О́tken jyldan bastap 8 óńirde eldiń qarjylyq saýatyn kóterýge baǵyttalǵan «Qaryzsyz qoǵam» jobasy qolǵa alynǵany belgili. Memleket basshysy Qasym-Jomart Kemeluly Toqaev «Amanat» partııasy men Halyk Bank-tiń birlesken bastamasynyń tıimdiligin aıtyp, alda onyń aıasyn keńeıtýdi tapsyrǵan bolatyn. Osylaısha, ótken jyl ishinde 65 myńnan astam adamnyń qarjylyq saýatyn arttyrýǵa múmkindik jasaǵan joba bıyl elimizdiń barlyq aımaǵynda júzege asa bastaıdy.
Bıylǵy erekshelik – qarjylyq saýattylyq negizin mektep qabyrǵasynan bastap oqytý josparlanyp otyr. Ol úshin Úkimetpen birlesip oqýshylarǵa, kolledjder men joǵary oqý oryndarynyń stýdentterine arnalǵan oqý quraldary ázirlený ústinde. Jalpy, qarjylyq saýattylyq kýrstarynda 90 kúnnen artyq merzimi ótken qaryzy bar adamdarǵa basymdyq beriledi.
Osy jyly Qyzylorda oblysynda osy bastama aıasynda 8 myń azamatty oqytý josparlanyp otyr. Dúısenbi kúni Qyzylorda qalasymen qatar Jalaǵash, Syrdarııa, Shıeli jáne Jańaqorǵan aýdandarynda kýrstar bastaldy.
– Joba qatysýshylary qarjy keńesshileri dáristerinen bólek, enbek.kz portalyna tirkelý men jeke kásip ashýdan bastap, sottan tys bankrottyqty súıemeldeý jáne bereshekti óteý kestesin jasaý sekildi máseleler boıynsha keńes ala alady. Sondaı-aq oqý úderisine qatysýshylarǵa zańgerler de kómek beredi. Eldegi azamattar kýrsqa jazylý úshin «Amanat» partııasynyń qalalyq nemese aýdandyq fılıalyna habarlasýǵa bolady, deıdi – partııanyń oblystyq fılıalynyń atqarýshy hatshysy Láılá Tóreshova.
Jurtshylyqqa qarjy saýattylyǵy kýrstaryn ótkizetin sarapshylardy partııanyń ortalyq apparaty arnaıy oqýdan ótkizgen. Oblysta joba aıasynda dáris oqıtyn osyndaı 5 sarapshy bar. Olardyń jetekshisi «Qaryzsyz qoǵam» jobasynyń Qyzylorda oblysy boıynsha menedjeri, sertıfıkattalǵan trener, mentor Natalıa Mıshýkova.
– Jospar boıynsha bıyl 8 myń adamdy oqytýymyz kerek. Oqýmen qatar qala ákimdiginiń janynan ashylǵan front-ofıste túrli keńes alyp, kásippen aınalysqysy keletinderge bıznes-jospar jasaýǵa kómek beriledi, – deıdi Natalıa Mıshýkova.
Qatysýshylar arasynda áıelderdiń kóptigi baıqalady. Solardyń biri – Aıgúl Bazarbaeva. Alǵa qaraı qaryzsyz qadam basýdy kózdegen ol qaltańdaǵy qarjyńdy eseptep, jón-josyqsyz nesıege urynbaý úshin ár adamnyń osyndaı kýrstardan ótkenin durys dep sanaıdy.
Oblys ortalyǵy men 4 aýdanda qatar bastalǵan qarjy saýattylyǵy sabaqtary alda Baıqońyr qalasy men qalǵan úsh aýdanda da jalǵasady.
Qyzylorda