Atyraý oblysynda bir otbasynyń tórt múshesiniń ólimine qatysty is boıynsha sot otyrysy jalǵasyp jatyr. Aıyptalýshy Sultan Sársemálıev qylmystan keıin Túrkııa arqyly Mekkege baryp, Qudaıdan keshirim suramaq bolǵanyn málimdedi, dep habarlaıdy Egemen.kz.
Is Atyraý oblysynyń qylmystyq ister jónindegi mamandandyrylǵan aýdanaralyq sotynda qaralyp jatyr.
Aıyptalýshy sotta qylmys jasaǵannan keıin elden ketý týraly sheshim qabyldaǵanyn aıtty.
«Túrkııaǵa qashyp ketýdi uıǵardym. Jasyrynyp júrýdi maqsat etpedim. Tek Qudaıdan keshirim suraǵym keldi. Ne istegenimdi túsindim. 10 qarashadan keıin Túrkııa arqyly Mekkege bardym. Ol jaqta shamamen on kúndeı boldym. Tipti sol jerde óz-ózime qol jumsaý týraly oı keldi. О́ıtkeni meni Qudaıdan basqa eshkim túsinbeıdi dep oıladym. Biraq olar da kináli dep esepteımin, men olardy sebepsiz óltirgen joqpyn», dedi aıyptalýshy.
Tergeý nusqasyna sáıkes, qaıǵyly oqıǵa 2025 jyldyń sońynda Jangeldın aýylynda bolǵan. Sol kezde otbasynyń tórt múshesi – ata-anasy, uly men qyzy iz-túzsiz joǵalyp ketken.
Aıyptaý tarapynyń málimetinshe, kúdikti ózine kúmán týǵyzbaý úshin týystary emdelýge ketip qalǵan degen aqparat taratqan. Sonymen qatar marqum bolǵan 32 jastaǵy baldyzy Naýryzdyń atynan týystarymen habarlasyp, messendjerler arqyly hat jazyp otyrǵan.
2026 jylǵy 6 qańtarda egde jastaǵy erli-zaıyptylardyń máıitteri óz úıleriniń aýlasyndaǵy saraıdan tabylǵan. Osydan keıin kúdikti halyqaralyq izdeýge jarııalanǵan.
Aqpan aıynyń sońynda Sársemálıev jubaıymen birge Indonezııadaǵy Balı aralynda ustalyp, keıin Qazaqstanǵa ekstradısııalandy.
Qaıta júrgizilgen tergeý barysynda ol kinásin moıyndap, áıeliniń eki baýyrynyń máıitteri jasyrylǵan oryndy kórsetken.
Qazirgi ýaqytta is boıynsha sot prosesi jalǵasyp jatyr.