Kelesi jyly elimizde alǵash ret Qysqy Ýnıversıada ótedi. Bul – dúnıejúzi stýdentteriniń qysqy sport túrlerinen qatysatyn jarysy. Qazirgi kezde Almatyda osynaý tórt jylda bir keletin dodany ótkizýge daıyndyq jumystary júrip jatyr. Sportshylarymyz da shetelde ótip jatqan úlkendi-kishili jarystarǵa, oqý-jattyǵý jıyndaryna qatysyp, Ýnıversıadaǵa daıyndyqtaryn bastap ketti.
Bul Oıyndar keıbir sańlaqtarymyz úshin ómirinde alǵash ret qatysatyn jarys bolady. Al keıbir tájirıbesi bar, kóptegen dodalarda ysylyp, jeıdesin tozdyrǵan sportshylarymyzǵa Ýnıversıada altyn medaldardy kúrep alatyn alańǵa aınalady dep oılaımyz.
Búginde elimizde halyqqa salamatty ómir saltyn nasıhattaýda, sport pen deneshynyqtyrýdy damytýda qolda bar jaǵdaıdyń bári jasalyp jatyr. Sonyń bir dáleli – memlekettiń qandaı da bolsyn daǵdarysqa qaramaı, adamnyń sportpen aınalysýyna, elimizde halyqaralyq jarystardyń ótýine jaǵdaı jasaýy.
Qysqy Ýnıversıadaǵa jer-júziniń ər elinen 2000-nan astam sportshy qatysady delinýde. Sondyqtan ol bir jaǵynan sporttyq jarys qana emes, álemniń ár túkpirinen Qazaqstanǵa jarysqa qatysýǵa asyǵa keletin adamdar úshin ásem Almatynyń, arý Alataýdyń keremet tabıǵatyn kórip qaıtatyn demalys ýaqyty bolady. Demek, Ýnıversıada týrızmdi damytýǵa da septigin tıgizedi degen sóz. Osy jerde aıtatyn nárse, 2011 jyly Astana men Almatyda Qysqy Azıada oıyndary ótken soń, saryqurlyqtyń keıbir jattyqtyrýshylary men sportshylary basqa emes, bizdiń elde ǵana oqý-jattyǵý jumystaryn ótkizýdi qalaǵany tegin emes. Endeshe, Qysqy Ýnıversıada elimizdiń ımıdjin qalyptastyryp, týrızmdi damytatyn taǵy bir alańǵa aınalýy ǵajap emes. Biz osyǵan tilektespiz!
Qaıyrgeldi Janpeıisov, Ulttyq shtattyq komandalar jáne sport rezervi dıreksııasynyń dırektory:
– Búkilálemdik Qysqy Ýnıversıada oıyndary saıası jáne sporttyq joba ǵana emes, sondaı-aq Almatynyń damýy men kórkeıýine septigin tıgizetin biregeı joba. О́ıtkeni, barlyq salynyp jatqan sporttyq nysandar Ýnıversıada aıaqtala sala, halyqtyń ıgiligine beriledi. Bizdiń sportshylar alys elderge barmaı, óz elimizdegi sporttyq nysandarda jattyǵady. Osylaı ýaqyt pen qarjyny únemdeı alamyz. Ýnıversıadanyń arqasynda qanshama adam jumyspen qamtylady. Bolashaqta Olımpııa oıyndaryn ótkizip jatsaq, taǵy da kópke shashylmaımyz. О́ıtkeni, bizde barlyǵy daıyn. Ýnıversıada nysandarynda álem chempıonattary men kýboktary, basqa da úlken jarystardy ótkizýge bolady.
Ýnıversıadada bizdiń sportshylar jaqsy nátıje kórsetedi dep úmittenemin. Degenmen, 2011 jylǵy Azııa oıyndaryndaǵy nátıjemizdi qaıtalaý qıynǵa soǵady. Sebebi, ol kezde tek Azııa elderiniń komandalary qatyssa, keleside álemniń ár túkpirinen sportshylar keledi. Bizdiń sportshylarǵa jankúıerlerdi jerge qaratýǵa bolmaıdy. Sportshylarymyzdyń baǵy men baby kelisip, el namysyn abyroımen qorǵap shyǵatynyna senimdimin.
Iýlııa Galysheva, 2015 jylǵy Ýnıversıada oıyndarynyń chempıony:
– Ispanııanyń Granada qalasynda ótken Qysqy Ýnıversıadaǵa qatystym. Bul men alǵash ret qatysqan stýdentter dodasy boldy. Sol kezde men Ýnıversıadanyń deńgeıine kóz jetkizdim. Ol Qysqy Olımpıadadan kem emes eken. Endi sonda jınaǵan tájirıbemniń arqasynda, 2017 jyly elimizde ótetin Ýnıversıada oıyndarynda sátti óner kórsetemin dep oılaımyn. Kelesi jyly Ýnıversıadada álem chempıonaty men Azııa oıyndary ótedi. Osy jarystyń barlyǵynda súrinbeýge tyrysamyn. Oǵan shamam tolyqtaı jetedi.
