«Qazgıdromet» elimizdiń basym bóliginde aýa raıynyń qolaısyzdyǵyna baılanysty eskertý jarııalady, dep habarlaıdy Egemen.kz.
Sınoptıkterdiń málimetinshe, Astanada jańbyr jaýyp, naızaǵaı oınaıdy. Jeldiń ekpini sekýndyna 15-20 metrge deıin jetedi.
Almaty qalasynda joǵary órt qaýpi saqtalady. Al Almaty oblysynda kúndiz aýa temperatýrasy +35…+37 gradýsqa deıin kóterilip, óńirdiń birqatar aýmaǵynda tótenshe órt qaýpi kútiledi. Qonaev qalasynda da aptap ystyq boljanyp otyr.
Shymkent pen Túrkistan oblysynda jańbyr men naızaǵaı kútiledi. Qyzylorda oblysynda órt qaýpiniń deńgeıi óte joǵary bolmaq.
Jambyl oblysynda kúndiz aýa temperatýrasy +39 gradýsqa deıin kóterilip, respýblıkadaǵy eń joǵary kórsetkish tirkeledi. Sonymen qatar Abaı, Jetisý, Shyǵys Qazaqstan jáne Almaty oblystarynda +35…+38 gradýs aralyǵynda qatty ystyq bolady.
Aqmola, Qostanaı, Pavlodar, Qaraǵandy, Abaı, Batys Qazaqstan, Atyraý jáne Mańǵystaý oblystarynda jańbyr, naızaǵaı men burshaq kútiledi. Keıbir óńirlerde jeldiń ekpini 20-28 m/s-qa deıin kúsheıýi múmkin.
Soltústik Qazaqstan, Qostanaı, Qaraǵandy jáne Batys Qazaqstan oblystarynda qubylmaly aýa raıy saqtalady.
Sınoptıkter turǵyndardy aýa raıynyń kúrt ózgerýine baılanysty saqtyq sharalaryn qatań saqtaýǵa shaqyrady.
Eske sala keteıik, «Qazgıdromet» usynǵan boljamǵa sáıkes, maýsym jáne tamyz aılary ádettegiden ystyq bolady. Qazaqstan aýmaǵynda aýa temperatýrasy klımattyq normadan 1-2 gradýsqa joǵary bolýy múmkin.