Memorandým – mańyzdy qujat

Qazirgi tańda basa kóńil bóletin máseleniń biri – óndiristik kásip­oryndardaǵy jumys oryndaryn saqtap qalý. Búgingi qıynshylyq ke­zinde nan jep otyrǵan jumysy­nan aıyrylǵan adamnan ótken beı­baq joq. Jáne de munyń kesiri eń aldymen áleýmettik turaq­ty­lyqqa tıedi. Mine, osy ózekti máseleniń aldyn alý úshin Qaraǵan­dy obly­synyń basshylyǵy qolda­ǵy bar múmkindiktiń bárin qarasty­ryp, jan-jaqty sharalar qabyl­dap jatyr. Osynyń bir mysa­ly retinde, Qara­ǵandy oblysy­nyń ákimdigi men óńirdegi iri óndiristik kásip­oryndardyń aımaqtaǵy ekono­mıkanyń damýy men áleýmettik turaqtylyqty saqtap qalý jónindegi ózara yntymaqtastyq memorandýmyna qol qoıǵan is-áreketin aıtýǵa bolady. Iri kásiporyndar demekshi, bu­lardyń qatarynda «ArselorMıttal Temirtaý» AQ, «Qazaqmys» Kor­po­rasııasy» JShS, «Jáırem taý ken-baıytý kombınaty» AQ, «Qar­sement» AQ, «Temirtaý elektr metal­lýrgııa kombınaty» AQ, «Nova Sınk» JShS syndy alpaý­yt kom­panııalar bar. Jalpy, me­mo­­ran­dýmǵa 23 iri kásiporyn qol qoıdy. Sondaı-aq, iri óndiristik kásip­oryndar Qaraǵandy oblysyn­da­ǵy shaǵyn jáne orta bıznes sala­syndaǵy óndirýshilerdi qoldaýǵa daıar ekendikterin bildirdi. Sonyń nátıjesinde taýar satyp alý, jumys jáne qyzmet kórsetýge tapsyrys berý arqyly jalpy somasy 52,2 mlrd. teńge bolatyn birqatar memorandýmdarǵa qol qoıyldy. Negizi, bul jumystardy oblys­tyq ákimdik turaqty túrde júrgizip keledi. Búgingi kúnniń ózinde oblys­ta óndiristik úderisterdi turaq­tandyrý, bıznestiń uzaq merzimdi ornyqtylyǵy men jumys­kerlerdiń eńbek quqyqtaryn qamtamasyz etý máseleleri boıynsha ákimdik pen jumys berýshiler jáne kásipodaqtar arasynda 2993 ózara yntymaqtastyq memorandýmyna qol qoıylǵan. Munyń ishinde 171 iri jáne 461 orta kásiporyndarmen me­morandým mindetteri týra­ly kelisimge qol jetkizildi. Bul degenińiz, oblysta tirkelgen iri jáne orta kásiporyndardyń 100%-yn qu­raıdy. Al kishi kásip­oryn­darmen qol qoıylǵan memo­ran­dýmdardyń sany 2361-ge jetken. Osy ıgi sharalardyń nátıje­sin­de, memorandým boıynsha moınyna mindetteme alǵan kásip­oryndardaǵy 300 myń jumys ornyn saqtap qalýǵa múmkindik týdy. Bul jaı ǵana qurǵaq sóz, qun­syz qujat emes. Memorandýmda kelisil­gen sharttardyń oryndalýyn oblys ákimdigi únemi qadaǵalap otyrady. Memorandýmdardyń mazmuny oblystyń aldynda turǵan áleý­mettik-ekonomıkalyq mindetterdi esepke ala otyryp túzilgen. Eger de óndiris kólemi azaıyp, eńbekkerler jumysynan aıyrylyp qalar kún týyp jatsa taraptardyń, atap aıtqanda, atqarýshy bılik, jumys berýshi jáne kásipodaqtardyń is-áreketi memorandým qujattarynda taıǵa tańba basqandaı etip kórsetilgen. Iаǵnı, búgingi kúnde memorandým – óndiristik damý men áleýmettik turaqtylyqtyń ara jigin ajyratpaı ustap turǵan qundy da mańyzdy qujat. Qaırat ÁBILDINOV, «Egemen Qazaqstan». QARAǴANDY.