Keshegisin umytpaǵan búgingisin baǵalaı biledi

Surapyl soǵystyń aýyr da azapty kúnderin basynan ótkizip, jaýmen arpalysqan, eliniń azat­­tyǵyn óz ómirinen joǵary qoıyp, Otany úshin ólimge bas tikken ja­ýynger atamyzdyń biri – Nurah­met Kósherbaev. Ol 1898 jyly qazirgi Panfılov aýdanynyń Kishi Shyǵan aýylynda dúnıege kelgen. 1941 jyly eli men jeri, Otany úshin Uly Otan soǵysyna attanady. 1942 jyly 313-shi atqyshtar polkiniń quramynda bolyp, Kýrsk doǵasyndaǵy qandy shaıqasqa qatysady. 1943 jyly qańtar aıynyń 13-inde maıdannan «soǵysta qaza boldy, Kýrsk qalasyndaǵy Terbýha selosynda jerlendi» degen habar keledi. Alaıda, jaryq dúnıeni kóretin kúni bar eken, qaza bolǵan jaýyngerlerdi jerlep jatqanda, keýdesinde demi bar Nurahmet Kósherbaev selo mańaıyndaǵy gospıtalǵa jetkiziledi. Emde­lip shyqqannan keıin de talaı shaıqastarǵa qatysady. Berlınge deıin azamattyq boryshyn atqaryp, 1945 jyldyń kúzinde aman-saý eline oralady. Soǵystan keıin kóp jyl «Ok­tıabrdiń 40 jyldyǵy» kolhozynda beıbit eńbekpen shuǵyldandy. Zaıyby Jumash ekeýi bala ósirip, tárbıeledi. Kolhozda qyzmet atqaryp, tabandy eńbek etti. Nurahmet Kósherbaevtyń eren eńbegi úkimet tarapynan elenip, kóptegen medal, ordendermen, solardyń ishinde Eńbek Qyzyl Tý ordenimen marapattalǵan, Qurmet gramotalarynyń ıesi. «Keshegisin umytpaǵan, búgin­gisin baǵalaı biledi» demekshi, erlerimizdiń erligi umytylmaıdy, qan maıdanda kókiregin oqqa tósep, jaýdy oısyrata jeńgen jaýjúrek atalarymyzdyń osyndaı uly erlikteri maqtaýǵa ábden laıyqty. «Atadan mal qalǵansha, tal qalsyn» deıdi halyq danalyǵy, soǵys jáne eńbek ardageri Nur­ahmet Kósherbaevtan taraǵan urpaq búginde ósip-ónip, ata dań­qyn asqaqtatyp, egemendi elimiz­diń erteńi eńseli bolýy úshin abyroımen eńbek etip keledi. Nurbol ÁLDIBAEV, «Egemen Qazaqstan». Almaty oblysy.