Parlament Májilisiniń Ekologııa máseleleri jáne tabıǵat paıdalaný komıteti, Astanadaǵy EQYU Baǵdarlamalar keńsesiniń qoldaýymen, elimizdiń Energetıka mınıstrligi jáne «Jasyl akademııa» ǵylymı-bilim berý ortalyǵymen birlese otyryp, «jasyl» ekonomıkaǵa ótý kezindegi zańnama aıasyn jetildirý: qaldyqtardy basqarý men shyǵaryndylardy retteý» taqyrybynda dóńgelek ústel uıymdastyrdy.
Otyrysqa tóraǵalyq etken Aleksandr Mılıýtın: «Elbasy Nursultan Nazarbaev osy shaqyrylymdaǵy Parlamenttiń ekinshi sessııasyn ashý kezinde «Jasyl ekonomıkaǵa» ótý, jańartylatyn energetıkaǵa negizdelgen ekologııalyq taza tehnologııalarǵa quqyqtyq negizdeme jasaý zań shyǵarý jumysynyń mańyzdy ólshemderiniń biri ekenin atap ótken bolatyn», – deı kelip, ózi basshylyq etip otyrǵan komıtettiń parnıktik gazdardyń shyǵaryndylaryn qysqartý jáne olardy baqylaý jolynda keshendi jumystar atqaryp kele jatqanyn alǵa tartty. 2013 jyldyń qańtar aıynan bastap Qazaqstanda zańdy túrde parnıktik gazdar shyǵaryndylaryn saýdalaý men kvotalaý júıesi engizildi.
Qazirgi ýaqytta bir bóliginde parnıktik gazdar qaldyqtaryn retteýge qatysty ózgeristerdi kózdeıtin «Qazaqstan Respýblıkasynyń keıbir zańnamalyq aktilerine ekologııa máseleleri boıynsha ózgerister men tolyqtyrýlar engizý týraly», sondaı-aq, «jasyl ekonomıka» máseleleri boıynsha ózgeristerge qatysty zań jobalary komıtet qaraýyna berildi. Osy qujattardy qabyldaý Qazaqstannyń «jasyl» ekonomıkaǵa kóshýiniń taǵy bir kezeńi bolary sózsiz.
Osy jolda sheshýdi qajet etetin ózekti máselelerge nazar aýdarǵan A.Mılıýtın problemalyq jaıttardy da atap ótti.
Odan ári Energetıka mınıstri Vladımır Shkolnık pen Astana qalasyndaǵy EQYU Keńsesiniń basshysy Natalııa Zarýdna jáne «Jasyl akademııa» ǴBO dırektory Baqyt Esekına sóz sóılep, Joǵary ekonomıka mektebiniń Qorshaǵan orta jáne tabıǵı resýrstar ekonomıkasy ortalyǵynyń dırektory Georgıı Safonov, BUUDB jobasynyń menedjeri, ISWA qaldyqtar boıynsha halyqaralyq qaýymdastyǵynyń múshesi Nına Gor baıandama jasady.
Talqylaý qorytyndysy boıynsha elimizde qaldyqtardy basqarý men parnıktik gazdar shyǵaryndylaryn retteý salasyndaǵy zańnamany jetildirý jóninde usynymdar ázirlendi. Atap aıtqanda, 2020 jylǵa qaraı shyǵaryndylardy azaıtý boıynsha is-qımyldar josparyn ázirleý usynyldy, dep habarlady Májilistiń baspasóz qyzmeti.