Shyǵys óńirinde kóktemgi sanıtarlyq aılyq bastaldy. О́tken senbide oblys ortalyǵynyń turǵyndary qala aýmaǵyn tazalaý, kóriktendirý jáne kógaldandyrý jumystaryn júrgizdi. Senbilikten shahar basshysy Temirbek Qasymjanov ta tys qalǵan joq. Qolyna kúrek pen tyrma ustaǵan ákimdik jetekshisi qalanyń jańadan boı kóterip kele jatqan №19 shaǵyn aýdanyndaǵy tazalyq jumystaryna qatysty.
Eki aıǵa sozylatyn sanıtarlyq tazalyq jumystaryna qaladaǵy 27 iri kásiporyn, 12 jergilikti ózin-ózi basqarý komıteti, 14 qalalyq bólim jáne oblystyq departamentter men basqarmalar, stýdentter atsalysady. Jalpy alǵanda, 6 myńǵa jýyq adam men 100 tehnıka shahardy qys boıy jınalǵan qoqystan aryltady. Bul joly turǵyndardyń ortaq kúsh-jigerimen saıabaqtar men skverler, aýlalar tazalandy. Sondaı-aq, 500-den astam jas kóshetter otyrǵyzylyp, 400 tekshe metrge jýyq qoqys qala aýmaǵynan shyǵaryldy. Jańa shaǵyn aýdanda ashylǵan №46 orta mekteptiń mańaıy men K.Marks dańǵyly boıyndaǵy tazalyq sharalary barysynda 100-den astam kóshet egildi. Qala ákiminiń orynbasary Arman Ysqaqovtyń aıtýynsha, qalany sanıtarlyq tazalaýǵa arnalǵan eki aıda 6 myńnan astam jas kóshet otyrǵyzý josparlanyp otyr.
– Qalanyń barlyq aýdandarynyń turǵyndary senbilikke belsene qatysyp jatyr. Turǵyndar tarapynan tereń túsinistik, qorshaǵan ortaǵa degen qamqor kóńil baıqalady. Sondyqtan da olar tazalyq sharalaryna úlken úles qosýda, – dedi Arman Ysqaqov.
Dýman ANASh,
«Egemen Qazaqstan»
О́SKEMEN