KО́KShETAÝ. 21 naýryz. «Býrabaı» memlekettik ulttyq tabıǵı saıabaǵyndaǵy ańdar Belarýs Respýblıkasynan ákelingen jabaıy ógizdermen, ıaǵnı, zýbrlarmen tolyqty. Bul týraly egemen.kz tilshisi habarlady.
«Belovej nýy» ulttyq saıabaǵynan jetkizilgen eki-tórt jas aralyǵyndaǵy 10 jabaıy zýrbdy «Orman sharýashylyǵy» jaýapkershiligi shekteýli seriktestigi ózderinde ósirip, jersindirý úshin satyp alǵan.
Olardyń úsheýi atalyq, jeteýi analyq zýbrlar. Aldaǵy ýaqytta bul janýarlardyń sany kóbeıtilgen soń, «Býrabaı» memlekettik ulttyq tabıǵı saıabaǵynyń aýmaǵyn erkin mekendeıtin jabaıy ógizder tabyny qurylady.
Saıabaq basshylarynyń sózderine qaraǵanda, munyń ózi HH ǵasyrdyń basynda tolyq joıylyp ketýge jaqyn qalǵan zýbrlardyń sanyn birtindep kóbeıtýge múmkindik bermekshi. Qazaqstannyń janvrlar álemin tolyqtyrýdy maqsat etetin bul qadam elimizdiń týrıstik klasterin áleýetin arttyrýǵa da yqpal etetin bolady.
Baqbergen Amalbek.
Derek: egemen.kz
Sýret: egemen.kz