Kópshilik balalardy saqtandyrý tek asa belsendi nemese kásibı sportpen aınalysatyndarǵa ǵana kerek dep oılaıdy. Alaıda tájirıbe kórsetkendeı, balalar túrli qaýipti jaǵdaıǵa kúndelikti ómirde kóbirek ushyraıdy, dep jazady Egemen.kz.
Bala rolıkten qulap, jattyǵý kezinde jaraqat alyp, batýtta sekirip júrip qolyn syndyryp alýy nemese demalys kezinde aýyryp qalýy múmkin. Keı jaǵdaıda qarapaıym qyzýdyń ózi asqynyp, balaǵa shuǵyl medısınalyq kómek qajet bolady. Mundaıda ata-analar tek balanyń jaǵdaıyn emes, emdelýge ketetin shyǵyndy da oılaýǵa májbúr.
Memlekettik medısına belgili bir kómekti ótegenimen, aqyly tekserýler, ońaltý, qosymsha em-dom jáne jedel qabyldaýlar kóbine otbasy bıýdjetine salmaq túsiredi. Sondyqtan kóptegen ata-ana saqtandyrýdyń mańyzyn qıyn jaǵdaıǵa tap bolǵannan keıin ǵana túsinedi.
Astanada balalardy qorǵaý kúnine oraı 100-ge jýyq is-shara ótedi
Mamandardyń aıtýynsha, mundaıda eń tıimdi sheshimderdiń biri – jazataıym oqıǵalardan saqtandyrý. Bul polıs jaraqat alý, aýrýhanaǵa jatqyzylý, kúıik shalý jáne basqa da túrli jaǵdaılarda ótemaqy tóleýdi qarastyrady. Keıbir saqtandyrý túrleri tipti ata-ananyń bala kútimine baılanysty ýaqytsha eńbekke jaramsyz bolýyn da qamtıdy.
Alaıda saqtandyrý rásimdeý kezinde mańyzdy jaıttardy eskergen jón. Mysaly, barlyq polıs sporttyq jaraqattardy avtomatty túrde qamtymaıdy. Eger bala fýtbol, hokkeı, júzý, gımnastıka nemese jekpe-jek sekildi sport túrlerimen aınalyssa, saqtandyrý kelisimshartynda bul tarmaq naqty kórsetilýi tıis. Keı arzan polıster sport kezindegi jaraqattardy múlde ótemeıdi nemese tólem kólemin shekteıdi.
Jaz mezgilinde táýekel odan saıyn artady. О́ıtkeni balalar lagerlerge, sporttyq jıyndarǵa, ekskýrsııalar men joryqtarǵa jıi qatysady. Osyndaı kezde kútpegen jaǵdaılar da jıileı túsedi.
Kóp ata-ana lager uıymdastyrýshylary barlyq jaýapkershilikti óz moınyna alady dep esepteıdi. Biraq tájirıbede ujymdyq saqtandyrýdyń qamtý aıasy shekteýli bolýy múmkin. Keıde saqtandyrý tek lager aýmaǵynda ǵana jaramdy bolyp, joldaǵy nemese kóshpeli is-sharalardaǵy jaǵdaılardy qamtymaıdy.
Jazǵy demalys kezinde balalar qaýipsizdigi qalaı qorǵalady?
Sarapshylar ata-analarǵa saqtandyrý sharttaryn muqııat oqyp shyǵýǵa keńes beredi. Ásirese sporttyq jarystar, belsendi demalys jáne saparlarǵa qatysty tarmaqtarǵa nazar aýdarý mańyzdy.