Yrǵyzbaı Doshanauly atyndaǵy týrnırde mońǵol balýany jeńiske jetti
Barqytbel baýyrynda qazaq kúresinen Yrǵyzbaı Doshanauly atyndaǵy halyqaralyq gran-prı týrnıri joǵary dárejede ótti. Bıyl úshinshi márte uıymdastyrylǵan balýandar básekesine 38 sportshy qatysty. Olardyń arasynda Qazaqstan, Armenııa, Ázerbaıjan, Reseı, Belarýs, Qytaı, Tájikstan, Ýkraına, Estonııa, Lıtva, Koreıa, О́zbekstan, Qyrǵyzstan, Grýzııa syndy 16 elden kelgen sportshylar bar.
Tarbaǵataı aýdanynyń ortalyǵy – Aqsýat aýylynda ótken dúbirli básekege oblys ákiminiń orynbasary Jaqsylyq Omar, Mádenıet jáne sport mınıstrligi sport komıteti tóraǵasynyń orynbasary Ábil Dóńbaı, FILA halyqaralyq kúres túrleri komıtetiniń tóraǵasy Gıntaýtas Vıleıta, Dúnıejúzilik qazaq kúresi federasııasynyń prezıdenti Serik Tókeev jáne oblystyq quqyq qorǵaý organdarynyń jetekshileri qatysty. Atalǵan týrnırge Premer-Mınıstrdiń orynbasary Berdibek Saparbaev arnaıy quttyqtaý jedelhatyn joldaǵan eken. Ony oblys ákiminiń orynbasary oqyp berdi.
Týrnırge kileń saıdyń tasyndaı azýly balýandar, álemdik, qurlyqtyq jarystardyń júldegerleri men jeńimpazdary qatysty. 80 kıloǵa deıingi salmaq dárejesinde aqtyq synǵa Qýanysh Muratov shyǵyp, Grýzııa balýany G.Perýlavany jambas ádisimen taza utty. Tarbaǵataı aýdanynyń týmasy Q.Muratov ógiz balýan ataǵyn ótken jyly da jeńip alǵan bolatyn. Kórermenderdiń Aıbek Nuǵymarov pen Talǵat Ámirenovtiń kúresine kózaıym bolǵanyn aıta ketken abzal. Kilemde bir-birin ala almaǵan balýandarǵa tóreshiler beldesý belgilep, nátıjesinde Aıbek aqtyq synǵa shyqty. Túıe balýan ataǵy úshin bolǵan tartysta Aıbek Nuǵymarov pen mońǵol balýany Altangerel Davaanıan arasyndaǵy beldesý týrnırdiń basty básekesi boldy. Az ǵana basymdyqpen bul synda Mońǵolııa sportshysy bas júldeni qanjyǵaǵa baılap, 10 myń AQSh dollaryna ıe boldy.
Dástúrli týrnırdi uıymdastyrýshy, qazaq kúresiniń janashyry Bádelhan Kamalhanulynyń aıtýynsha, Yrǵyzbaı Doshanauly atyndaǵy týrnır búginde óz maqsatyna jetip, el men jerdi nasıhattaýdyń tıimdi jolyna aınaldy. Shynynda, balýandar básekesiniń ereksheligi – oblys ortalyǵynda emes, shetkeri shekaralyq aýdanda ótkizilýi bolsa kerek.
Dýman ANASh, «Egemen Qazaqstan».
Shyǵys Qazaqstan oblysy, Tarbaǵataı aýdany.
Sýrette: tuǵyrdaǵy jeńimpazdar.
Sýretti túsirgen Ǵylymbek Sábıtov.