Oqýshylar jobalary granttarǵa ıe boldy

Almatyda osy aptada «Ekologııa boıynsha balalar bıznes-jobalary» IX respýblıkalyq baıqaýynyń jeńimpazdary anyqtalyp, ekologııa men qorshaǵan ortany qorǵaý salasyndaǵy oqýshylardyń úzdik jumystarynyń jármeńkelik kórmesi uıymdastyryldy.

Qazaqstanda «Ekologııa boıynsha balalar bıznes-jobalary» atty respýblıkalyq baıqaý toǵyz jyl qatarynan ótkizilip keledi. Bul baıqaýdy «Jastar jetistikteri» qoǵamdyq qory men «Shevron» kompanııasy Bilim jáne ǵylym mınıstrligimen birlese otyryp uıymdastyrady. Osynaý baıqaý – jas urpaqtyń nazaryn ekologııa máselelerine jáne tabıǵat qorlaryn únemdi paıdalanýǵa aýdarýdy kózdeıdi. «Shevron» áleýmettik tur­ǵyda jaýapkershiligi joǵary trans­ulttyq kompanııa bolǵandyqtan, óz qyzmetinde tabıǵatty qorǵaýǵa baǵyttalǵan kóptegen jobalardy júzege asyryp keledi. Biz jastarǵa ekologııalyq bilim berý men olardyń boıyndaǵy ómirlik mańyzdy daǵdylaryn damytýǵa kóp nazar aýdaramyz. Sońǵy jıyrma jyl ishinde ekologııa salasyndaǵy kóptegen jobalar men shyǵarmashylyq bastamalarǵa qoldaý kórsettik», deıdi Úkimetpen jáne jurtshylyqpen baılanys departamentiniń dırektory Erkin Zikibaev. Bıylǵy jyly 14 jeńimpaz, olardyń ishinde, jeke qatysýshylar men mektep ujymdary, balalar úıleriniń tárbılenýshileri, elimizdiń túrli aımaqtaryndaǵy múmkindikteri shekteýli balalar, jalpy somasy shamamen eki mıllıon teńgege teńeletin granttyq qarjylandyrýǵa ıe boldy. So­nymen qatar, 10 joba uıym­das­tyrýshylar tarapynan maqtaý qaǵazdarymen marapattalady. Kóktemde dástúrge aınalǵan bıylǵy baıqaýǵa shamamen 130 balalar jobasy qatysqan. Statıstıka boıynsha, qoldaý kórsetilgen baıqaý sheńberinde bastapqyda qarjylandyrylǵan jobalardyń 35 paıyzy óz jumysyn qarjylandyrý aıaqtalǵannan keıin de jalǵastyrýda. Atalmysh baıqaýmen qatar, Bilim jáne ǵylym mınıstrliginiń qoldaýymen Ekologııalyq-eko­nomıkalyq bilim berý jáne oqý­shylardy kásibı baǵdarlaý boıynsha oqý-ádistemelik qural­da­rynyń II respýblıkalyq syrttaı baıqaýy da ótkizildi. Sebebi, shyǵarmashylyq bastamany bilikti ustazdardyń qoldaýynsyz damytý múmkin emes. Jınaqtalǵan úzdik qazaqstandyq pedagogıkalyq tájirıbe jalpylanyp, almanah retinde baspadan shyǵarylyp, sodan keıin elimizdiń barlyq aımaqtaryna taratylmaq. Aınash ESALI, «Egemen Qazaqstan». ALMATY.