Qysqy Ýnıversıadaǵa daıyndyǵym jaqsy. Jarysqa arnaıy baǵdarlama boıynsha daıyndalyp jatyrmyn.
Nurbergen Jumaǵazıev, short-trekten Qazaqstan quramasynyń kapıtany:
– 2017 jylǵy Qysqy Ýnıversıadaǵa daıyndyǵym jaqsy. Qazir Nıderlandta oqý-jattyǵý jıyndarynda júrmiz. Kelesi jyly tek altyn alý úshin barymyzdy salamyz. Bizdiń komanda myqty jigitterden jasaqtalǵan. Sondyqtan ózimizge senemiz. Ýnıversıada men úshin Olımpııa oıyndarymen para-par. О́ıtkeni, bul jarystarǵa Olımpıadaǵa qatysyp júrgen komandalar keledi. Al olardyń arasynan top jarý, Olımp shyńyn baǵyndyrýmen teń.
Jibek Arapbaeva, 2011 jylǵy Qysqy Azııa oıyndarynyń kúmis júldegeri:
– Men 2011 jyly Qysqy Azııa oıyndaryna qatysqan bolatynmyn. Sol synda kúmis júldeni alyp, tuǵyrǵa kóterilgen sátti eshqashan umytpaımyn. Sodan beri attaı alty jyl ótti. Jeńister de, sátsizdikter de boldy. Jaraqat alsam da, sporttan qol úzgen emespin. О́ıtkeni, maqsatyma tolyq jettim dep aıta almaımyn. Ýnıversıada oıyndaryn asyǵa kútip júrmin. Osy synǵa qatysýdy kópten beri armandap, josparlap qoıǵanmyn. Buryn-sońdy Ýnıversıada oıyndaryna qatysyp kórmegenmin. Elimniń mereıin asyrǵym keledi. Men ózim aınalysatyn sport túrin halyqqa nasıhattap, onyń damýyna atsalysqym keledi. 2011 jyly bizdiń komandada frıstaldyń akrobatıka túrinen bar-joǵy 3-4 adam bolsa, qazir birshama kóbeıip qaldyq. Al Ýnıversıada aıaqtalǵannan keıin, frıstaıldyń akrobatıkasyna qyzyǵyp, osy sportqa den qoıatyndardyń qatary tipti arta túsedi dep esepteımin. Jeńisti kúnde jolyqqansha!
Janbota Aldabergenova, Sochı Olımpıadasyna qatysýshy:
– Ýnıversıada ár eki jyl saıyn ótkiziletin úlken sporttyq shara. Ol jarysta tek stýdent sportshylar qatysa alady. Men de qazir ýnıversıtette oqımyn. Osy kezge deıin elimizde ótken halyqaralyq jarystarǵa qatyspadym. Meniń frıstaılǵa degen qyzyǵýshylyǵymdy 2011 jyly Astana men Almatyda ótken VII Qysqy Azııa oıyndary oıatty. Sol kezde osy sport túrine qyzyǵa bastadym. Qazir nátıjelerim jaman emes. Sochıde ótken Olımpııa oıyndaryna qatysyp, altynshy oryn aldym. Byltyr Ýnıversıadaǵa qatysqym kelip edi. Biraq, shańǵy akrobatıkasy Ýnıversıada baǵdarlamasyna kirmeı qaldy. Sondyqtan 2017 jyldy asyǵa kútip júrmin.
Regına Glazman, mánerlep syrǵanaýshy:
– 2017 jyly Almatyda ótetin qysqy stýdentter jarysy meniń qatysatyn alǵashqy Ýnıversıadam. Sondyqtan jaýapkershilikti sezingendikten, boıymda alańdaýshylyq bar. Degenmen, bárin ysyryp tastap, ózimdi daıyndaýym kerek. О́z elimde ótetin Qysqy Oıyndarda barymdy salyp, jaqsy nátıje kórsetkim keledi. Biz óz jankúıerlerimizdiń aldynda jarysamyz, sondyqtan olardyń qoldaýy bizge dem beredi.
Jaqynda maǵan ota jasaldy. Qazir qalpyma kelip jatyrmyn. Aqpannan bastap daıyndyqty bastaımyn. Biz jattyqtyrýshylarymyzben arnaıy jattyǵý kestesin jasap qoıdyq. Sonyń negizinde daıyndalamyz.
Vladımır Pashkovskıı, shaıbaly hokkeıden memlekettik jattyqtyrýshy:
– 2017 jylǵy Ýnıversıadaǵa qaraı sportshylarymyz babynda bolady. Sol úshin olar barlyq daıyndyqtan ótip jatyr. О́tken Ýnıversıada oıyndarynda erler qurama komandasy ekinshi oryn alsa, qyzdarymyz altynshy orynnan kórindi. Bul nátıjelerdi aldaǵy Ýnıversıadada jaqsartýymyz kerek. Qazirgi tańda erler komandasynyń quramynda 50 hokkeıshi bar. Barlyq sportshylar QHL men JHL-da oınap júr. Al áıelder quramasynyń deni Almatynyń «Aısulý» hokkeı klýbynyń qyzdarynan jasaqtalǵan.
Daıyndaǵan
Dastan KENJALIN,
«Egemen Qazaqstan».