Keshe Premer-Mınıstrdiń birinshi orynbasary Baqytjan Saǵyntaev jańadan taǵaıyndalǵan AQSh elshisi Djordj Krolmen kezdesti, dep habarlady Premer-Mınıstrdiń baspasóz qyzmeti.
Kezdesý barysynda Qazaqstan men Amerıka Qurama Shtattary arasyndaǵy túrli salalardaǵy, onyń ishinde ekonomıkalyq jáne gýmanıtarlyq salalardaǵy yntymaqtastyq týraly pikir almasýlar boldy.
B.Saǵyntaev óz kezeginde Memleket basshysynyń bastamasymen júzege asyrylyp jatqan 5 ınstıtýttyq reforma, «100 naqty qadam» Ult josparyn júzege asyrý barysy týraly áńgimeledi. Sóıtip, atalǵan reformalardyń Qazaqstan men AQSh arasyndaǵy áriptestikke qosymsha serpin beretinin basa aıtty.
Eki tarap Qazaqstannyń DSU-ǵa múshe bolýy respýblıkaǵa jańa ekonomıkalyq kókjıek ashatyndyǵyna senim bildirdi. Otandyq kásiporyndar úshin sheteldik naryqtarǵa shyǵýǵa jol ashylady, al tutynýshylar taýarlar men qyzmetterdi tańdaýda keń múmkindikterge ıe bolady.
Úkimet basshysynyń birinshi orynbasary AQSh elshisin jańa qyzmetke taǵaıyndalýymen quttyqtap, ózara tıimdi qazaqstandyq-amerıkalyq yntymaqtastyqtyń odan ári jalǵasatyndyǵyna úmit artatynyn jetkizdi.