Bási bólek baıqaý

Oblystyq ishki ister depar­tamentinde 23 maýsym – kúni qarsańynda «Meniń Qazaqstanym. Meniń polısııam» atty balalardyń shyǵarmashylyq baıqaýy uıymdastyryldy. Bul baıqaýǵa oblystyń ishki ister organdary qyzmetkerleriniń 3-13 jas aralyǵyndaǵy balalary qatystyryldy. Baıqaýdyń basty maqsaty jas urpaqtyń boıynda Qazaqstan polısııasyna degen qurmetti qalyptastyrý, balalardy otansúıgishtikke, óziniń ata-anasyn maqtan tutýǵa baýlý jáne eń bastysy, memlekettik tildi bilý men qurmetteýge tárbıeleý bolyp tabylady. «Meniń Qazaqstanym. Meniń polısııam» baıqaýy balalardyń jas erekshelikterin eskere otyryp, eki baǵytta ótkizildi. Birinshi baǵyt boıynsha 3 -10 jastaǵy balalar ózderiniń salǵan sýretterin usynsa, ekinshi baǵyt boıynsha 6-13 jastaǵy jetkinshekter ózderi jazǵan shyǵarmalaryn tapsyrdy. Baıqaýǵa 30 bala óz jumys­taryn usyndy. Polısııa qyzmet­kerleriniń balalary usynǵan árbir sýrette olardyń Otanyna, týǵan jerine degen súıispenshiligi aıqyn kórinse, olardyń jazǵan shyǵar­malarynda polısııa qyzmetkeri bolyp jumys isteıtin ata-analaryna degen qurmeti, maqtanyshy ańǵarylady. Baıqaý oblystyq deńgeıde ótkizil­gendikten, oǵan barlyq qalalyq, aýdandyq polısııa bó­lim­derinde qyzmet etetin polı­seılerdiń balalary da qatysty. Ásirese, Shalqar, Temir, Áıteke bı aýdandarynda qyzmet etetin polısııa qyzmetkerleriniń balalary asa belsendilik tanytty. «Meniń Qazaqstanym. Me­niń polısııam» atty balalar baı­qaýynyń qorytyndysyn shy­ǵaryp, jeńimpazdardy anyq­taý jáne qatysqan eshbir balany nazardan tys qaldyrmaýdy ustanǵan oblystyq ishki ister departamentiniń bastyǵy, polısııa general-maıory Mahsýdhan Ablazımovtyń tóraǵalyǵymen ótken komıssııa otyrysynda bala­lardyń jumystary saralanyp, qyzý talqylandy. Sondaı-aq, balalardyń týyndylaryn barynsha ádil baǵalaý úshin komıssııa quramynda jýrnalıster, tilshiler, oblystyq tilderdi damytý basqarmasynyń, qaladaǵy Qazanǵap atyndaǵy balalar óner mektebiniń mamandary da boldy. Baıqaý qorytyndysy boıynsha júldeli oryndar men bes nomınasııa taǵaıyndaldy. Onyń ishinde eń kishkentaı qatysýshylar da nazardan tys qalǵan joq. Olarǵa «Eń kishkentaı ónerpaz», «Talaby taýdaı balapan» syndy nomınasııalar belgilendi. Baıqaý jeńimpazdaryn marapattaý rásimi 23 maýsym – Qazaqstan polısııasy kúnine arnalǵan merekelik konsertte júzege asyrylady. Qatysýshy bala­qaılardyń barlyǵyna oblys­tyq IID bastyǵynyń maqtaý qaǵazdary men alǵys hattary, syılyqtar tabystalyp, IID basshylyǵymen estelik sýretterge túsiriletin bolady. Satybaldy SÁÝIRBAI, «Egemen Qazaqstan». AQTО́BE.