Bıyl 11-14 mamyr aralyǵynda Astanada Bern odaǵynyń kezekti kóktemgi otyrysy ótedi. Bedeldi halyqaralyq jıyn TMD keńistiginde tuńǵysh ret bizdiń elde uıymdastyrylmaqshy, dep habarlaıdy Egemen.kz.
Bern odaǵynyń elordadaǵy otyrysy álemniń 70-ten astam elinen 200-den asa qarjy salasynyń jetekshi sarapshylaryn jınaıdy. Is-sharaǵa eksporttyq-kredıttik agenttikterdiń, eksımbankterdiń, halyqaralyq qarjy ınstıtýttarynyń, jeke iri saqtandyrý kompanııalarynyń ókilderi qatysady. Qatysýshylar qatarynda Bpifrance, Credendo, Euler Hermes, SACE, SINOSURE, US EXIM sekildi yqpaldy uıymdar bar.
Iskerlik baǵdarlama Bern odaǵynyń plenarlyq otyrystaryn, eksporttyq-kredıttik agenttikter komıtetiniń jumys sessııalaryn, Praga klýbynyń jıynyn qamtıdy. Aldaǵy kezdesýdiń taqyryby – «Qıylys». Bul uǵym eksporttyq kredıtteý júıesiniń jahandyq deńgeıdegi syn-qaterleri men túbegeıli ózgeristerin sıpattaıdy.
Kún tártibine sıfrlandyrý men jasandy ıntellektini qoldaný, geosaıası ahýal men salalyq ózgerister jaǵdaıynda eksporttyq-kredıttik agenttikterdiń jańa ındýstrııalyq ári saıası sheshimderge beıimdelýi, táýekelderdi baǵalaý men saqtandyrý ónimderin basqarýdaǵy ınnovasııalyq tásilder engiziledi. Eksportty yntalandyrýǵa qolaıly orta qalyptastyrý máselesi de nazarda bolady.
OPEK qory Qazaqstannyń jeke sektoryn qarjylandyrady
Osy halyqaralyq jıyn aıasynda kommersııalyq ári saıası táýekelderdi saqtandyrýmen aınalysatyn Aman Union kásibı uıymynyń atqarýshy komıtet otyrysy josparlanǵan. Bul qurylym ıslam elderi men olardyń seriktesteri arasyndaǵy saýda men ınvestısııany qoldaýǵa baǵyttalǵan. Kezdesýge ICIEC, DHAMAN, Turk Eximbank, Nigeria Exim, ASEI (Indonezııa), COTUNACE (Týnıs), CAGEX (Aljır) uıymdarynyń top-menedjerleri qatysady dep kútiledi. «Báıterek» ulttyq ınvestısııalyq holdıngi» AQ men «Qazaqstannyń eksporttyq-kredıttik agenttigi» AQ baqylaýshy mártebesinde bolady. Mundaı format otandyq ınstıtýttardyń jahandyq eksporttyq saıasat qalyptastyrý úderisine tikeleı aralasýyna jol ashady.
Halyqaralyq deńgeıdegi osyndaı alańdar elimiz úshin strategııalyq mańyzǵa ıe. Bern odaǵy sheńberindegi kezdesýler ınvestorlar senimin nyǵaıtýǵa, otandyq kompanııalardyń sheteldik seriktester arasyndaǵy tanymaldyǵyn arttyrýǵa, ınvestısııalyq tartymdylyqty kúsheıtýge múmkindik beredi. Eksportty qarjylandyrý men saqtandyrý salasyndaǵy ozyq tájirıbelerdi engizýge de serpin beredi.
Eksport pen ımport: Básekelestik ádil bolýy kerek
Otyrysty uıymdastyratyn «Qazaqstannyń eksporttyq-kredıttik agenttigi» AQ Basqarma tóraǵasy Allen Sháıjúnisov Bern odaǵynyń saraptamalyq jıyny Astanada ótýi elimizdiń halyqaralyq saýda júıesindegi ornyn aıqyndaı túsetinin jetkizdi. Onyń paıymdaýynsha, Bern odaǵy eksportty qoldaý salasynda jahandyq standarttar qalyptasatyn bedeldi kásibı qaýymdastyq sanalady. Astanada ótetin bul basqosý yntymaqtastyqty tereńdetýge, ınnovasııany ilgeriletýge, turaqty damý men ekonomıkalyq ósim máselelerin talqylaýǵa arnalǵan mańyzdy halyqaralyq platforma bolady. Osyndaı dıalogtarǵa belsendi qatysý elimizdi senimdi ári ashyq áriptes retinde tanytady.
Bern odaǵy eksporttyq kredıtteý men ınvestısııalardy saqtandyrý salasyndaǵy halyqaralyq qaǵıdalar men standarttardy qalyptastyrýda aıryqsha ról atqarady. Qazir odaqqa múshe uıymdar jyl saıyn bankterge, eksporttaýshylarǵa, ınvestorlarǵa tólem táýekelderinen shamamen 2,5 trıllıon dollar kóleminde saqtandyrý qorǵanysyn usynady. Bul jahandyq transshekaralyq saýda aınalymynyń shamamen 13%-na teń.