Qyzylorda oblystyq-ólketaný mýzeıiniń qyzmetkerleri aýdandardy aralap, el arasyndaǵy muralardy túgendep, mýzeıdi qundy jádigerlermen tolyqtyryp júr. Osyndaı eńbektiń arqasynda jýyrda XVII-XVIII ǵasyrlarda úsh júzdiń piri bolǵan belgili dinı qaıratker Músiráli Jádikulyna arnalyp soǵylǵan asataıaq zaldan oryn tepti.
El aýzyndaǵy áńgimelerge qaraǵanda abyzdyq pen áýlıeliktiń belgisi sanalatyn asataıaq sopynyń balasy Qosymqojaǵa mura bolyp qalsa kerek. Erekshe qasıetimen tanylǵan sopynyń bul balasy da jurtty talaı keremetimen tańǵaldyrǵan, duǵasy qabyl bolǵan jan atanypty.
Mýzeıdiń ǵalym-hatshysy Ashat Saılaýdyń aıtýynsha, urpaqtarynyń qolyndaǵy asanyń kóshirmesin belgili usta Bekzat Jaqypov jasapty.
«El arasynda tarıhı máni zor talaı mura saqtalyp tur. Qazirgi ıeleriniń kópshiligi olardy mýzeıge ótkizýge asyǵa qoımaıdy. Tipti «osy zatty bersem kıe kóshedi, yrys aýysady» dep uǵatyndar jádigerdiń ózin kórsetýge qulyqsyz. Qundy zattyń kóshirmesi kóbeıip ketedi dep qorqatyndar da joq emes. Osyndaı túsinik saldarynan qazir Jylqaman batyrdyń bylǵary qaltasy, Qaıqy batyrdyń beldigi syndy muralardy ala almaı otyrmyz. Mysaly, Qojan qoja mazarynda da biraz jádiger jurt kózinen jasyryn jatyr. Urpaqtarynyń qolyndaǵy Ámıt ıshannyń dúnıeleri men Janqoja batyr saýytynyń tamtyǵyna da qolymyz jetpeı otyr. Mysaly, ahýndardan qalǵan kitaptar men qoljazbalardy úı jaǵdaıynda saqtaý qıyn. Olardyń orny mýzeı bolýǵa tıis. Biraq sony túsindire almaı qınalamyz», deıdi Ashat Saılaý.
Pirdiń asataıaǵymen qatar mýzeıdiń jańa jádigerleri qatarynda Maral ıshan tutynǵan dúnıeler, ıshannyń oqqaǵary Táji batyrdyń kúmis eri, Buqarbaı batyrdyń qylyshy men týynyń shashaǵy, Bekbergen, Nurǵalı baqsylardyń qobyzdary tur.
Qyzylorda