasaǵysy keledi. О́ndiris aıasy shaǵyn bolǵanymen de, kásipkerdiń keleshekke jasaǵan jospary aýqymdy. Oǵan da jeter, bastysy úlken maqsatqa alǵashqy qadam jasaldy.

Qyzylorda