Úkimet otyrysynda Qaraǵandy oblysynyń ákimi Ermaǵanbet Bólekpaev 10 temirjol vokzaly jáne 4 platforma jańǵyrtylyp jatqanyn, barlyq nysandarda qurylys-montajdaý jumystary 94%-ǵa aıaqtalǵanyn málimdedi, dep habarlaıdy Egemen.kz.
Aımaq basshysynyń aıtýynsha, halyqtyń az qozǵalatyn toptarynyń qajettilikteri eskerile otyryp, qurylys jumystaryn 5 merdiger uıym oryndap jatyr, oǵan 120 jumysshy jumyldyrylǵan.
Elimizde 30 temirjol vokzaly jańartyldy
Búginde 8 vokzal men platforma boıynsha memlekettik saraptamanyń oń qorytyndysy bar. Taǵy 6 joba saraptamadan ótip jatyr. Olardyń qorytyndylary josparly túrde shilde aıynda shyǵady. Qarjylandyrý máselesi tolyǵymen sheshilip otyr.
«Jobalardy júzege asyrý úderisi turaqty baqylaýǵa alynǵan. «Qazaqstan temir joly» ulttyq kompanııasymen birlesip, rekonstrýksııa barysynda týyndaıtyn máselelerdi jedel sheshýdemiz. Barlyq nysandar boıynsha qurylys-montaj jumystaryn osy jyldyń shilde aıynda aıaqtaýdy josparlap otyrmyz», dedi oblys ákimi.
Budan birer aı buryn temirjol vokzaldaryn jańǵyrtý qarqynyn Úkimet basshysy synǵa alǵany týraly habarlaǵan edik.