Jambyl oblysynda aýyz sýdyń azabyn tartyp otyrǵan aýyldar áli de barshylyq. Taza sýǵa jetýdi armandaǵan eldi meken turǵyndary jýrnalısterge muńyn shaǵýdan jalyǵar emes. Olar bizge jıi habarlasady. Shalǵaıdaǵy aýyldarda turatyn aǵaıynnyń arzýyn tyńdap, birneshe ret maqala jazǵanbyz.
«Egemen Qazaqstan» gazetiniń 2023 jylǵy 26 jeltoqsandaǵy №247 sanynda «Tirshilik nárinen taryǵyp otyr» taqyrybymen maqala jarııalanǵan edi. Jazbamyzda shalǵaıdaǵy Moıynqum aýdanynyń birneshe aýyly tushy sýǵa zar bolyp otyrǵanyn naqty dáleldermen keltirgen edik. Turǵyndardyń dabyl qaǵýynan keıin jarııalanǵan maqalaǵa aýdan ákimdigi jaýap joldapty. Hat mátinine zer salsaq, ózekti máseleni sheshý jolynda birshama jumys atqarylyp jatqan kórinedi.
«О́tken jyldyń sońyna qaraı «Egemen Qazaqstan» gazetinde «Tirshilik nárinen taryǵyp otyr» taqyrybyndaǵy maqalaǵa oraı tolyqqandy jaýap bergendi jón kórdik. 2014 jyly Shyǵanaq aýylynyń sý qubyry membranalyq tazartý qurylysymen salynǵan. Keıingi jyldary membranalyq qondyrǵy isten shyǵýyna jáne Balqash kóliniń deńgeıiniń tómendeýine baılanysty taza aýyz sýmen tolyq qamtamasyz etýde máseleler týyndady. Mundaı ózekti másele Myńaral aýyly, Myńaral stansasy jáne Býrylbaıtal, Mırnyı, Qııaqty eldi mekenderinde de kezdesti. Osy jaǵdaıdy qalpyna keltirý maqsatynda oblys ákimdiginiń turǵyn-úı kommýnaldyq sharýashylyq jáne energetıka basqarmasynyń janynan qurylǵan jumysshy toppen zerdeleý jumystary júrgizildi. Top quramyna membranalyq qondyrǵy ornatýda tájirıbesi bar «Abyroı Grýpp» JShS, «GıdroPrıbor» AQ jáne «DEK» JK engen. Zerdeleý qorytyndysy negizinde tıisti zań talaptary saqtala otyryp, osy eldi mekenderdi tolyq aýyz sýmen qamtamasyz etý úshin 2023 jyldyń ekinshi jarty jyldyǵynda oblystyq bıýdjetten 311,9 mln teńge qarjy bólindi. Búginde «Abyroı Grýpp» JShS-men 155,95 mln teńgege jáne «DEK» JK-men 155,95 mln teńgege kelisimshart jasaldy. Kelisimshart negizindegi 30 paıyzdyq aldyn ala tólemderi eki merdigerge de jasalyp, tıisti jumystar bastaldy. Atalǵan eldi mekenderdegi aýa raıynyń qolaısyzdyǵynan taza aýyz sý berý merzimi naýryz-sáýir aılaryna josparlanyp otyr. Qazirgi tańda joǵaryda aıtqan eldi mekenderge turmystyq qajettilikke paıdalanýǵa kóldiń tushy sýy berilip otyr. Al aýyz sý temirjol arqyly jáne sý tasýshy avtokólikpen tasymaldanyp jatyr», delingen ákimdik ókili joldaǵan jaýapta.
Aýdandyq ákimdik joldaǵan resmı jaýapta Qylyshbaı aýylyndaǵy jaǵdaı da baqylaýǵa alynǵany aıtylypty. Mundaǵy másele de ońynan sheshimin tabatynyna kepildik berilgen. Joǵaryda jazylǵan aýyldardyń máselesine qaraǵanda qylyshbaılyqtardyń janaıqaıynyń jedel sheshimin tabatynyna rasynda kúmán joq. О́ıtkeni isten shyqqan qondyrǵyny qalpyna keltirý asa bir qıyndyq týdyra qoımasy anyq.
Moıynqumdaǵy Myńaral aýyly, Myńaral stansasy jáne Býrylbaıtal, Mırnyı, Qııaqty eldi mekenderinde qonystanǵan halyqtyń máselesi jedel sheshilse, quba-qup. Ákimdiktiń resmı jaýabynda aýyz sý berý merzimi bul aýyldarda naýryz-sáýir aıyna josparlanyp otyrǵany aıtylypty. Ol kún de alys emes.
Shyny kerek, aýyz sý problemasy kezdesetin keıbir aýdandardaǵy aýyldardyń birqatarynda josparly jumys ilgeride-aq júrgizilgen. Alaıda atqarylǵan jumystyń sapasy kóńil kónshitpeıdi deýge negiz de joq emes. Oǵan mysal da jetkilikti. Biraz aýyldaǵy merdigerlerdiń sapasyz atqarǵan jumysy týraly maqalalar bas basylymda birneshe ret jarııalandy. Aldaǵy ýaqytta aýyz sý qurylysy júrgiziletin aýyldardyń jumysyna ákimder sergek qarasa deımiz. Qazynanyń qarjysyn sapasyz atqarylǵan jumysqa qaıta jumsaǵansha basqa da áleýmettik máselelerdi ońynan sheshken jón emes pe?
Jambyl oblysy