Jaqynda Tuńǵysh Prezıdent mýzeıinde «Áziret sultan» memlekettik tarıhı-mádenı qoryq murajaıynyń muryndyq bolýymen «Myńjyldyqtar sáýlesi» atty shyraǵdandar kórmesi ashyldy.
Shyraq nemese pilte shamdar bizdiń ata-babamyz úshin negizgi jaryq kózi sanalady, qazaq óziniń meıirimi túsken adamyna sáýlem, janarym, shyraǵym, jaryǵym deýi –
osynyń dáleli. Muny kúndiz-
túni jaryǵy sónbeıtin qazirginiń qala balasy qaıdan bilsin, murajaıdan kórmese. Búgingi tilmen aıtqanda, tehnıkalyq qaýipsizdik saqtalmasa, shyraqtan tilsiz jaýdyń lap etýi áp-sátte ekenin bilgen ertedegi adamdar, shyraqty ornatatyn shyraǵdandar jasaǵan. Kórmeni tamashalaýǵa kelgenderdiń kóz jaýyn alǵan osy shyraǵdandardyń jasalý tásili, aman-saýlyqty tileıtin syrtyndaǵy jazbalary men qoladan quıylǵan qolaılylyǵy boldy. XIV ǵasyrda Ámir Temirdiń buıryǵymen Qoja Ahmet Iаssaýı kesenesi úshin sheber Izz ad-dın ıbn Tadj ad-dın Isfahanı jasaǵan shyraǵdandar kórme sánin keltirdi.
Túrki órkenıetiniń ejelgi oshaqtarynyń biregeıi Túrkistan jazırasynan jetken túpnusqasyndaǵy shyraǵdandar toptamasynyń aldy b.z.d II myń jyldyqty qamtysa, sońǵysy HIH ǵasyrǵa jatady. Maqsat – dala órkenıetinde ejelgi dáýirden bastalatyn baı murany kópshilikke kórsetý.
Shyraǵdandar kolleksııasy «Ulttyq ıgilik» mýzeıaralyq seriktestik jobasy aıasynda qoıyldy. Jıynǵa qatysqan «Áziret sultan» qoryq murajaıynyń dırektory Máýlen Jarylqasynulynyń: «Kez kelgen kórme murajaı úshin mártebe ári úlken júk. Otandyq mýzeı isi serpilisti qajet etedi. Mýzeıge óz betimizshe kelip, tarıhı tanymymyzdy keńeıtý turǵysynan alǵanda, biz kórshiles Reseımen salystyrǵanda birshama artta qalyp qoıǵan sııaqtymyz», deýi memleket tarapynan mýzeı isine barynsha kóńil bólinip otyrǵanyna qaramastan mýzeıtaný, eskertkishter, jádigerler arqyly eltaný máselesine kelgende qarapaıym jurttyń kóp nársege mán bermeıtinin ańǵartady.
Kórmege qatysqan Parlament Májilisiniń depýtaty Kamal Burhanov arheologııa men tarıh salasyna beı-jaı qaramaıtyndar qatarynda desek, halyq qalaýlysy mundaı kórmelerdi uıymdastyrǵanda óskeleń urpaqqa ata-babasynyń ǵylym men mádenıetten, uly órkenıetten saýaty joǵary bolǵanyn, turmysy nashar bolǵanmen, kedeı-kepshiktiń óziniń shańyraǵy jaryqsyz otyrmaǵanyn túsindirý qajet dep sanaıdy.
Astana mýzeıinde shyraǵdandar kórmesi kópshilik nazaryna bir aı boıy usynylady, sodan soń ózge oblystarǵa attanatynyn aıtqan «Áziret sultan» memlekettik tarıhı-mádenı qoryq murajaıynyń qyzmetkerleri babadan qalǵan asyl murany elordalyqtar kórip qalsa degen nıette.
Qundyz ERALY.