Arýlar mekeni Amal merekesin atap ótti

Buryn batys óńirge tán Amal merekesi – Kórisý kúni qazirgi tańda elimizdiń biraz aıma­ǵyna juǵysty bola bastady. Ulttyq mereke, dástúr, ádet-ǵurypqa erekshe mán beretin Almatydaǵy Qyzdar ýnıversıteti de jaqsy merekeni dástúrge aınaldyryp júr. Bıyl da tańnan Qyzdar ýnıversıtetiniń ujymy bir-birimen qushaq jaıa amandasyp, aıdan aman, jyldan esen shyqqanyna qýanyp, aq tilekter aıtyp, án men kúı terbelgen aıryqsha jaǵdaıda atap ótti. Qazaq memlekettik qyzdar pedagogıkalyq ýnıversıtetiniń rektory Dınar Nóketaeva merekeniń mańyzdylyǵyna toqtalyp, sońynan ergen sińlilerine: – Bul merekede dástúr boıynsha, aǵaıyn-áýlettiń bas ıesine, aýyl-aımaq aýyldyń úlken aqsaqalyna, jasy kishiler úlkenderge arnaıy baryp, hal-jaǵdaılaryn, otbasy amandyǵyn surap, qol berip kórisip, «bir jasymen» quttyqtap, aq batalaryn alǵan keremet dástúr! Alysty jaqyndatatyn, ókpeni keshiretin, tatýlyqty arttyratyn qandaı tamasha mereke. Biz dástúrimizdi saqtaý, Ulystyń uly kúnin qadirleý arqyly ulttyq qundylyqtarymyzdy, salt-dástúrimizdi saqtaı otyryp, ur­paq­tan-urpaqqa mıras ete alamyz. Amal mere­kesimen bastalatyn Naýryz elimizge qut-berekesimen, molshylyǵymen kelip, árbir shańyraqqa qýanysh pen shattyq syı­lasyn, – dedi. Kórisýmen bastalǵan Amal merekesi bir emes, Arýlar ordasynyń birneshe ǵımarat­tarynda atap ótildi. О́nerpaz qyzdar ánnen shashý shashsa, jigitter kúmbirlete kúı shertti. Qyzdar ýnıversıtetiniń aýzy dýaly apa-ájelerimiz qasıetti adyraspan shóbimen «Alastaý» rásimin jasap, «Basymyzǵa baıan­dy baqyt qonsyn!» dese, oqý ornynyń aqsa­qaldary «Jańbyrmen jer kógerer, batamen el kógerer» deıtin dana halqymyzdyń saltymenen jastarǵa aq batasyn berdi. Aınash ESALI, «Egemen Qazaqstan» ALMATY