Bıken Rımova atyndaǵy akademııalyq drama teatry bul joly kórermenin poezııa álemine jetelegen erekshe keshtiń kýási etti. Qazaqtyń muzbalaq aqyny M.Maqataevtyń 95 jyldyǵyna oraı «Muqaǵalı» atty monospektakl sahnalanyp, rýhanııatty saǵynǵan jurtshylyqqa áserli tartý jasaldy.
Aıtýly kesh aqyn rýhyna taǵzym etip qana qoımaı, poezııanyń sahnadaǵy ómirsheńdigin taǵy bir dáleldedi. Sultan Sraıylovtyń shyǵarmashylyq ıdeıasy negizinde dúnıege kelgen bul joba – dástúrli spektaklden góri poetıkalyq syrlasý formatyna jaqyn. Qoıylym rejısseri Ulan Ahmetov, kompozıtory Tursynjan Shapaı. Al basty beıneni Qazaqstannyń eńbek sińirgen qaıratkeri Safýan Rysbaıuly somdap, kórermendi aqynnyń jan dúnıesimen júzdestirdi. Sahnada oǵan Darhan Dúısenov, Kúnekeı Muhtarhan, Arıza Asqarova, Qaraqat Shyndáýlet jáne Ásem Muratova serik boldy.
«Muqaǵalı» monospektakli – ómirbaıandyq baıandaý emes, bul – aqynnyń jan álemine úńilýge jasalǵan kórkem talpynys. Bizdiń maqsat – kórermenge derek aıtý emes, sezim syılaý boldy. Muqaǵalı poezııasy – tunyp turǵan emosııa, ishki daýys, adam janynyń arpalysy. Sahnalyq sheshimderdi barynsha yqsham ustap, sóz ben únsizdiktiń qýatyna súıendik. Sebebi Muqaǵalıdy artyq qımylmen emes, júrekpen oqý kerek. Bul qoıylym – aqynmen syrlasý, kórermendi de sol syrlasýǵa shaqyrý», deıdi qoıylym rejısseri Ulan Ahmetov.
Monospektaklde sóz, únsizdik jáne ishki emosııa úndesip, Muqaǵalıdyń mahabbatqa, taǵdyrǵa, ýaqyt pen jalǵyzdyqqa qatysty tereń tolǵanystary poezııa tilimen órildi. Qoıylymnyń yqsham pishini kórkemdik qýatty álsiretpeı, kerisinshe, ár sózdiń salmaǵyn arttyra túsken. Nebári qyryq bes mınýtqa syıǵan sahnalyq sheshim kórermendi bir sátke de beıjaı qaldyrmady.
Qazaqstannyń eńbek sińirgen qaıratkeri Saılaý Qamıev poetıkalyq janrdyń qazaq bolmysyna jaqyndyǵyn atap ótip, akterdiń Muqaǵalı poezııasyn sahnada «tirilte» bilgenin joǵary baǵalady. Onyń aıtýynsha, qysqa da nusqa qoıylym júrekke jol tabatyn áserimen qundy.
Basty róldi somdaǵan Safýan Rysbaıuly bul jumysty aqyn jan dúnıesimen syrlasý dep sıpattaıdy. «Muqaǵalı – sarqylmaıtyn álem. Bir kitabynyń ózinde adam ómirine qatysty barlyq taqyryp bar. Biz sol tereń muhıttyń bir ǵana tamshysyn usyndyq», deıdi akter.
Kesh sońynda jurtshylyq ártisterge tik turyp qoshemet kórsetti.
Jetisý oblysy