Jaqsylyq jasaýǵa sebepker bol

Taǵdyrdyń jazýymen dert taýqymetin bastan keship, aýrýmen arpalysyp, qamkóńil kúıde ómir súrip jatqan jandar az emes. Olardyń qatarynda ásirese, dúnıe esigin ashqaly ómir úshin kúresip kele jatqan, on ekide bir gúli ashylmaǵan jetkinshekterdiń bolǵany júrekti aýyrtady-aq. Qazaqstan Respýblıkasy Ulttyq kitap­hanasynyń qoldaýymen E.Tursynov kınoklýbynda Almaty qalasynyń belsendi jastarynyń uıymdastyrýymen jáne qazaq estrada juldyzdarynyń qatysýymen «Jaqsylyq jasap jarysaıyq» atty qaı­y­rym­dylyq konserti ótti. Bul qaıyrymdylyq keshiniń basty keıipkeri – 2003 jyldyń 10 mamyrynda týǵan Slambek Shárip. Dúnıe esigin ashqanyna úsh aı tolǵan shaǵynda «Embrıonaldy rabdomıosarkoma» degen dıagnoz qoıylǵan Slambektiń aýyr dertpen áli qansha jyl alysatynyn onyń ata-anasy da, ata-ájesi de, dárigerler de naqty bilmegen edi... Nebári 13 jasynda 12 ret ota jasatqan balasynyń dertine daýa izdep shyryldaǵan ata-ananyń endigi bar armany – Slambekti Ońtústik Koreıa eline aparyp, on úshinshi otany sátti jasatyp qaıtý eken... Jaryq álemniń shattyǵy mol kúnderinen úmitin esh úzbegen Slambek Sháriptiń shet el asyp, em alyp qaıtýyna barynsha kómek qolyn sozǵysy kelgen jandar kóp jınal­ǵan dástúrli naqyshtaǵy, qazaqı úni bar qaıyrymdylyq keshinde ánshi, sazger Baıǵalı Esenálıev: «Úlken konsertterge shyǵyp, án sal­maı ketkenime kóp bolyp edi, degenmen, Slambek balamyz saýyǵyp ketsin degen nıet­pen osy qaıyrymdylyq konsertine arnaıy qatysyp otyrmyn», – dep aǵynan jaryldy. Al Jazýshylar odaǵynyń múshesi, Q.Sát­baev ǵylymı-tanymdyq ortalyǵynyń dırektory Aspandııar Ádenuly: «Biz nege Batysqa, Koreıa eline nemese Qytaıǵa baryp emdelýimiz kerek? Elimizde qanshama medısınalyq oqý oryndary men zertteý ınstıtýttary bar. Sol oqý oryndarynan bilim alǵan qanshama bilimdi jastarymyz bar. Biraq olar alǵan bilimin medısınasy damyǵan shet elderde jalǵastyrǵysy kelgenmen, qaltasyndaǵy qarjysy jetpeı, pushaıman kúıde júr. Eger ynta bildirgen dárigerlerge qoldaý berip, shet elde tájirıbeden ótip kelýine jaǵdaı jasasaq, Slambek tárizdi dertine shıpa izdegen qanshama adam alysqa saparlatpaı-aq, óz elinde-aq qajetti emin alyp, saýyǵyp keter me edi degen oıǵa qalatynymyz ras», degen pikirin ortaǵa salyp, úlken máseleniń shetin kóterdi. Marat Omarov, Baıǵalı Esenálıev, Gúlmıra Aqúrpekova, Altyn Aınııazova syndy birqatar tanymal ánshiler úsh dúrkin álem chempıony, sportshy Ardaq Nazarov, «Klassık» kóńildi tapqyrlar klýby, ki­tap­hana qyzmetkerleri, stýdentter men BAQ ókilderi qatysqan qaıyrymdylyq keshinde sóz alǵan Slambektiń anasy Lázzat Temirbekqyzy uly jaıly bylaı dedi: «Meni balamnyń densaýlyǵy men bolashaǵy qatty alańdatady. Ol týylǵaly ózge balalarmen asyr salyp oınamaı, densaýlyǵyna baılanysty óz ortasynan shettep bara jatqany janymdy jegideı jeıdi. Qazir ózi de eseıip qaldy, densaýlyǵyn oılap qatty alańdaıdy. Keıde ishki kúıinishin de bildirip qoıady. Ondaıda janymdy qoıarǵa jer tappaı qalamyn. О́mirge qushtar balamnyń aýyryp jylaǵanyn kórgende esh sharam qalmaıdy... Em jasaǵan dárigerlerdiń árqaısysyna árıne, alǵysym sheksiz. О́z bilimderi men tájirıbelerin balamdy emdeý jolynda esh aıaǵan joq. Áýeli Alla, sodan soń dá­ri­gerlerdiń arqasynda balam alǵashqy mú­she­li­ne qadam basty. Endigi úmitim – balamdy saý­yǵyp ketýine múmkindigi bar shet elde emdetý bolyp tur. Ońtústik Koreıaǵa baryp em alyp qaıtýymyzǵa septigin tıgizer jandar tabylyp jatsa, aldyn ala analyq alǵysymdy bildiremin. Aýrýmen arpalysqan balam jazylyp ketse, úmitimniń aqtalǵany, maqsatymnyń oryndalǵany bolar edi». О́mir súrýge degen qushtarlyǵymen qo­sa, ánshilik talanty da aıryqsha Slambek Sháriptiń bar armany, álbette, dertinen aıyǵyp, qurdastarymen qatar shapqylap júrý. «Jaqsylyq jasaı almasań, jaqsylyq jasaýǵa sebepker bol» degen. Slambekteı jas órenniń armanynyń oryndalýyna sebepker bolǵysy keletin jandar kóp bolsa eken deısiń. Mıra BAIBEK, «Egemen Qazaqstan» ALMATY