Jyl saıyn 23 maýsymda elimizde Memlekettik qyzmetshi kúni atap ótiledi. Táýelsiz memleketimizdiń halyqaralyq bedelin arttyrýda, ekonomıkany damytýda jáne áleýmettik salany jaqsartýda memlekettik qyzmetshilerdiń róli aıryqsha.
Osy rette ózimiz eńbek jolyn ótken kezeńnen bastaı otyryp, burynǵy memlekettik qyzmet júıesine qysqasha toqtalǵym keledi. Biz keńes odaǵy júıesi ornyqqan, tártibi qatań kezeńde qyzmetke aralastyq.
Sol ýaqytta maman daıarlaý júıesi birizdi jolǵa qoıylǵan edi. Mektepte pıoner, komsomol uıymdary arqyly jastar ujymmen jumys isteýdi, jınalys ótkizý men jaýapkershilik alýdy úırenetin. Bul bolashaq basshynyń uıymdastyrýshylyq qabiletin qalyptastyratyn alǵashqy mektep bolatyn.
Mektep bitirgen soń tehnıkým nemese joǵary oqý ornyn aıaqtaǵan jas maman joldamamen eńbekke aralasyp, qyzmetin tómengi satydan bastaıtyn. «Eń bastysy – adal eńbek etý» degen ustanym basym edi. «Qyzmetimdi nege ósirmeıdi?» degen oı ol kezde kóptiń sanasyna kele bermeıtin. Ár qadamyń, ár isiń turaqty baqylaýda bolatyn.
Tájirıbeli basshylar jas mamannyń bilimine ǵana emes, tártibi men minez-qulqyna da mán beretin. Qyzmettik ósý birden emes, satylap júzege asatyn. Ár basqyshta ózińdi dáleldegen jaǵdaıda ǵana kelesi deńgeıge kóterilý múmkin edi. Bul júıe adamdy shyńdap, tájirıbesin tereńdetetin. Sol kezeńde otbasylyq qundylyq ta joǵary baǵalanatyn. Otbasyn saqtaı almaǵan nemese tártip buzǵan azamattyń qyzmettik ósýi shekteletin. Árbir áreket eńbek pen jaýapkershilik ólshemimen baǵalanatyn.
Búgingi kúnge kelsek, keıbir jaǵdaıda qyzmetke taǵaıyndaý úderisinde olqylyq kezdesip jatady. Keıbir azamattar tájirıbesiz kúıde birden joǵary laýazymǵa taǵaıyndalady. Mundaı jaǵdaıda olar júıeni tolyq meńgerip úlgermeı jatyp, kúrdeli máselelermen betpe-bet keledi. Bul óz kezeginde basqarý sapasyna áser etýi múmkin.
Sondyqtan jas mamannyń eńbek joly tómennen bastalyp, tájirıbe arqyly qalyptasqany durys. Ýnıversıtette alǵan bilim men naqty óndiristik tájirıbe – eki bólek dúnıe. 25 jasynda depýtat bolǵandar bar, alaıda ómirlik tájirıbe men kásibı kemeldik kóbine ýaqytpen qalyptasady.
Keı jaǵdaılarda qyzmettik ókilettilikti asyra paıdalaný nemese jaýapkershilikten tys áreketter de baıqalyp qalady. Mundaı qubylys qoǵam tarapynan synǵa ushyraıdy. Bul rette uly Abaıdyń «Bolys boldym minekeı» óleńindegi bılikke syn kózben qaraý, ádiletsizdikti áshkereleý ıdeıalarynyń máni búgin de ózekti.
Árbir memlekettik qyzmetshi qandaı laýazymda bolsa da, halyqqa qyzmet etý – basty mindet ekenin umytpaýǵa tıis.
2026 jyly 19 mamyrda Memleket basshysy Qasym-Jomart Toqaev «Qazaqstan Respýblıkasynyń memlekettik qyzmeti týraly» jańa zańǵa qol qoıdy. Bul qujatta memlekettik qyzmetshiniń quqyqtary men mindetteri naqty aıqyndalǵan. Qyzmetke qabyldaý kezinde úmitkerdiń bilimi, tájirıbesi, kásibı biligi men etıkalyq ustanymy jan-jaqty eskeriledi.
Jalpy, memlekettik qyzmetke ornalasý – úlken jaýapkershilik júkteıtin jańa kezeń. Ol ár azamattan tártip pen kásibılikti talap etedi. Aldaǵy ýaqytta irikteý júıesin odan ári jetildirip, bilikti mamandardy daıarlaýǵa erekshe kóńil bólinýi qajet.
Memlekettik qyzmetshi elge úlgi bolar azamat bolýǵa tıis. Onyń júris-turysy, sóılegen sózi, qoǵamdyq minezi – bári de nazarda. Ol qoǵamǵa jat áreketten aýlaq bolýy kerek. Qumar oıyn, zııandy ádetterge áýestik qyzmettik bedelge ǵana emes, zań aldyndaǵy jaýapkershilikke de áser etedi.
Sybaılas jemqorlyq nemese zań buzýshylyqqa jol bergen memlekettik qyzmetshi qatań jaýapkershilikke tartylady. Sondyqtan árbir memlekettik qyzmetshi tek óz mindetin oryndaýmen shektelmeı, el ishinde memlekettik qyzmettiń bedelin arttyrýǵa, onyń abyroıyn kóterýge úles qosýǵa tıis. Halyq senimin aqtaý – eń úlken jaýapkershilik.
Qurmanǵalı ÝÁLI,
qoǵam qaıratkeri