Daryndyǵa – dańǵyl jol

Ras, keıingi kezde aýdan­da daryndy oqý­shy­lardy qoldaý dástúr­ge aına­lyp keledi. Jaqyn­da respýblıkalyq jáne halyq­aralyq olımpıadalar men ǵy­lymı jobalarda top jarǵan oqýshylar men olardyń jetek­shileri ulyqtaldy. Qaraózen mektep-lıseıinde «Daryndyǵa dara jol» atty dástúrli kesh ótti. Taǵylymdy is-sharaǵa oblys ortalyǵynan bilim salasynyń laýazymdy basshylary arnaıy keldi.

Qaztalov aýdanynyń ákimi Aslanbek Sarqulovtyń aıtýynsha, keıingi úsh jylda aýdan­da 4 mektep paıdalanýǵa berilgen. Taǵy eki mektep kúrdeli jón­deý­den ótip, materıaldyq tehnı­kalyq baza nyǵaıtylǵan. Munyń bári bilimniń sapasyn da arttyrary sózsiz.

О́tken oqý jylynyń aýyz toltyryp aıtarlyqtaı tabysy da mol dedik. Aýyl balalary ásirese ana tiline júırik. My­saly, respýblıkalyq olımpıadada Alma Orazbaeva atyndaǵy mekteptiń 11-synyp oqýshysy Dana Serikqyzy qazaq tili men áde­bıeti páninen I oryn, Qara­ózen mektep-lıseıiniń 10-synyp oqýshysy Aıaýlym Tilepbergen II oryn, Ǵınııat Moldashev atyndaǵy mekteptiń 11-synyp oqýshysy Mathat Rashıdov III oryndy jeńip alǵan.

Respýblıkalyq shyǵarma­shy­lyq jáne zııatkerlik baı­qaýlarda top jarǵan oqýshylar da az emes. Kenjebek Meńdálıev atyndaǵy mekteptniń 11-synyp oqýshysy Maqsat Hamzın «Altyn túlek» matematıkalyq olımpıadasynyń respýblı­kalyq kezeńinde III oryn alsa, Qaraózen mektep-lıseıiniń 11-synyp oqý­shysy Aıat Shoqat osy olımpıa­dadan III oryn ıegeri atandy. Birlik orta mektebiniń 11-synyp oqýshysy Aızada Joldybaı, Ǵumar Qarash atyndaǵy mektep-gımnazııasynyń 11-synyp oqý­shysy Qaraqat Nurbolat, Qaz­talov mek­tep-lıseıiniń 11-synyp oqý­shysy Aıaýlym Jumageldi de respýblıkalyq matematıkalyq olımpıadada júldeli oryn ıelengen.

Súleımen Esetov atyndaǵy mektep-bóbekjaı kesheniniń 8-synyp oqýshysy Aqjúrek Temirhanov «Tabıǵatty aıala» res­pýblıkalyq forýmynda II oryn alsa, Kenjebek Meń­dálıev atyndaǵy mekteptiń 11-synyp oqýshysy Nargıza Eleýsinova respýblıkalyq «Aqberen» baıqaýynda II orynǵa ıe boldy. Aqpáter orta mektebiniń 10-synyp oqýshysy Aısáýle Talǵatqyzy XXVI respýblıka­lyq «Abaı oqýlary» baıqaýyn­da II oryn ıelenip, ónerimen kópshilikti tánti etti. Ǵınııat Moldashev atyndaǵy mekteptiń 8-synyp oqýshysy Ámına Dýmanqyzy respýblıkalyq «Ábish oqýlarynda» II oryn ıelen­se, Alma Orazbaeva mekte­biniń 11-synyp oqýshysy Ǵazız­jan Nurdaýlet «Aqberen» baı­qaýynan III oryn jáne respýb­lıkalyq «Ábish oqýla­rynan» I oryn jeńip aldy.

Respýblıkalyq ǵylymı jo­balar konkýrsynda úzdik tanyl­ǵan jas zertteýshiler de az emes. Súleımen Esetov atyn­­daǵy mektep-bóbekjaı keshe­­niniń 5-synyp oqýshysy Aılana Nurlanqyzy, Qaztalov mektep-lıseıiniń oqýshylary Muha­medálı Maqsatuly, Eńlik Aman­jolqyzy, Mırali Mırlanuly, Shyntemir Muhtar­uly jáne Bostandyq orta mek­tebiniń ­7-synyp oqýshysy Saıat Jaıyq­uly respýblıkalyq «Zerde» ǵylymı jobalar baı­qaýynda jo­ǵary nátıjege qol jetkizdi.

Mine, osy oqýshylar baıqaýda jeńip alǵan syılyǵynan bólek, aýdan basshylyǵy tarapynan da qurmet kórdi. Oqýshylarǵa noýtbýk, aqshalaı sertıfıkat­tar tabystalyp, jetekshi ustaz­dar­ǵa qarjylaı syıaqy beril­di. Respýblıkalyq pándik olımpıada jeńimpazynyń jetek­shisine 1 mln teńge, II orynǵa 700 myń teńge, 3 orynǵa 500 myń teńge kóleminde qarjylaı syıaqy tıdi. Respýblıkalyq shyǵarmashylyq jáne zııatker­lik baıqaýlar men ǵylymı jobalar konkýrsynda úzdik tanylǵan oqýshylar men jetekshileri de qarjylaı syılyqqa ıe boldy.

 – Osydan úsh jyl buryn shákirtim Aqjan Zeınollaqyzy respýblıkalyq olımpıadada birinshi oryn alyp, ustazy retinde 500 myń teńgelik sertıfıkatpen marapattalǵan edim. Búgin Aıaýlym shákirtimniń arqasynda taǵy qurmet kórdim. Munyń barlyǵy ustaz ben shákirtke artylǵan senim, qoshemet pen qoldaý. Bilim áleminiń janashyrlaryna myń alǵys! – deıdi Qaraózen mektep-lıseıiniń matematıka pániniń muǵalimi, pedagog-moderator Ásemjan Tasqalıeva.

Aıta keteıik, aýdannyń úzdik oqýshylaryn qurmettep, qar­jylaı qoldaýǵa aýdan áki­mi men aýdan­dyq máslıhat depýtat­tary, ká­sipkerler muryn­dyq bol­ǵan. Sondaı-aq Oral qalasyn­daǵy «Batys Bıznes» JShS dı­rek­tory Aıan Serikuly da jerles­te­­riniń bastamasyna qomaqty úles qosqan. Bul qoldaý alda da jal­­­­ǵaspaq. Osy kúz­de aýylda tu­ra­­­tyn, mal us­taı­tyn ár ustazǵa 1 tir­­­keme shóp tegin beriletin boldy.

Batys Qazaqstan oblysy