Kitap – adam ómirindegi baǵa jetpeıtin qundy serik. Ol – bilimniń, rýh pen kóregendiktiń, meıir shýaǵynyń qaınar kózi. Ulttyq mádenıet pen ilim-tanymnyń negizin qalaıtyn kitap álemi óskeleń ýaqyt adamyn qalyptastyryp, kóńil saraıyn keńitedi. Ol – barshaǵa birdeı qajet tirshilik nári. Al, taǵdyr tálkegimen shalys basqandardyń jansaraıyn keńiter úmit syılyǵy.
«Nur Otan» HDP Aqmola oblystyq fılıaly osynaý izgi nıetti basshylyqqa alyp, túzeý mekemelerindegi kitaphanalar qoryn tolyqtyrý maqsatynda arnaıy aksııa jarııalaǵan bolatyn. Oǵan júzdegen aqmolalyq ún qosyp, is-sharanyń mańyzyn arttyra tústi. Aınaldyrǵan tórt aıda 2,5 myńnan astam kórkem ádebıetter, oqý quraldary kelip tústi. Kókshetaý qalasynyń turǵyny Lıdııa Korotına jeke kitaphanasynan 300-den astam ádebıetti tartý etti. Olardyń arasynda A.Chehov, L.Tolstoı, A.Pýshkın, D. Mamın-Sıbırıak, álem ádebıetiniń taǵy basqa klassıkteri jaýHar tókken kitaptar bar. Eńbek sińirgen mádenıet qaıratkeri, zeınetker Sıfat Tasovanyń tartýlary da qomaqty boldy.
Aksııa sheńberinde partııanyń aýdandyq fılıaldary kóptegen ıgi sharalardyń uıytqysy bola bildi. Máselen, Esil aýdanyndaǵy Makarenko atyndaǵy balalar úıinde ótken «Kitap merekesinde» kásiporyndar men uıym ókilderi, mektep basshylary ertegi jınaqtaryn, fantastıkalyq kitaptardy, oqýlyqtar men kórneki quraldardy syılady. Al, aýdandyq balalar kitaphanasynyń ujymy 30 ataýdan turatyn ensıklopedııalyq ádebıetti tartý etti.
Baqbergen AMALBEK.
Aqmola oblysy.