Mekteptegi Naýryz

Áz Naýryz – Shyǵys elderiniń búkilhalyqtyq meıramy, jyl basy. Qazaq halqy da Naýryz merekesin aıryqsha baǵalap, ony toılaýdy dástúrge aınaldyrǵan. Bul – birliktiń, izgiliktiń jáne qatal qystan aman-esen shyǵyp, kún nuryna bólenip, jańa jyldy qarsy alý merekesi. Sol sebepti, osy kúni shattanbaıtyn, qýanbaıtyn, meıirlenbeıtin jan joq shyǵar, sirá. Ár jyldan jaqsylyq pen jańalyq kútetin halqymyz bıylǵy Naýryzdy da erekshe qarsy aldy. Máselen, Asta­nadaǵy daryndy balalarǵa arnalǵan №9 «Zerde» mektebindegi Naýryz merekesi ózgeshe aıshyqpen atalyp ótti. Atalǵan bilim uıasynyń dırektory Álııa Seksenovanyń, dırektordyń oqý isi jónindegi orynbasary Gúlnázııa Baıýlovanyń belsendiligimen uıym­dastyrylǵan, sondaı-aq, ustazdar men oqý­shylar qulshynys tanytqan me­rekelik shara ózgeshe boıaýmen árlenip, jınalǵandarǵa aıryqsha kóńil-kúı syılady. Ulystyń uly kúni bul bilim ordasynda aqshańqan kıiz úıler tigilip, ulttyq salt-dástúrimizge baılanysty salt-joral­ǵylar jasaldy. Máselen, «Halqyn súıgen – saltyn súıer» taqyrybynda uıymdastyrylǵan arnaıy baǵdarlama aıasynda synyp jetekshileriniń bastamasymen «Tóle bı», «Qazybek bı», «Áıteke bı», «Máńgilik El», «Abaı» syndy birneshe «aýyl» boı kóterip, olardyń árqaısysynda bata berý, aıtys sekildi qazaqtyń ulttyq salt-dástúrleri jan-jaqty nasıhattaldy. Al merekelik konsert aıasynda ónerli jastar myń burala bılep, án men kúıden, jyrdan shashý shashty. Bul kúni osy bilim uıasynyń 5A synybynyń jetekshisi, tarıh pániniń muǵalimi Gúlnár Rahımovanyń qolǵa alýymen ázirlengen kórme de óziniń tanymdylyq mazmunymen kóptiń esinde qaldy. Máselen, XIX ǵasyrdan jetken kóne jádigerler, onyń ishinde zergerlik buıymdar, turmystyq zattar, monshaqpen árlengen túskıiz, Nıkolaı patsha kezeńiniń tıyndarynan jasalǵan qapsyrma qoıylǵan kórme balalardyń tanym kókjıegin keńeıtip qana qoımaı, bilimderin de jetildire tústi. Sondaı-aq, mektep oqýshylarynyń asyq oınaý, arqan tartý, qazaqsha kúres syndy ulttyq oıyndardan jarysqa túsýi merekeniń shyraıyn kirgizdi. «Ulttyq mereke – urpaqqa ónege» taqyrybynda ótken mádenı shara sońynda oǵan atsalysqan barlyq óner ujymy men oqýshylar erekshe kóńil-kúımen tarqasty. Láıla EDILQYZY, «Egemen Qazaqstan». ASTANA.